ភ្នំពេញៈ ខណៈអាជ្ញាធរកម្ពុជាកំពុងស្វែងរកចាប់ខ្លួន បន្ទាប់ពីរងការព្រមានផ្ទួនៗពីលោកនាយករដ្ឋមន្ត្រី ហ៊ុន សែន អ្នកវិភាគនយោបាយលោក គឹម សុខ ដែលជាអ្នករិះគន់រដ្ឋាភិបាលកម្ពុជាឥតសំចៃមាត់ដែលនៅពេលនេះកំពុងស្វែងរកសិទ្ធិជ្រកកោននៅប្រទេសទី ៣ បានអះអាងថាលោក ហ៊ុន សែន បាន «បរាជ័យ» ក្នុងការទាក់ទាញរូបលោកឲ្យចូលរួមជាមួយជាអ្វីដែលមន្ត្រីបក្សកាន់អំណាចច្រានចោល។
កាលពីសប្ដាហ៍មុនសាលាដំបូងរាជធានីភ្នំពេញបានបង្គាប់ឲ្យចាប់ខ្លួនលោក គឹម សុខ បន្ទាប់ពីលោកបានគេចវេះមិនព្រមចូលបំភ្លឺនៅតុលាការកាលពីថ្ងៃទី ១៤ ខែកញ្ញាឆ្នាំ ២០១៨ តាមការកោះហៅរបស់តុលាការ។
លោកត្រូវបានតុលាការផ្តន្ទាទោស ២ ករណីផ្សេងគ្នាកាលពីឆ្នាំ ២០១៧ ពីបទ «ញុះញង់ឲ្យប្រព្រឹត្តបទល្មើសជាអាទិ៍ និងបទបរិហារកេរ្តិ៍ជាសាធារណៈ» ដាក់ពន្ធនាគាររយៈពេល ១៨ ខែ ពិន័យ ៨ លានរៀល និងត្រូវសងសំណងទៅលោកនាយករដ្ឋមន្ត្រី ហ៊ុនសែន ចំនួន ៨០០ លានរៀល (ប្រហែល ២០ ម៉ឺនដុល្លារ)។
បន្ទាប់ពីបានអនុវត្តទោសជាប់ពន្ធនាគាររយៈពេល ១៨ ខែរួចមកលោកនៅតែបន្តរិះគន់រដ្ឋាភិបាលលោក ហ៊ុន សែន ថាជា «និតីមាត់» រហូតដល់លោកនាយករដ្ឋមន្ត្រីបញ្ជាឲ្យមេធាវីតាមទារសំណងឈ្នះក្ដីចំនួន ២០ ម៉ឺនដុល្លារជាអ្វីដែលលោក គឹម សុខ ថា លោកគ្មានលុយច្រើនបែបនេះសងទៅលោក ហ៊ុន សែន ទេ។
ថ្លែងប្រាប់ភ្នំពេញប៉ុស្តិ៍ពីទីមានសុវត្ថិភាពលោក គឹម សុខ អះអាងថាលោក ហ៊ុន សែន បានព្យាយាមទាក់ទាញរូបលោកឲ្យចូលរួមជាមួយអស់ជាច្រើនឆ្នាំមកហើយ ប៉ុន្តែត្រូវបានលោកបដិសេធ។
លោកថ្លែងថា៖ «ខ្ញុំដឹងថាលោក ហ៊ុន សែន មិនលើកលែងឲ្យខ្ញុំទេ ទោះគាត់ត្រូវចំណាយប៉ុនណា ព្រោះគាត់បរាជ័យម្តងហើយម្តងទៀតអស់រយ:ពេល ១២ ឆ្នាំមកហើយក្នុងការទាក់ទាញខ្ញុំឲ្យចូលរួមជាមួយគាត់។ យ៉ាងណាខ្ញុំត្រូវប្រឹងប្រែងរកសេរីភាពសិនក្នុងកាល:ទេស:នេះព្រោះនៅមានការងារប្រជាធិបតេយ្យត្រូវធ្វើចំពោះមុខច្រើនណាស់ ហើយការប្រឹងប្រែងរបស់ខ្ញុំក៏គឺជាការសាកល្បងមួយរវាងកម្លាំងអន្តរាគមន៍របស់សហគមន៍អន្តរជាតិ និងកម្លាំងបំពានអំណាចរបស់ក្រុមលោក ហ៊ុន សែន ដែរ»។
