.jpg)
បន្ទាយមានជ័យៈ លោក ស ខេង រដ្ឋមន្ត្រីក្រសួងមហាផ្ទៃថ្លែងពីម្សិលមិញថា គិតចាប់ពីថ្ងៃទី ២២ ខែមីនាមកដល់ថ្ងៃព្រហស្បតិ៍ម្សិលមិញ អាជ្ញាធរមូលដ្ឋានទូទាំងប្រទេសបានក្ដាប់ចំនួនពលរដ្ឋវិលត្រឡប់ពីប្រទេសថៃទៅដល់ស្រុកកំណើតមានប្រមាណជាង ៤ ម៉ឺននាក់។ នេះបើតាមព័ត៌មាននៅលើទំព័រហ្វេសប៊ុករបស់លោកកាលពីម្សិលមិញ។
លោក ស ខេង បានថ្លែងនៅប៉ុស្តិ៍ច្រកទ្វារអន្តរជាតិប៉ោយប៉ែតខេត្តបន្ទាយមានជ័យកាលពីម្សិលមិញថា ក្នុងចំណោមពលរដ្ឋទាំងនោះរួមមានពីខេត្តបន្ទាយមានជ័យជាង ៩ ២០០ នាក់បាត់ដំបងជាង ៧ ៦០០ នាក់ កំពង់ចាមជាង ១ ១០០ នាក់ កំពង់ធំជាង ១ ៨០០ នាក់ កំពត ៥០០ នាក់ កណ្ដាលជាង ១ ០០០ នាក់ ព្រៃវែងជាង ២ ០០០ នាក់ ពោធិ៍សាត់ជាង ៨០០ នាក់ សៀមរាបជាង ៥ ០០០ នាក់ តាកែវជាង ៨០០ នាក់ ឧត្តរមានជ័យជាង ១ ៨០០ នាក់ និងខេត្តត្បូងឃ្មុំជាង ១ ៣០០ នាក់។
ចំនួននេះនៅមិនទាន់បូកបញ្ចូលជាមួយខេត្តផ្សេងៗទៀតដែលមានពលរដ្ឋក្នុងចំនួនតិចនោះទេ។ លោកឲ្យដឹងដែរថាមានមនុស្ស ២៤ នាក់ដែលបានត្រឡប់ពីប្រទេសថៃត្រូវបានដាក់ក្នុងវិធានការនៅដោយឡែកនៅខេត្តព្រះសីហនុ។ ការវិលត្រឡប់យ៉ាងគំហុកនៃពលរដ្ឋខ្មែរធ្វើការនៅថៃនេះធ្វើឡើង បន្ទាប់ពីប្រទេសថៃបានប្រកាសបិទព្រំដែនជាមួយកម្ពុជាដែលជាវិធានការដើម្បីទប់ស្កាត់ការឆ្លងជំងឺកូវីដ ១៩។
ស្ថានទូតខ្មែរប្រចាំទីក្រុងបាងកកកាលពីម្សិលមិញបានជូនដំណឹងដល់ពលរដ្ឋខ្មែរដែលស្នាក់នៅ និងធ្វើការនៅប្រទេសថៃថា ប្រទេសថៃបានប្រកាសដាក់ប្រទេសក្នុងគ្រាមានអាសន្នដោយចូលជាធរមានចាប់ពីថ្ងៃទី ២៦ ខែមីនា ម្សិលមិញរហូតដល់ថ្ងៃទី ៣០ ខែមេសាដែលហាមមិនឲ្យមានការឆ្លងកាត់ព្រំដែនកម្ពុជា-ថៃ នោះឡើយ។
ស្ថានទូតបញ្ជាក់ថា ចំពោះពលរដ្ឋខ្មែរដែលមានទិដ្ឋាការស្នាក់នៅ និងបណ្ណអនុញ្ញាតការងារអស់សុពលភាព ក្រសួងការងារថៃនឹងបន្តឲ្យស្នាក់នៅរហូតដល់ថ្ងៃទី ៣០ មិថុនា ដោយលើកលែងការផាកពិន័យលើការស្នាក់នៅលើសកំណត់។ ស្ថានទូតប្រាប់ឲ្យពលរដ្ឋខ្មែរទាក់ទងមន្ទីរការងារក្រុង-ខេត្តនៃប្រទេសថៃឲ្យបានត្រឹមថ្ងៃ ៣១ ខែមីនា។
កាលពីថ្ងៃពុធលោកនាយករដ្ឋមន្ត្រី ហ៊ុន សែន បានថ្លែងថាកម្ពុជាអាចដាក់ប្រទេសក្នុងគ្រាមានអាសន្ន ប្រសិនបើការអំពាវនាវក្នុងការទប់ស្កាត់ជំងឺកូវីដ១៩ មិនមានប្រសិទ្ធភាព។
