.jpg)
ម៉ាស់ត្រូវបានដាក់លក់នៅតាមចិញ្ចើមផ្លូវព្រះសីហនុកាលពីថ្ងៃទី ៥ ខែឧសភា។ ហេង ជីវ័ន
ភ្នំពេញ: អគ្គនាយកគយ និងរដ្ឋាករកម្ពុជាបានប្រាប់ទៅប្រធាននាយកដ្ឋាន សាខា និងការិយាល័យគយ និងរដ្ឋាករពីការលើកលែងបម្រាមបណ្ដោះអាសន្ននៃការតម្រូវឲ្យមានការសុំការអនុញ្ញាតពីក្រសួងសុខាភិបាលក្នុងការនាំចេញលើមុខទំនិញម៉ាស់គ្រប់ប្រភេទ ដោយសារកម្ពុជាបានផលិតម៉ាស់គ្រប់គ្រាន់សម្រាប់បម្រើដល់ការទប់ស្កាត់ការរីករាលដាលនៃជំងឺកូវីដ ១៩ ក្នុងប្រទេស។
តាមលិខិតរបស់អគ្គនាយកគយ និងរដ្ឋាករកម្ពុជាដែលជម្រាបជូនទៅលោក លោកស្រីប្រធាននាយកដ្ឋាន សាខា និងការិយាល័យគយ និងរដ្ឋាករចុះថ្ងៃទី ៤ ឧសភា ដែលភ្នំពេញ-ប៉ុស្ដិ៍ទទួលបានពីថ្ងៃអង្គារបានឲ្យដឹងថា ដោយបច្ចុប្បន្ននេះរាជរដ្ឋាភិបាលអាចគ្រប់គ្រង និងធានាបាននូវការស្តុកម៉ាស់ដែលបម្រើដល់ការទប់ស្កាត់ការរីករាលដាលនៃជំងឺកូវីដ១៩ នៅក្នុងប្រទេស អគ្គនាយកគយ និងរដ្ឋាករសម្រេចដកបម្រាមបណ្ដោះអាសន្ននៃការតម្រូវឲ្យមានការអនុញ្ញាតពីក្រសួងសុខាភិបាលលើការនាំចេញមុខទំនិញម៉ាស់គ្រប់ប្រភេទ។
លិខិតបញ្ជាក់ថា៖ «ដូច្នេះសូមលោក លោកស្រី ចាត់ចែងផ្សព្វផ្សាយ និងអនុវត្តតាមខ្លឹមសារនេះឲ្យមានប្រសិទ្ធភាពខ្ពស់ចាប់ពីថ្ងៃចុះហត្ថលេខានេះតទៅរហូតដល់ការណែនាំជាថ្មី»។
លោក គុណ ញឹម ប្រតិភូរាជរដ្ឋាភិបាលទទួលបន្ទុកអគ្គនាយកគយ និងរដ្ឋាករកម្ពុជាបានថ្លែងពីថ្ងៃអង្គារថា រាជរដ្ឋាភិបាលមានម៉ាស់គ្រប់គ្រាន់ហើយដោយអាចធានាលើការប្រើប្រាស់តាមតម្រូវការក្នុងការទប់ស្កាត់ការរីករាលដាលនៃជំងឺកូវីដ ១៩ នៅក្នុងប្រទេសដែលនេះមកពីក្រុមហ៊ុនកាត់ដេរសម្លៀកបំពាក់មួយចំនួនបានបង្វែរចង្វាក់ផលិតកម្មរបស់ខ្លួនមកធ្វើការផលិតម៉ាស់វិញ។
លោកបន្តថា ក្រុមហ៊ុនមួយចំនួនបានធ្វើការផលិតម៉ាស់ ដើម្បីនាំចេញទៅផ្គត់ផ្គង់នៅទីផ្សារក្រៅប្រទេសដែលកំពុងរីករាលដាលនៃជំងឺកូវីដ ១៩ ដូចជា សហរដ្ឋអាមេរិក និងសហភាពអឺរ៉ុប។