លោកបន្តថាតុលាការបានចេញដីកាចាប់រូបលោកដោយបំពានច្បាប់ ព្រោះតែប្រញាប់ផ្គាប់ចិត្តលោកនាយករដ្ឋមន្ត្រី។ លោកបានសង្កត់ធ្ងន់ថា៖ «យ៉ាងណា ខ្ញុំនឹងដើរចូលគុកដោយខ្លួនឯង ទោះត្រូវប្រឈមនឹងគ្រោះថ្នាក់ក្នុងគុកក៏ដោយ បើលោក ហ៊ុន សែន យល់ព្រមតែ ២ ចំណុចដ៏ងាយបំផុតរបស់ខ្ញុំទី ១ ព្រមសន្យាការពារសុវត្ថិភាពកូនស្រីតូចរបស់ខ្ញុំក្នុងនាមគាត់ជាមេផុតលេខនៃអាជ្ញាធរខ្មែរ និងទី ២ ហ៊ានឡើងសវនាការតតាំងគ្នាដោយផ្ទាល់ក្នុងនាមគាត់ជាដើមបណ្តឹង»។
ទោះបីយ៉ាងណាលោក សុខ ថ្លែងថាលោកគ្មានជំនឿចំពោះប្រព័ន្ធយុត្តិធម៌នៅក្នុងប្រទេសកម្ពុជាឡើយ ដោយលោកចាត់ទុកថាជា «សេនាធិការនយោបាយ» ដើម្បីជួយលោក ហ៊ុន សែន ឲ្យទទួលបានជោគជ័យ និងអំណាចប៉ុណ្ណោះ។
បន្ថែមលើនេះលោក សុខ ថាលោកពិតជាបង្ខំចិត្តស្វែងរកសិទ្ធិជ្រកកោនផ្នែកនយោបាយនៅប្រទេសទី ៣ ដើម្បីបន្តការងារលើកកម្ពស់លទ្ធិប្រជាធិបតេយ្យ និងយុត្តិធម៌សង្គម។
លោកថ្លែងថា៖ «គោលដៅសំខាន់គឺការស្វែងរកសេរីភាពដើម្បីអាចបន្តការងារទៀត ហើយកាល:ទេស:នេះដើម្បីមានសេរីភាពពីការប៉ុនប៉ងបំផ្លាញរបស់លោក ហ៊ុន សែន នោះខ្ញុំត្រូវតែបង្ខំចិត្តស្វែងរកសិទ្ធិជ្រកកោនសិន»។
ប៉ុន្តែលោក សុខ ឥសាន អ្នកនាំពាក្យគណបក្សកាន់អំណាចបានច្រានចោលការចោទប្រកាន់របស់លោក កឹម សុខ ដែលថាប្រមុខដឹកនាំគណបក្សប្រជាជនបានបរាជ័យក្នុងការទាក់ទាញរូបលោកឲ្យចូលរួមជាមួយនោះ។
លោកថ្លែងថា៖ «គណបក្សប្រជាជនសម្បូរធនធានមនុស្ស ដូច្នេះមិនត្រូវការជនណាអីទេ កុំថាឡើយ គឹម សុខ អ្នកដទៃទៀតដែលមានឆន្ទៈនយោបាយផ្សេងពីយើង ក៏យើងមិនត្រូវការដែរ។ គណបក្សប្រជាជនមានអាយុយូរឆ្នាំហើយរាប់ទសវត្សរ៍មកហើយ រឿងអីទៅខ្វះធនធានមនុស្សដើម្បីធ្វើការងារបម្រើជាតិ និងប្រជាជន»។ លោកថា៖ «ការអនុវត្តផ្ទុយពីគោលការណ៍ច្បាប់ រំលោភច្បាប់ ប៉ះពាល់ដល់សិទ្ធិអ្នកដទៃអាហ្នឹងគាត់ត្រូវតែទទួលខុសត្រូវចំពោះមុខច្បាប់»។