លោក គី តិច អនុប្រធានក្រុមប្រឹក្សាអ្នកច្បាប់នៃទីស្ដីការគណៈរដ្ឋមន្ត្រីបានថ្លែងយ៉ាងខ្លីកាលពីម្សិលមិញថា ក្រុមប្រឹក្សាកំពុងសិក្សាលើការដាក់ប្រទេសក្នុងស្ថានភាពគ្រាមានអាសន្ននេះ។
លោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងថា ដោយសារតែរដ្ឋធម្មនុញ្ញចែងច្បាស់ថា ព្រះមហាក្សត្រអាចដាក់ប្រទេសក្នុងគ្រាមានអាសន្នដោយមានការឯកភាពពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភានោះព្រះមហាក្សត្រអាចចេញព្រះរាជក្រឹត្យភ្លាមៗតាមការស្នើសុំដោយមានភ្ជាប់ជាមួយនូវលក្ខខណ្ឌ។
លោកថ្លែងថា៖ «ហើយការដាក់ក្នុងលក្ខខណ្ឌបែបណានោះគឺព្រះរាជក្រឹត្យនឹងកំណត់លក្ខខណ្ឌ និងគោលការណ៍មួយចំនួននៃការដាក់នោះហើយ។ មាត្រា ២២ នេះបានចង្អុលបង្ហាញដល់សិទ្ធិរបស់ស្ថាប័នរដ្ឋគឺអំណាចនីតិប្រតិបត្តិក្នុងការកំណត់លក្ខខណ្ឌចាំបាច់មួយចំនួនក្នុងការដាក់ប្រទេសក្នុងគ្រាមានអាសន្ន រួមមានរយៈពេលតំបន់ដែលត្រូវប្រកាសភាពអាសន្នអាចតំបន់មួយចំនួន ឬមួយទូទាំងប្រទេសក្នុងរយៈពេលកំណត់ ឬមិនមានពេលកំណត់រហូតដល់ស្ថានការណ៍ប្រសើរឡើងអាចកំណត់ពីរបៀបរបបសិទ្ធិអំណាចរបស់រដ្ឋាភិបាលកាតព្វកិច្ចរបស់ពលរដ្ឋ និងវិធានការចាំបាច់មួយចំនួន»។
គិតត្រឹមយប់មិញនេះមនុស្សសរុបចំនួន ១១ នាក់នៅកម្ពុជាដែលឆ្លងជំងឺកូវីដ១៩ បានជាសះស្បើយក្នុងចំណោម ៩៨ នាក់ដែលក្នុងនោះមានខ្មែរ ៩ នាក់ចិន ម្នាក់ និងអង់គ្លេសម្នាក់។
លោក កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំដែលខេត្តនេះមានអ្នកផ្ទុក ២ នាក់បានជាសះស្បើយពន្យល់ថា បន្ទាប់ពីអ្នកទាំង ២ បានចេញពីមន្ទីរពេទ្យ មន្ត្រីសុខាភិបាលនៅតែបន្តតាមដានសុខភាពរបស់ពួកគេបន្តទៀត ប៉ុន្តែមិនមានការហាមឃាត់ក្នុងការជួបជុំក្រុមគ្រួសាររបស់ពួកគេទេ ប៉ុន្តែពួកគេត្រូវប្រយ័ត្នកុំឲ្យឆ្លងពីអ្នកដទៃទៀត។
លោកថ្លែងអំពីការព្យាបាលយ៉ាងដូច្នេះថា៖ «គាត់មិនទាន់ជាអ្នកជំងឺទេ គ្រាន់តែផ្ទុក ហើយយើងមើលថែសុខភាពគាត់ពីររបៀប គឺតាមផ្លូវចិត្ត ការអប់រំអំពីអនាម័យធ្វើឲ្យគាត់សប្បាយចិត្ត ណែនាំពីសុខភាពហើយការព្យាបាលផ្នែកវេជ្ជសាស្ត្រយើងតាមដានមើលឈាមគាត់ មើលកំដៅ និងការសួរនាំផ្សេងៗ»។
លោកថា ការពិនិត្យសុខភាពរកឃើញអវិជ្ជមានទាំង ២ លើកនោះធ្វើឡើងរៀងរាល់ ៣ ថ្ងៃម្ដង៕
វីដេអូ៖
