.jpg)
លោកស្រី ប្រាក់ ម៉ានីឡា ត្រូវបានជ្រើសតាំងជាស្ត្រីឆ្នើម។ រូបថត សហការី
ភ្នំពេញៈ លោកស្រី ប្រាក់ ម៉ានីឡា ប្រធានសមាគមគិលានុបដ្ឋាកកម្ពុជា ត្រូវបានជ្រើសតាំងជាស្ត្រីឆ្នើមម្នាក់ក្នុងចំណោមស្ត្រីឆ្នើមជាអ្នកដឹកនាំគិលានុបដ្ឋាក និងឆ្មប ១០០ នាក់ នៅលើពិភពលោកក្នុងឆ្នាំ ២០២០ ដែលជាឆ្នាំអន្តរជាតិនៃគិលានុបដ្ឋាក និងឆ្មប។ លោកស្រីត្រូវបានទទួលស្គាល់ដោយអង្គការ «ស្ត្រីក្នុងសុខាភិបាលសកល» សម្រាប់ការរួមចំណែកដល់សុខភាពសកល។
យោងតាមអង្គការ «ស្ត្រីក្នុងសុខាភិបាលសកល» មានស្ត្រីចំនួនជាង ៣០០ នាក់ ត្រូវបានចុះឈ្មោះដើម្បីទទួលបានការជ្រើសតាំងនេះ ដោយពួកគាត់ត្រូវបំពេញបែបបទតាមអនឡាញផ្អែកលើលក្ខខណ្ឌ ៨ ចំណុច ដែលមានសារៈសំខាន់ក្នុងការធ្វើឱ្យប្រសើរឡើងដល់គិលានុបដ្ឋាក សុខភាព និងភាពជាអ្នកដឹកនាំ។
លោកស្រី ប្រាក់ ម៉ានីឡា គឺជាមនុស្សម្នាក់ក្នុងចំណោម ១០០ នាក់ ដែលត្រូវបានជ្រើសតាំងពីប្រទេសចំនួន ៤៣ ដោយមានការវាយតម្លៃពីតំណាងមកពីអង្គការសុខភាពពិភពលោក (WHO) មូលនិធិអង្គការសហប្រជាជាតិដើម្បីប្រជាជន (UNFPA) និងអង្គការដៃគូចំនួន ៤ ទៀត។
លោកស្រី ប្រាក់ ម៉ានីឡា មានប្រសាសន៍ប្រាប់ ភ្នំពេញ ប៉ុស្តិ៍ ពីថ្ងៃទី ២២ ធ្នូ ថា៖ «ការជ្រើសរើសនេះគឺជាអត្ថន័យលំដាប់ពិភពលោកសម្រាប់ខ្លួនខ្ញុំផ្ទាល់ វិជ្ជាជីវៈថែទាំ និងប្រទេសជាតិរបស់ខ្ញុំ។ ខ្ញុំមានមោទនភាព និងសោមនស្សដែលខ្លួនជាតំណាងឱ្យស្ត្រី និងគិលានុបដ្ឋាកនៅកម្ពុជាហើយបាននាំយកវិជ្ជាជីវៈមួយនេះទៅកាន់ពិភពលោក។ នេះសបញ្ជាក់ថាកម្ពុជាមានសមត្ថភាពចូលទៅកាន់វេទិកាអន្តរជាតិបានយ៉ាងពេញលេញ»។
លោកស្រីបានរៀបរាប់ថា លោកស្រីបានធ្វើកិច្ចការសម្រាប់សេវាសុខាភិបាលនៅប្រទេសកម្ពុជា តាំងពីឆ្នាំ ១៩៩១ មកម្ល៉េះ។ នៅឆ្នាំ ២០១៣ លោកស្រីបានផ្តួចផ្តើម និងដឹកនាំក្នុងការបង្កើតសមាគមគិលានុបដ្ឋាកកម្ពុជារហូតដល់សមាគមនេះត្រូវបានចុះបញ្ជិកាជាមួយក្រសួងមហាផ្ទៃនៅខែកុម្ភៈ ឆ្នាំ ២០១៩។ សមាគមនេះមានការគាំទ្រឱ្យកើតមានឡើងដោយក្រសួងសុខាភិបាល ប្រកាសជាផ្លូវការនៅក្រសួងសុខាភិបាលក្នុងខែឧសភា ឆ្នាំ ២០១៩។
