ភ្នំពេញៈ គិតចាប់ពីដើមខែមីនាមកដល់ថ្ងៃទី ២០ ខែវិច្ឆិកា រាជរដ្ឋាភិបាលបានបើកផ្តល់ប្រាក់ឧបត្ថម្ភដល់កម្មករនិយោជិតប្រមាណ ៣៣ ម៉ឺននាក់ ដោយចំណាយថវិកាប្រមាណ ២២ លានដុល្លារ ខណៈរដ្ឋាភិបាលនៅមិនទាន់សម្រេចថា តើនឹងត្រូវបន្តផ្តល់ប្រាក់ឧបត្ថម្ភដល់កម្មករនិយោជិតនៅឆ្នាំ ២០២១ ទៀតឬយ៉ាងណា?
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់ ភ្នំពេញ ប៉ុស្តិ៍ កាលពីម្សិលមិញថា នៅចំពោះមុខរាជរដ្ឋាភិបាលនឹងបញ្ចប់ការបើកផ្តល់ប្រាក់ឧបត្តម្ភដល់កម្មករនិយោជិតនៅត្រឹមឆ្នាំ ២០២០ នេះ។ ប៉ុន្តែលោកថា ចំពោះស្ថានភាពជាក់ស្តែងរដ្ឋាភិបាលនឹងពិនិត្យវាយតម្លៃម្តងទៀត នៅខែធ្នូថាតើអាចបន្តផ្តល់ប្រាក់ឧបត្ថម្ភជូនដល់កម្មករនិយោជិតនៅឆ្នាំ ២០២១ ទៀតឬយ៉ាងណា?
លោកបញ្ជាក់ថា៖ «ជាការពិតបច្ចុប្បន្ននេះចំនួនរោងចក្រ និងកម្មករដែលព្យួរកិច្ចសន្យាការងារមានចំនួនតិចជាងកាលពីខែឧសភា មិថុនា កក្កដា និងសីហាច្រើន។ ចំពោះមុខការបើកប្រាក់ឧបត្ថម្ភនេះ គឺនឹងផ្តល់ជូនត្រឹមដំណាច់ឆ្នាំនេះ»។
គិតត្រឹមថ្ងៃទី ២០ ខែ វិច្ឆិកា ឆ្នាំ ២០២០ ក្រសួងការងារបានបើកផ្តល់ប្រាក់ឧបត្ថម្ភដល់កម្មករនិយោជិតចំនួន ៣៨ លើករួចមកហើយ ដោយក្នុងកម្មករម្នាក់ៗអាចទទួលបានប្រាប់ឧបត្ថម្ភចំនួន ៣៨ ដុល្លារ ឬ ៧៦ ដុល្លារអាស្រ័យទៅតាមពេលវេលានៃការព្យួរការងាររបស់កម្មករ។
បើតាមរបាយការណ៍ចុងក្រោយរបស់ក្រសួងការងារ បច្ចុប្បន្នមានរោងចក្រប្រមាណ ៧០ បានបន្តព្យួរការងារកម្មករនិយោជិត ដោយមូលហេតុបណ្តាលមកពីការទទួលរងវិបត្តិពីជំងឺវីដ ១៩។
អ្នកស្រី សុំ សារ៉ន ជាកម្មការិនីរោងចក្រដែលទទួលបានប្រាក់ឧបត្ថម្ភចំនួន ២ លើកពីរដ្ឋាភិបាលនៅពេលអ្នកស្រីត្រូវបានរោងចក្រព្យួរការងារ និយាយថា ប្រាក់ទាំងនេះបានជួយសម្រាលបន្ទុកក្នុងជីវភាពគ្រួសារអ្នកស្រីបានមួយផ្នែក ខណៈដែលគ្មានការងារធ្វើ និងគ្មានចំណូល។ អ្នកស្រីរំពឹងថា រដ្ឋាភិបាលនឹងបន្តជួយឧបត្ថម្ភដល់កម្មករដែលប្រឈមនឹងការអត់ការងារធ្វើ និងគ្មានចំណូលដែលបណ្តាលមកពីរោងចក្របានបិទទ្វារជាបន្តទៀត។
