.jpg)
នគរបាលពិនិត្យអ្នកទោសដែលត្រូវដឹកទៅកាន់ពន្ធនាគារវិញក្រោយនាំមកតុលាការ។ ហេង ជីវ័ន
ភ្នំពេញៈ ក្រសួងមហាផ្ទៃបានបញ្ជាក់សាជាថ្មីថា ការប្រកាសលុបចោលគម្រោងសាងសង់ពន្ធនាគារទំនើប (VIP) ដែលមានតម្លៃវិនិយោគប្រមាណជា ៤ លានដុល្លារសហរដ្ឋអាមេរិកនោះ ត្រូវរង់ចាំការពិនិត្យសម្រេចរបស់ប្រមុខរាជរដ្ឋាភិបាលកម្ពុជា។
បើយោងតាមលិខិតរបស់ នាយកខុទ្ទកាល័យ ដែលចុះហត្ថលេខាដោយ លោក ខៀវ សុភ័គ អ្នកនាំពាក្យក្រសួងមហាផ្ទៃ ដែលកាសែតភ្នំពេញប៉ុស្ដិ៍ទទួលបានកាល ពីថ្ងៃ ២៣ ខែ កក្កដា ឆ្នាំ ២០១៩ បានឲ្យដឹងថា ពាក់ព័ន្ធនឹងការសម្រេចលុបគម្រោងសាងសង់ពន្ធនាគារទំនើបនោះ គឺជាការសម្រេចក្នុងកម្រិតបច្ចេកទេសផ្ទៃក្នុងរបស់ក្រសួងមហាផ្ទៃតែប៉ុណ្ណោះ ហើយថា ក្រសួងមហាផ្ទៃបាននិងរង់ចាំការសម្រេចរបស់ប្រមុខរាជរដ្ឋាភិបាលកម្ពុជា។
លោកបានថ្លែងថា៖ «រាល់ការសម្រេចទាំងឡាយពាក់ព័ន្ធការអនុវត្តគម្រោងសាងសង់នេះ ត្រូវរង់ចាំការពិនិត្យ សម្រេចរបស់ប្រមុខរាជរដ្ឋាភិបាលកម្ពុជាដើម្បីកំណត់ជាគោលការណ៍រួមសម្រាប់ជាទិសដៅអនុវត្តសំដៅធានានិរន្តរភាព និងប្រសិទ្ធភាពនៃដំណើរការនិងការគ្រប់គ្រងពន្ធនាគារនៅកម្ពុជានាពេលអនាគត»។
លោក ស៊ឹង សែនករុណា អ្នកនាំពាក្យសមាគមអាដហុក (ADHOC) បានស្វាគមន៍ចំពោះការសម្រេចចិត្តលុបគម្រោងពន្ធនាគារ VIP របស់រដ្ឋាភិបាលនេះដោយសារតែពន្ធនាគារ អាចនឹងអនុញ្ញាតឲ្យអ្នកទោសទទួលបានទោស ទណ្ឌ និងការពិន័យផ្នែកច្បាប់។
លោក សែនករុណា បញ្ជាក់ថា៖ «ការរង់ចាំការសម្រេចរបស់រាជរដ្ឋាភិបាលគឺគ្រាន់ជានីតិវិធីមួយទេ។ ពន្ធនាគារ នេះមិនគួរកើតមាននូវពន្ធនាគារ VIP ដែលអនុញ្ញាតឲ្យអ្នកមានលុយ និងអំណាច មិនខ្លាចនឹងប្រព្រឹត្តបទល្មើសទេពីព្រោះគេអាចប្រើលុយ និងអំណាចរបស់គេដើម្បីទទួលបានពន្ធនាគាររបៀបសណ្ឋាគារ»។
កាលពីដើមខែ កក្កដា ឆ្នាំ ២០១៩ នេះ លោក ខៀវ សុភ័គ បានឲ្យដឹងថា ការសម្រេចបោះបង់ចោលគម្រោងពន្ធនាគារទំនើប (VIP) នេះក្រោយពីបានធ្វើការសិក្សារកពុំឃើញមានប្រទេសណាមួយធ្វើពន្ធនាគារទំនើបបែបនេះសម្រាប់ឃុំខ្លួនអ្នកជាប់ឃុំ ដែលមានលទ្ធភាពបង់ប្រាក់។
សំណង់អគារពន្ធនាគារនេះវិនិយោគដោយក្រុមហ៊ុនឈ្មោះ គន្ធរីខុន ហូលឌីង លើផ្ទៃដីជាង ១ ហិកតា ក្នុងទឹកប្រាក់វិនិយោគជាង ៤ លានដុល្លារ ដោយបានចាប់បើកការដ្ឋានសាងសង់កាលពីខែឧសភា ឆ្នាំ ២០១៧ ដែលលោក ស ខេង រដ្ឋមន្ត្រីក្រសួងមហាផ្ទៃធ្លាប់បានចាត់ទុកមជ្ឈមណ្ឌលឃុំឃាំងថ្មី ដូចជា សណ្ឋាគារ ត្រូវបានអង្គការសង្គមស៊ីវិលបានរិះគន់ថា ហាក់មានទម្រង់ជាការបែងចែកវណ្ណៈចំពោះអ្នកទោសដូចគ្នា។
កាលពីខែ មីនា ឆ្នាំ ២០១៩ កន្លងទៅលោកនាយករដ្ឋមន្ត្រី ហ៊ុន សែន បានស្នើឲ្យពន្លឿនការកាត់ក្ដី ដើម្បីកុំឲ្យពន្ធនាគារចង្អៀតណែន ខណៈដែលបច្ចុប្បន្ន មានអ្នកកំពុងជាប់ឃុំក្នុងពន្ធនាគារ ២ ភាគ ៣ គឺជាជនដែលមិនទាន់ត្រូវបានតុលាការកាត់ទោស។
លោក បេ ទាឡេង អគ្គនាយករង នៃអគ្គនាយកដ្ឋានពន្ធនាគារ បានឲ្យដឹងកាលពីខែ មីនា ឆ្នាំ ២០១៩ ថា មានអ្នកជាប់ពន្ធនាគារសរុបមាន ៣១ ៤០០ នាក់ ដែលក្នុងនោះមានស្ត្រី ២ ៤៤០ នាក់។ ក្នុងចំនួននេះ ជនត្រូវចោទមាន ៧ ៧៦៧ នាក់ ជនជាប់ចោទមាន ៣ ៦៤៣ នាក់។ ចំណែកពិរុទ្ធជនមាន ១០ ៨៩០ នាក់ ហើយទណ្ឌិតមានចំនួន ៩ ១៣៧ នាក់។ លោក នុត សវនា អ្នកនាំពាក្យអគ្គនាយកដ្ឋានពន្ធនាគារមិនអាចទាក់សុំការបំភ្លឺបានទេ៕