លោកបញ្ជាក់ថា៖ «កាលពីមុនយើងបានរឹតត្បិតការនាំចេញម៉ាស់ ដោយសារយើងគិតថា បើយើងមានរោងចក្រផលិតម៉ាស់ហើយគឺត្រូវតែទុកប្រើប្រាស់តាមតម្រូវការនៅក្នុងប្រទេសក្នុងអំឡុងពេលឆ្លងរីករាលដាលជំងឺកូវីដ១៩នេះនៅក្នុងប្រទេសយើង ប៉ុន្ដែឥឡូវនេះយើងមានម៉ាស់គ្រប់គ្រាន់ហើយ និងការគ្រប់គ្រងក៏បានល្អទៀតផង»។
លោកបន្តថា លោកមិនទាន់អាចបញ្ជាក់ពីចំនួនម៉ាស់ដែលនៅក្នុងស្ដុកនោះច្បាស់លាស់នៅឡើយ ប៉ុន្ដែលោកអះអាងថា ម៉ាស់ដែលកំពុងស្ដុកទុកក្នុងឃ្លាំងនោះគឺមានចំនួនរាប់លានម៉ាស់។ លោកក៏មិនទាន់ដឹងច្បាស់ថា មានក្រុមហ៊ុនប៉ុន្មានកំពុងផលិតម៉ាស់នេះដែរ ព្រោះរោងចក្រមួយចំនួនដែលធ្លាប់កាត់ដេរសម្លៀកបំពាក់បានបង្វែរមកផលិតម៉ាស់នាំចេញវិញ។
លោកបន្តថា ការបញ្ជាទិញសម្លៀកបំពាក់នៅលើទីផ្សារអន្តរជាតិក៏ដូចជានៅអឺរ៉ុបមានការថមថយ ទើបពួកគាត់ងាកមកផលិតម៉ាស់វិញ ដើម្បីផ្គត់ផ្គង់ការប្រើប្រាស់តាមតម្រូវការក្នុងស្រុក និងអាចបន្តការងារឲ្យកម្មករកម្ពុជាផងដែរ។ បច្ចុប្បន្ននេះការបញ្ជាទិញម៉ាស់ពីក្រៅប្រទេសមានចំនួនច្រើន ព្រោះតម្រូវការនៅទីផ្សារបរទេសមានខ្ពស់ដូចជា នៅសហរដ្ឋអាមេរិក អូស្ត្រាលី អាល្លឺម៉ង់ និងប្រទេសនៅតំបន់អឺរ៉ុបមួយចំនួនទៀត។ ដូច្នេះរាជរដ្ឋាភិបាល សម្រេចបន្ធូរបន្ថយការរឹតបន្តឹងការនាំចេញម៉ាស់ទៅបរទេស។
លោកស្រី យក់សម្បត្តិ រដ្ឋលេខាធិការក្រសួងសុខាភិបាលបានថ្លែងក្នុងសន្និសីទសារព័ត៌មានស្ដីពីបច្ចុប្បន្នភាពជំងឺកូវីដ ១៩ កាលពីថ្ងៃទី ២៧ ខែមេសា ថាកម្ពុជានឹងអាចផលិតបាន ១១ លានម៉ាស់ ដែលអាចគ្រប់គ្រាន់តាមផែនការនៅសប្តាហ៍ទី ១ នៃខែឧសភា។
គួររំឭកថាកាលពីថ្ងៃទី ៣០ ខែ មីនា ឆ្នាំ ២០២០ អគ្គនាយកដ្ឋានគយ និងរដ្ឋាករកម្ពុជាបានដាក់វិធានការបន្ទាន់មួយក្នុងការគ្រប់គ្រងមុខទំនិញមួយចំនួន ដែលពាក់ព័ន្ធនឹងការទប់ស្កាត់ការចម្លងជំងឺកូវីដ១៩ ដោយតម្រូវឲ្យមានការសុំការអនុញ្ញាតនាំចេញពីក្រសួងសុខាភិបាលលើមុខទំនិញម៉ាស់គ្រប់ប្រភេទ ផលិតផលសម្លាប់មេរោគគ្រប់ប្រភេទរួមមានអាល់កុល ល្បាយអាល់កុល ជែលសម្អាតដៃ និងផលិតផលមួយចំនួនទៀត៕
