.jpg)
គណៈកម្មាធិការសិទ្ធិមនុស្សកម្ពុជា (គ.ស.ម.ក) ជួបជាមួយលោកស្រី រ៉ូណា ស្ម៊ីត អ្នករាយការណ៍ពិសេស UN នៅរាជធានីភ្នំពេញកន្លងមក។ ហុង មិនា
ភ្នំពេញៈ គណៈកម្មាធិការសិទ្ធិមនុស្សកម្ពុជា (គ.ស.ម.ក) ពីម្សិលមិញចេញសេចក្ដីប្រកាសព័ត៌មានស្ដីពីស្ថានភាពសិទ្ធិមនុស្ស ការអនុវត្តលទ្ធិប្រជាធិបតេយ្យ និងនីតិរដ្ឋនៅកម្ពុជា។ ស្ថាប័ននេះថ្លែងថា ប្រជាធិបតេយ្យមានគោលការណ៍រួម តែការអនុវត្តត្រូវមានភាពបត់បែន និងប្រែប្រួលទៅតាមបរិបទ និងគុណតម្លៃនៃប្រទេសនីមួយៗដោយតម្កល់នូវប្រយោជន៍ជាតិខ្លួនជាធំ។
សេចក្ដីប្រកាសព័ត៌មានកម្រាស់ ៧ ទំព័ររបស់ គ.ស.ម.ក ធ្វើឡើងដើម្បីបង្ហាញពីបច្ចុប្បន្នភាពអំពីស្ថានភាពសិទ្ធិមនុស្ស ការអនុវត្តច្បាប់ក្នុងការលើកស្ទួយប្រជាធិបតេយ្យ និងនីតិរដ្ឋនៅកម្ពុជា និងជាការឆ្លើយតបទៅនឹងការរិះគន់ ការចោទប្រកាន់ដោយលម្អៀង គ្មានមូលដ្ឋានរបស់ក្រុមអង្គការមួយចំនួនដែល គ.ស.ម.ក ចាត់ទុកថា «មាននិន្នាការនយោបាយប្រឆាំងនឹងរដ្ឋាភិបាល»។
គ.ស.ម.ក ថ្លែងថា៖ «ប្រជាធិបតេយ្យមានគោលការណ៍រួម តែមិនមានស្តង់ដារួមដែលតម្រូវឲ្យប្រទេសទាំងអស់ត្រូវតែអនុវត្តឲ្យបានដូចគ្នានោះទេ ពោលគឺការអនុវត្តត្រូវមានភាពបត់បែន និងប្រែប្រួលទៅតាមបរិបទ និងគុណតម្លៃនៃប្រទេស និងតំបន់នីមួយៗ ដោយតម្កល់នូវប្រយោជន៍ជាតិខ្លួនជាធំ»។
ស្ថាប័ននេះបន្តថា៖ «ដូច្នេះការវាយតម្លៃពីស្ថានភាពប្រជាធិបតេយ្យ និងសិទ្ធិមនុស្សក្នុងប្រទេសមួយដែលប្រកបដោយភាពសុក្រឹត យុត្តិធម៌ ត្រឹមត្រូវ និងគ្រប់ជ្រុងជ្រោយ មិនលម្អៀងនោះ គឺត្រូវធ្វើឡើងដោយផ្អែកលើគោលការណ៍រួមផង ព្រមទាំងបរិបទ និងគុណតម្លៃនៃប្រទេស និងតំបន់នោះផងដែរ និងមិនត្រូវវាយតម្លៃដោយផ្ដោតទៅលើសិទ្ធិណាមួយ ហើយបំភ្លេចចោលនូវវឌ្ឍនភាពនៃការអនុវត្តសិទ្ធិដទៃទៀតនោះទេ»។
គ.ស.ម.ក លើកឡើងពីទិដ្ឋភាព សិទ្ធិមនុស្សជាច្រើនផ្នែកព្រមទាំងបានបង្ហាញពីការអនុវត្តច្បាប់ចំពោះសកម្មភាពរំលោភច្បាប់នានារួមមានទាំងវិធានការលើការតវ៉ាដាក់សម្ពាធលើតុលាការ។ ការបញ្ចេញមតិរឿងព្រំដែន ដែលខុសពីការពិត និងការរាយការណ៍ជូនអង្គការសហប្រជាជាតិដោយលម្អៀង ឬមិនគ្រប់ជ្រុងជ្រោយ។
ក្រៅពីនេះ គ.ស.ម.ក ក៏លើកឡើងវិធានការរបស់បរទេស និងស្ថាប័នអន្តរជាតិមួយចំនួនដែលជាការជ្រៀតជ្រែកចូលផ្ទៃក្នុងកម្ពុជា។ ការលើកឡើងពីចំណុចនេះទំនងជាសំដៅដល់សហរដ្ឋអាមេរិកដែលកាលពីឆ្នាំមុនបានប្រកាសដាក់ទណ្ឌកម្មមន្ត្រីកម្ពុជាដោយចោទថាជាប់ពាក់ព័ន្ធនឹងការរំលោភសិទ្ធិមនុស្សហើយថ្មីៗនេះបានប្រកាសដាក់ទណ្ឌកម្មលើក្រុមហ៊ុនឯកជនមួយនៅកម្ពុជា។
គ.ស.ម.ក ថា៖ «វាបានបង្ហាញឲ្យឃើញច្បាស់ពីការបាត់បង់សណ្ដាប់ធ្នាប់អន្តរជាតិ និងភាពអនាធិបតេយ្យនៃនយោបាយអន្តរជាតិនាពេលថ្មីៗនេះ។ ការដែលរដ្ឋ ១ អាចរៀបចំច្បាប់តាមទំនើងចិត្ត និងជាឯកតោភាគី លូកលាន់ចូលកិច្ចការផ្ទៃក្នុងរបស់រដ្ឋដទៃក្រោមលេសប្រជាធិបតេយ្យ និងសិទ្ធិមនុស្ស ព្រមទាំងដាក់ទណ្ឌកម្មលើរដ្ឋ ថ្នាក់ដឹកនាំ និងសហគ្រាសឯកជននៃរដ្ឋអធិបតេយ្យ ១ ទៀតដោយមិនឆ្លងកាត់យន្តការអង្គការសហប្រជាជាតិ ទង្វើនេះធ្វើឡើងក្រោមរូបភាព និងផលប្រយោជន៍នយោបាយជាជាងហេតុផលសិទ្ធិមនុស្ស»។
ស្ថាប័ននេះបញ្ជាក់ថាទោះយ៉ាងណា កម្ពុជាបន្តសហប្រតិបត្តិការជាមួយគ្រប់យន្តការអន្តរជាតិ និងគ្រប់ភាគីពាក់ព័ន្ធទាំងអស់។
លោក ជិន ម៉ាលីន អ្នកនាំពាក្យ គ.ស.ម.ក. បញ្ជាក់ម្សិលមិញថានេះជាការបង្ហាញអំពីតថភាពនៃស្ថានការណ៍សិទ្ធិមនុស្សនៅកម្ពុជា និងជាការឆ្លើយតបទៅនឹងអង្គការដែលតែងចោទរដ្ឋាភិបាលរឿងរំលោភសិទ្ធិមនុស្ស។
លោក ប៉ា ច័ន្ទរឿន នាយកវិទ្យាស្ថានប្រជាធិបតេយ្យកម្ពុជាបានថ្លែងថា៖ «រដ្ឋាភិបាលគួរតែចាត់ទុកសំឡេងអង្គការសង្គមស៊ីវិលជាការផ្ដល់មតិ ជាព័ត៌មានសម្រាប់ការកែលម្អ»៕