អ្នកស្រីបានបន្តថា៖ «ប្រាក់ទាំងនេះបានជួយសម្រាលការខ្វះខាតរបស់យើងទៅនឹងជីវភាពប្រចាំថ្ងៃ។ ទោះវាមិនបានទាំងស្រុងក៏បាន ៥០ ភាគរយដែរ»។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យ កម្មករកាត់ដេរកម្ពុជាយល់ថា បើសិនជាកម្មករទាំង ៣៣ ម៉ឺននាក់នោះ ពិតជាទទួលបាននូវការជួយឧបត្តម្ភយ៉ាងប្រាកដមែននោះគឺជាការជួយមួយដ៏មានសារៈសំខាន់សម្រាប់កម្មករ ស្របពេលដែលពួកគេ កំពុងប្រឈមនឹងការបាត់បង់ការងារធ្វើ និងគ្មានប្រាក់ចំណូល។
លោករំពឹងថា ក្នុងឆ្នាំ ២០២១ ខាងមុខរដ្ឋាភិបាលគួរតែពិនិត្យលទ្ធភាពបន្តផ្តល់ប្រាក់ឧបត្ថម្ភដល់វិស័យដែលបន្តប៉ះពាល់បន្ថែមទៀត រហូតដល់វិបត្តិនៃជំងឺកូវីដ១៩បានបញ្ចប់ ហើយផលប៉ះពាល់ទាំងអស់បានធូរស្រាលឡើងវិញ។
លោកបន្ថែមថា៖ «បើគិតទៅ ប្រាក់នេះអាចរួមចំណែកបាន ៣០ ភាគរយនៃកម្មករម្នាក់ដែលបានព្យួរការងារដែរ ព្រោះប្រាក់ខែគាត់ ២០០ ដុល្លារ ហើយនៅពេលរោងចក្រព្យួរខាងរោងចក្រផ្តល់ឱ្យ ៤០ ដុល្លារ បូកនឹងការផ្តល់ប្រាក់ឧបត្តម្ភបន្ថែមទៀតពីរដ្ឋាភិបាល។ គួរតែពង្រឹកវិសាលភាពដល់វិស័យដែលប៉ះពាល់បន្ថែមទៀតព្រោះមកដល់ពេលនេះស្ថានភាពរបស់ពួកគាត់ ក៏មិនទាន់ប្រសើរនៅឡើយដែរ ដូចជាវិស័យទេសចរណ៍ មកដល់ពេលនេះយើងនៅតែទទួលបានថា គ្មានការកក់សេវាកម្មរបស់ពួកគាត់»។
សូមជម្រាបថា ក្រៅពីការឧបត្តម្ភសាច់ប្រាក់ដល់កម្មករនេះ ចាប់ពីខែមិថុនា ដល់ខែវិចិ្ឆកា ឆ្នាំ ២០២០ រាជរដ្ឋាភិបាលក៏បានឧបត្ថម្ភជាសាច់ប្រាក់ដល់គ្រួសារប្រជាពលរដ្ឋក្រីក្រ និងងាយរងគ្រោះក្នុងអំឡុងពេលកូវីដ ១៩ បានចំនួន ៦៥៩ ៨៤៥ គ្រួសារ ឬស្មើប្រមាណ ២,៧ លាននាក់ ដោយចំណាយថវិកាសរុប ៥៥៣ ១១៩ ៦៦៤ ០០០ រៀលផងដែរ។
លោក សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទាក៏បានប្រាប់ ភ្នំពេញ ប៉ុស្តិ៍ ដែរថា រដ្ឋាភិបាលក៏កំពុងពិចារណាក្នុងការបន្តការឧបត្ថម្ភសាច់ប្រាក់សម្រាប់គ្រួសារពលរដ្ឋក្រីក្រ និងងាយរងគ្រោះសម្រាប់ឆ្នាំ ២០២១ បន្តទៀត។ លោកថា ការសម្រេចនេះនឹងត្រូវប្រកាសនៅចុងឆ្នាំ ២០២០ នេះ៕