ក្រចេះ/កំពង់ឆ្នាំងៈ សត្វគោ-ក្របី ចំនួន ១៦ ក្បាល នៅក្នុងខេត្តចំនួន ២ គឺខេត្តកំពង់ឆ្នាំង និងខេត្តក្រចេះបានឈឺងាប់ជាបន្តបន្ទាប់ក្នុងរយៈពេល ២ សប្ដាហ៍កន្លងមកនេះ ដែលមន្ត្រីបសុសត្វនៃខេត្តទាំង ២ បានអះអាងថា សត្វគោ-ក្របី ទាំងនោះងាប់ ដោយសារកើតជំងឺ អុតក្ដាម និងជំងឺសាទឹក។
លោក កេត សារឿន ប្រធានការិយាល័យបសុសត្វ ខេត្តក្រចេះប្រាប់ភ្នំពេញប៉ុស្តិ៍នៅថ្ងៃទី ២ ខែមីនា ឆ្នាំ ២០២១ ថា បន្ទាប់ពីមានសេចក្ដីរាយការណ៍ពីប្រជាពលរដ្ឋដែលរស់នៅក្នុងឃុំកំពង់ចាម ស្រុកសំបូរអំពីករណីសត្វគោ-ក្របី ឈឺងាប់ជាបន្តបន្ទាប់នោះ លោកបានឱ្យភ្នាក់ងារពេទ្យសត្វភូមិ ចុះធ្វើការស្រាវជ្រាវរកមូលហេតុ ដើម្បីអន្តរាគមន៍ជួយព្យាបាលគោ-ក្របីជូនពលរដ្ឋ។
លោកថ្លែងថា៖ «តាមរយៈលទ្ធផលនៃការចុះស្រាវជ្រាវរបស់ភ្នាក់ងារពេទ្យសត្វយើង ករណីសត្វគោ ក្របី ឈឺងាប់ដោយសារកើតជំងឺអុតក្ដាម និងជំងឺសាទឹក»។
បើតាមលោក សារឿន ជំងឺអុតក្ដាម និងជំងឺសាទឹកអាចបណ្ដាលឱ្យសត្វគោ ក្របីងាប់បាន ប្រសិនបើមិនមានការថែទាំ ផ្ដល់ចំណីអាហារ និងទឹកឱ្យបានគ្រប់គ្រាន់ និងចាក់ថ្នាំបង្ការជាមុននោះទេ។ តាមរយៈការចុះសាកសួរប្រមូលព័ត៌មានពីម្ចាស់សត្វគោ ក្របី និងការធ្វើរោគវិនិច្ឆ័យទៅលើសត្វគោ ក្របីដែលងាប់នៅក្នុងតំបន់នោះ ភាគច្រើនមានជំងឺរលាកមាត់ ឬដំបៅមាត់ និងក្រចកជើង ដែលជារោគសញ្ញានៃជំងឺអុតក្ដាម ខណៈខ្មោចគោ-ក្របីមួយចំនួនទៀតមានរោគសញ្ញាហើមពោះ និងរឹងផ្នែកក ដែលជារោគសញ្ញានៃជំងឺសាទឹក ដោយសារពួកវាត្រូវបានលែងចោលនៅក្នុងព្រៃ ឱ្យដើររកស៊ីចំណីអាហារដោយខ្លួនឯង ដោយមិនបាននាំយកមកចាក់ថ្នាំបង្ការ។
លោកបន្ថែមថា កាលពីរសៀលថ្ងៃទី ២៦ ខែកុម្ភៈ ឆ្នាំ ២០២១ មានសត្វគោចំនួន ៨ ក្បាល បានងាប់នៅក្បែរស្រះទឹកមួយស្ថិតក្នុងចម្ការស្វាយចន្ទីមួយកន្លែងនៅចំណុចអូរតាគុច ភូមិយាវ ឃុំកំពង់ចាម ស្រុកសំបូរ។ ខ្មោចសត្វទាំងនោះមានសភាពជាំខ្មៅក្រចកជើង និងមានដំបៅពងបែកពេញនៅក្នុងមាត់ ហើយខ្លះទៀតមានសភាពហើមពោះខុសប្រក្រតី។ ករណីដូចគ្នានេះ ត្រូវបានរកឃើញមានតាំងពីថ្ងៃទី ១៧ ខែកុម្ភៈ។