លោក សុខ ឥសាន ក៏បានច្រានចោលការដាក់លក្ខខណ្ឌនានារបស់លោក គឹម សុខ ដោយលោកលើកឡើងថាអ្នកវិភាគនយោបាយរូបនេះគ្រាន់តែជាជនជាប់ចោទម្នាក់ប៉ុណ្ណោះ។ លោកសង្កត់ធ្ងន់ថា៖ «គាត់គ្មានសិទ្ធិអ្វីទាំងអស់ក្នុងការដាក់លក្ខខណ្ឌដល់ដើមបណ្ដឹងទេ។ គាត់ជាជនជាប់ចោទ គាត់ត្រូវទៅតវ៉ាជាមួយតុលាការទើបជារឿងត្រឹមត្រូវ»។
ចំណែកលោក ផៃ ស៊ីផាន អ្នកនាំពាក្យទីស្ដីការគណរដ្ឋមន្ត្រីឆ្លើយតបថា ការបរិហាររបស់លោក គឹម សុខ គ្រាន់តែជាការខិតខំប្រឹងប្រែងដើម្បីទទួលបានសិទ្ធិជ្រកកោនផ្នែកនយោបាយតែប៉ុណ្ណោះ។
លោកថ្លែងថា៖ «ការប្រឹងប្រែងបរិហាររបស់គាត់គឺគាត់ចង់បានទៅប្រទេសទី ៣ ដែលជាទិសដៅរបស់គាត់ ម្ល៉ោះហើយគាត់និយាយវាផុតពីលក្ខណៈថ្លៃថ្នូរនៃប្រជាពលរដ្ឋមួយហើយ។ គាត់និយាយក្អេងក្អាង អ្វីដែលចង់បានមកពីរាជរដ្ឋាភិបាលគឺភាពអវិជ្ជមានដែលគេអាចមានសិទ្ធិជ្រកកោននៅប្រទេសទី ៣។ អានេះជាទិសដៅរបស់គាត់មិនមែនជាទិសដៅនៅក្នុងការងារ ស្រឡាញ់ប្រជាពលរដ្ឋទេ»។ លោកបន្តថា៖ «យើងដឹងហើយសម្ដេចតេជោ (ហ៊ុន សែន) តែងតែមានប្រសាសន៍ថា ជេរ ហ៊ុន សែន ខ្លាំង។ ប្រឆាំងរាជរដ្ឋាភិបាលគឺមានមុខ មានមាត់ គឺគេទទួលបានសិទ្ធិជ្រកកោននៅខាងក្រៅ»។
យ៉ាងណាក្តីលោក Phil Robertson នាយករងអង្គការឃ្លាំមើលសិទ្ធិមនុស្សអន្តរជាតិ Human Rights Watch ប្រចាំតំបន់អាស៊ីថ្លែងថា៖ «លោកនាយករដ្ឋមន្ត្រី ហ៊ុន សែន កំពុងព្យាយាមចាប់លោក គឹម សុខ ដាក់ពន្ធនាគារម្តងទៀតលើការចោទប្រកាន់ក្លែងក្លាយបន្ថែម ពីព្រោះគាត់មានគោលបំណងដាក់ទោសនរណាដែលហ៊ានបំពានចំពោះរូបគាត់។ ទាំងអស់នេះគឺលោក ហ៊ុន សែន ចង់ធ្វើឱ្យមនុស្សមានអារម្មណ៍ភ័យខ្លាចដើម្បីកុំឲ្យពួកគេហ៊ានបើកមាត់របស់ពួកគេចោទសួរពីអ្វីទាំងអស់»។
លោកបានថ្លែងបន្ថែមថា៖ «វាគឺជាឥរិយាបថមួយនៃការរំលោភសិទ្ធិមនុស្សយ៉ាងពិតប្រាកដពីអ្នកផ្ដាច់ការ។ អ្នកការទូត និងមន្ត្រីអង្គការសហប្រជាជាតិ នៅទីក្រុងភ្នំពេញ និងនៅក្រៅប្រទេស គួរតែទាមទារឱ្យលោក ហ៊ុន សែន ទម្លាក់ការចោទប្រកាន់ហើយរៀនអំពីសិល្បៈនៃការស្តាប់ជាជាងការចាប់អ្នករិះគន់ដាក់ពន្ធនាគារ»៕ NS