ព្រះសីហនុៈ អ្នកនាំពាក្យរដ្ឋបាលខេត្តព្រះសីហនុលោក ឃាង ភារម្យ បាននិយាយនៅថ្ងៃពុធថា គម្រោងស្ថាបនាផ្លូវ ៣៤ ខ្សែ ដែលគ្រោងនឹងបញ្ចប់នៅពាក់កណ្ដាលខែមីនាខាងមុខនេះនឹងត្រូវសម្ពោធដាក់ឱ្យប្រើប្រាស់ជាផ្លូវការ នៅមុនថ្ងៃប្រារព្ធពិធីបុណ្យចូលឆ្នាំថ្មីប្រពៃណីខ្មែរ។
បើតាមលោក ភារម្យ មកទល់ពេលនេះផ្លូវទាំង ៣៤ ខ្សែនោះ ត្រូវបានស្ថាបនាចាក់បេតុងរួចរាល់ជាស្ថាពរហើយ ប៉ុន្តែដំណើរការចាក់អ៊ុតបេទីម (អ៊ុតកៅស៊ូ) ក្រាលពីលើបេតុងទើបសម្រេចបានជាង ៦០ ភាគរយប៉ុណ្ណោះ។
ចំណែកការងារបំពាក់អំពូលភ្លើងបំភ្លឺផ្លូវ ភ្លើងសញ្ញាចរាចរណ៍ ស្លាកសញ្ញាចរាចរណ៍គឺបានសម្រេចស្ទើរតែ ១០០ ភាគរយហើយ ខណៈការងារបំពាក់កាមេរ៉ាសុវត្ថិភាព និងគូសគំនូសសញ្ញាចរាចរណ៍នៅលើដងផ្លូវនៅមានភាពយឺតយ៉ាវជាងគេបន្តិច គឺទើបតែសម្រេចបានប្រមាណ ៥០ ភាគរយប៉ុណ្ណោះ។
លោកថ្លែងថា៖ «ទោះជាបែបណាក្ដី នៅពេលនេះក្រុមការងារតាមផ្នែកនីមួយៗ កំពុងបង្កើនល្បឿនការងាររបស់ខ្លួនដោយសម្រុកធ្វើទាំងយប់ទាំងថ្ងៃ ដើម្បីធ្វើយ៉ាងណាឱ្យកិច្ចការដែលនៅសេសសល់ទាំងអម្បាលម៉ាន ត្រូវហើយរួចរាល់នៅត្រឹមថ្ងៃទី ១៥ ខែមីនា ដើម្បីរៀបចំបើកសម្ពោធដាក់ឱ្យប្រើប្រាស់ជាផ្លូវការនៅមុនថ្ងៃបុណ្យចូលឆ្នាំថ្មីប្រពៃណីខ្មែរខាងមុខនេះ»។
លោកបានបន្តថា បើគ្មានអ្វីប្រែប្រួលទេនោះពិធីបើកសម្ពោធដាក់ឱ្យប្រើប្រាស់ជាផ្លូវការនូវគម្រោងស្ថាបនាផ្លូវទាំង ៣៤ ខ្សែ រួមទាំងសមិទ្ធផលដែលទើបសាងសង់ថ្មីមួយចំនួនទៀតនៅក្នុងខេត្តព្រះសីហនុនេះនឹងត្រូវធ្វើឡើងនៅថ្ងៃទី ៩ ខែមេសា ឆ្នាំ ២០២១ ហើយលោកនាយករដ្ឋមន្ត្រី ហ៊ុន សែន នឹងអញ្ជើញជាគណៈធិបតី និងថ្លែងបាឋកថានៅក្នុងពិធីនេះ។
សូមបញ្ជាក់ថាផ្លូវចំនួន ៣៤ ខ្សែ ដែលកំពុងបន្តសាងសង់នៅក្នុងខេត្តព្រះសីហនុនេះមានប្រវែងសរុប ៨៤ គីឡូម៉ែត្រ ដោយចំណាយថវិកាសរុប ២៩៤ លានដុល្លារសហរដ្ឋអាមេរិក។ ផ្លូវទាំង ៣៤ ខ្សែនេះ បានចាប់ផ្ដើមបើកការដ្ឋានសាងសង់កាលពីថ្ងៃទី ១៦ ខែ វិច្ឆិកា ឆ្នាំ ២០១៩ ដោយមានប្រតិបត្តិករមកពីក្រុមហ៊ុនចំនួន ៦ និង ២ អង្គភាពកងវិស្វកម្មដែលរួមមានក្រុមហ៊ុនហេងសម្បត្តិ, ក្រុមហ៊ុន SCE,ក្រុមហ៊ុនសាជីវកម្មពិស្ណុការ អន្តរជាតិ, ក្រុមហ៊ុន K.B.H Construction Co.,LTD, ក្រុមហ៊ុន VT Engineering Construction, ក្រុមហ៊ុនរ៉ូយ៉ាល់មេគង្គ ខនស្ត្រាក់សិន & ឌីវើឡុបមែន, អង្គភាពកងវិស្វកម្មសម្តេចតេជោ ហ៊ុន សែន សៀមរាប និងអង្គភាពកងវិស្វកម្មលេខ ១៧៨ ស្ពាន ថ្នល់នៃក្រសួងការពារជាតិ។
គម្រោងស្ថាបនាផ្លូវទាំង ៣៤ ខ្សែនេះ គ្រប់គ្រងដោយគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា។
លោក ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាធ្លាប់បានលើកឡើងថា ដើម្បីប្រែក្លាយខេត្តព្រះសីហនុទៅជាប៉ូលសេដ្ឋកិច្ចទី២ របស់ប្រទេសកម្ពុជា ដោយក្នុងក្រុងមានមជ្ឈមណ្ឌលពាណិជ្ជកម្មទំនើបៗ ដែលអាចទាក់ទាញវិស័យទេសចរណ៍ និងក្លាយជាច្រកបង្កើនសេដ្ឋកិច្ចប្រទេស រដ្ឋាភិបាលបានវិនិយោគថវិកា ១០០ លានដុល្លារបន្ថែមទៀត ដើម្បីសាងសង់ផ្លូវ ១១ ខ្សែទៀត នៅក្នុងស្រុកព្រៃនប់ និងស្រុកស្ទឹងហាវ បន្ថែមលើគម្រោងផ្លូវ ៣៤ ខ្សែខាងលើនេះ។
លោក ភារម្យ បានប្រាប់ឱ្យដឹងថា គម្រោងសាងសង់ផ្លូវ ១១ ខ្សែថ្មីនេះ ត្រូវបានស្ថាបនាហើយប្រមាណ ៣០ ភាគរយផងដែរ៕