.jpg)
មណ្ឌលអប់រំកែប្រែទី ១។ ហេង ជីវ័ន
ភ្នំពេញៈ អគ្គនាយកដ្ឋានពន្ធនាគារនៃក្រសួងមហាផ្ទៃបានសម្រេចរំកិលផែនការនៃការពង្រីកហេដ្ឋារចនាសម្ព័ន្ធពន្ធនាគារទៅឆ្នាំបន្ទាប់ទៀត ដោយសារតែផលប៉ះពាល់ពីជំងឺកូវីដ ១៩ លើកលែងតែពន្ធនាគារនៅខេត្ដកំពង់ចាមតែមួយប៉ុណ្ណោះ ដែលបច្ចុប្បន្នធ្វើបានជាង ៨០ ភាគរយ។ នេះបើតាមលោក ចាន់ គឹមសេង អគ្គនាយកនៃអគ្គនាយកដ្ឋានពន្ធនាគារ។
លោក ចាន់ គឹមសេង បានថ្លែងប្រាប់ភ្នំពេញប៉ុស្តិ៍ពីថ្ងៃទី ២៣ មិថុនាថា ផែនការសកម្មភាពសម្រាប់អនុវត្ដការកសាងហេដ្ឋារចនាសម្ព័ន្ធក្នុងពន្ធនាគារ ឆ្នាំ ២០២០ គឺអគ្គនាយកដ្ឋានពន្ធនាគារបានលើកគម្រោងរួចរាល់អស់ហើយ។ ប៉ុន្ដែព្រោះបញ្ហាការរីករាលដាលជំងឺកូវីដ ១៩ ដែលបង្កផលប៉ះពាល់ដល់សេដ្ឋកិច្ច និងដល់ថវិកាដូច្នេះគម្រោងនេះនឹងរំកិលទៅឆ្នាំខាងមុខទៀត។
លោកថ្លែងថា៖ «ឆ្នាំនេះ យើងខិតខំឱ្យហើយចំពោះការសាងសង់ថ្មីពន្ធនាគារខេត្ដកំពង់ចាម ព្រោះពន្ធនាគារនេះយើងសាងសង់ជិតរួចរាល់ហើយ។ ការសាងសង់ពន្ធនាគារថ្មីនៅខេត្ដកំពង់ចាមនេះ ព្រោះថាពន្ធនាគារចាស់របស់ខេត្ដកំពង់ចាមស្ថិតនៅក្នុងទឹកដីខេត្ដត្បូងឃ្មុំដែលបានកាត់ចេញពីខេត្តកំពង់ចាម។ ក្រៅពីគម្រោងខេត្ដកំពង់ចាមគម្រោងសាងសង់នេះគឺត្រូវរំកិលទៅឆ្នាំបន្ទាប់»។
លោក ចាន់ គឹមសេង បានឱ្យដឹងថា ពាក់ព័ន្ធនឹងការកសាងហេដ្ឋារចនាសម្ព័ន្ធ ពន្ធនាគារបន្ថែមនេះ រឿងចំពោះមុខគឺដើម្បីដោះស្រាយបញ្ហាភាពចង្អៀតណែនក្នុងពន្ធនាគារ និងការកែលម្អពន្ធនាគារឱ្យមានលក្ខណៈស្ដង់ដា ដើម្បីធានាថា មានផាសុកភាព ខ្យល់អាកាសល្អ ប្រព័ន្ធទឹក និងអនាម័យគ្រប់គ្រាន់ ដល់ជនជាប់ទោស។
លោកបញ្ជាក់ថា តាមរយៈការរំកិលគម្រោងសាងសង់ហេដ្ឋារចនាសម្ព័ន្ធពន្ធនាគារទៅឆ្នាំខាងមុខនេះ គម្រោងថ្មីៗមួយចំនួនដូចជាគម្រោងពង្រីកពន្ធនាគារព្រៃសបន្ថែមចំនួន ១,៥ ហិកតា គម្រោងសាងសង់ពន្ធនាគាររាជធានីភ្នំពេញថ្មីមួយទៀតដែលសាលារាជធានីភ្នំពេញបានផ្ដល់ដីឱ្យរួចរាល់ និងគម្រោងសាងសង់ពន្ធនាគារថ្មីក្នុងខេត្ដស្ទឹងត្រែង គឺត្រូវរំកិលពេលទៅឆ្នាំខាងមុខទៀត ដោយសារតែបញ្ហាថវិកាដែលកើតឡើងមកពីការរីករាលដាលនៃជំងឺកូវីដ១៩។
លោកបានបញ្ជាក់ថា៖ «ប៉ុន្តែក្នុងឆ្នាំនេះ រាជរដ្ឋាភិបាលនៅតែបន្តដោះស្រាយលើគម្រោងជួសជុលថែទាំ គឺរដ្ឋាភិបាលនៅផ្ដល់ឱ្យលើគម្រោងនេះដែលមាន ៧ ពន្ធនាគារកំពុងបន្តជួសជុល ថែទាំ»។
លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃថ្លែងក្នុងពេលធ្វើជាអធិបតី ដឹកនាំកិច្ចប្រជុំឆ្លងផែនការ សកម្មភាពប្រចាំឆ្នាំ ២០២០ របស់អគ្គនាយកដ្ឋានពន្ធនាគារនៅថ្ងៃទី ២៣ មិថុនានៅទីស្ដីការក្រសួងមហាផ្ទៃថា អង្គភាពពាក់ព័ន្ធនានា កំពុងយកចិត្តទុកដាក់ ដើម្បីពង្រឹងរដ្ឋបាលសាធារណៈឱ្យមានសមត្ថភាពបំពេញការងារមានប្រសិទ្ធភាព។ លោកបានស្នើឱ្យអង្គភាព និងអគ្គនាយកដ្ឋានពាក់ព័ន្ធខិតខំប្រឹងប្រែងពង្រឹងគុណភាពអង្គភាពតាមរយៈគុណភាពមន្ត្រី ដោយប្រឹងប្រែងពង្រឹងការអនុវត្តតួនាទី និងភារកិច្ចរបស់ខ្លួនផងដែរ។
លោកថ្លែងថា៖ «ថ្វីដ្បិតតែយើងមិនអាចអនុវត្តតាមផែនការសកម្មភាពបានទាំងស្រុង ប៉ុន្តែផែនការសកម្មភាពនេះចាត់ទុកជាផែនទីសម្រាប់បង្ហាញផ្លូវនាឆ្នាំបន្តបន្ទាប់ ហើយសម្រាប់បញ្ហាប្រឈមនានា យើងសង្ឃឹមថា អាចដោះស្រាយបាននៅឆ្នាំក្រោយ និងឆ្នាំបន្តបន្ទាប់ខាងមុខ»៕