លោក យឿន ពិនា អាយុ ៣០ ឆ្នាំ ជាកសិករនៅភូមិយាវ ឃុំកំពង់ចាម ស្រុកសំបូរ ដែលមានគោបានឈឺងាប់អស់ ២ ក្បាលប្រាប់ភ្នំពេញប៉ុស្តិ៍ថា កាលពីពាក់កណ្ដាលឆ្នាំ ២០១៩ គាត់បានយកគោរបស់គាត់ទៅចាក់ថ្នាំបង្ការជំងឺសាទឹក និងជំងឺអុតក្ដាមម្ដងរួចមកហើយ។ លោកថា៖ «ខ្ញុំមិនដឹងថា ពួកវាអាចឆ្លងជំងឺអុតក្ដាម និងជំងឺសាទឹកនេះពីហ្វូងគោរបស់អ្នកភូមិដែលមានជំងឺនេះនោះទេ ព្រោះខ្ញុំបានយកវាទៅចាក់ថ្នាំបង្ការជំងឺទាំង ២ នេះរួចមកហើយ»។
យោងតាមទិន្នន័យដែលទទួលបានពីការិយាល័យបសុសត្វខេត្តក្រចេះ សត្វគោ-ក្របីប្រមាណ ៦ ម៉ឺនក្បាលក្នុងចំណោមគោ ក្របី សរុបជិត ១០ ម៉ឺនក្បាល នៅទូទាំងខេត្តនេះទទួលបានការចាក់ថ្នាំបង្ការជំងឺទាំង ២ ប្រភេទនេះជារៀងរាល់ឆ្នាំ។ ការចាក់ថ្នាំបង្ការជំងឺនេះគឺមិនមានការបង់កម្រៃនោះទេ។
ដោយឡែកនៅឯខេត្តកំពង់ឆ្នាំងក៏មានករណីសត្វគោ ក្របីឈឺងាប់ជាបន្តបន្ទាប់ផងដែរ។
លោក ក្រឹង សំអាត ប្រធានការិយាល័យបសុសត្វខេត្តកំពង់ឆ្នាំងថ្លែងកាលពីថ្ងៃទី ២ ខែមីនាថា កាលពីថ្ងៃទី ១៧ ខែកុម្ភៈ កន្លងទៅនេះមានសត្វគោក្របីជំទង់ៗ និងកូនគោជាច្រើនក្បាលរបស់ប្រជាពលរដ្ឋនៅក្នុងភូមិព្រៃសំពៅ, ភូមិសិអង ឃុំប្រស្និប និងភូមិស្តុកកប្បាស ឃុំបន្ទាយព្រាល ស្រុករលាប្អៀរបានឈឺ និងងាប់ជាបន្តបន្ទាប់សរុបប្រមាណ ១៣ ក្បាលក្នុងនោះមានក្របី ៥ ក្បាល និងគោ ៨ ក្បាល។
លោកថា៖ «តាមការចុះពិនិត្យជាក់ស្ដែង សត្វគោ-ក្របីដែលងាប់ទាំងនោះ គឺបណ្ដាលមកពីជំងឺអុតក្ដាម និង ជំងឺសាទឹក ព្រោះក្រៅពីមានដំបៅពងបែកនៅក្នុងមាត់ និងដំបៅក្រចកជើង គឺហើមពោះ និងរឹងកញ្ចឹងក»។
បើតាមលោក ក្រឹង សំអាត សត្វគោ ក្របី នៅទូទាំងខេត្តកំពង់ឆ្នាំងមានចំនួនសរុប ២០ ម៉ឺនក្បាល ប៉ុន្តែថ្នាំបង្ការដែលត្រូវបានផ្ដល់សម្រាប់ចាក់ឱ្យគោ ក្របីមានតែចំនួន ៧ ម៉ឺនក្បាលប៉ុណ្ណោះក្នុង ១ ឆ្នាំដោយសារថ្នាំបង្ការនៃជំងឺទាំង ២ ប្រភេទនេះមានកំណត់ ជាពិសេសថ្នាំបង្ការជំងឺអុតក្ដាម៕