ចាប់តាំងពីខែកក្កដា ឆ្នាំ ២០២០ រហូតដល់បច្ចុប្បន្នលោកស្រីកំពុងបម្រើការជាទីប្រឹក្សាជំនាញនៃការទទួលស្គាល់គុណភាពសេវាសុខាភិបាលរបស់ទីភ្នាក់ងារគម្រោងលើកកម្ពស់គុណភាពសេវាថែទាំសុខភាព (EQHA) របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) តាមរយៈអង្គការ FHI360។
លោកស្រីបន្តថា ពីឆ្នាំ ១៩៩៩ ដល់ខែមិថុនា ឆ្នាំ ២០២០ លោកស្រីបានបម្រើការនៅមន្ទីរពេទ្យកុមារអង្គរក្នុងគម្រោងសំខាន់ៗ និងទទួលខុសត្រូវក្នុងកម្មវិធីសង្គ្រោះទារកដែលជាគម្រោងសុខភាពសហគមន៍មួយអនុវត្តនៅខេត្តព្រះវិហារ។ សព្វថ្ងៃនេះលោកស្រីជាប្រធានក្រុមប្រឹក្សាភិបាលរបស់មន្ទីរពេទ្យកុមារអង្គរ។
បន្ថែមពីលើនេះ លោកស្រីបានចូលរួមជាច្រើនជាមួយក្រសួងសុខាភិបាលក្នុងការអភិវឌ្ឍស្តង់ដានៃការអនុវត្តសម្រាប់គិលានុបដ្ឋាក (២០១៥) ក្រមសីលធម៌សម្រាប់គិលានុបដ្ឋាក (២០១៣) គោលការណ៍ណែនាំស្តីពីរបៀបថែទាំ និងពិធីសារថែទាំរបស់គិលានុបដ្ឋាក និងឆ្មបក្នុងប្រទេសកម្ពុជា (២០១២)។
សព្វថ្ងៃនេះលោកស្រីកំពុងដឹកនាំសមាគមគិលានុបដ្ឋាកកម្ពុជា ដោយផ្តល់ការបណ្តុះបណ្តាលដល់គិលានុបដ្ឋាកទាំងអ្នកដែលបម្រើការនៅស្ថាប័នរដ្ឋ និងឯកជនតាមអនឡាញដើម្បីអភិវឌ្ឍវិជ្ជាជីវៈបន្ត។ ចាប់ពីខែកញ្ញា ឆ្នាំ ២០២០ លោកស្រីកំពុងទទួលបានអាហារូបករណ៍ពីក្រុមប្រឹក្សាគិលានុបដ្ឋាកអន្តរជាតិនៅទីក្រុងហ្សឺណែវប្រទេសស្វ៊ីស។
លោកស្រីក៏កំពុងធ្វើការជាមួយក្រសួងសុខាភិបាលតាមរយៈគម្រោងលើកកម្ពស់គុណភាពសេវាថែទាំសុខភាព (EQHA) របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) ដោយគម្រោងនេះ ធ្វើការលើការបង្កើតឱ្យមានប្រព័ន្ធទទួលស្គាល់គុណភាពសេវាសុខាភិបាល។
លោកស្រីមានប្រសាសន៍ថា៖ «តាមរយៈកិច្ចការទាំងអស់នេះធ្វើឱ្យខ្ញុំមានឱកាសចូលប្រឡូកក្នុងឆាកអន្តរជាតិជាច្រើនដង ដើម្បីសិក្សារៀនសូត្រពីគេផង និងបង្ហាញសមត្ថភាពក្នុងនាមជាស្ត្រីខ្មែរ និងជាគិលានុបដ្ឋាកខ្មែរម្នាក់តំណាងឱ្យស្ត្រីខ្មែរដទៃទៀត និងគិលានុបដ្ឋាកកម្ពុជា។ ខ្ញុំត្រូវបានស្ថាប័នគិលានុបដ្ឋាកអន្តរជាតិអញ្ជើញឱ្យធ្វើបទបង្ហាញក្នុងសិក្ខាសាលារបស់គេ និងត្រូវបានអញ្ជើញឱ្យចូលរួមសន្និសីទអន្តរជាតិធំៗរបស់គិលានុបដ្ឋាកជាច្រើនដង»៕
