The Phnom Penh Post Search

Search form




Logo of Phnom Penh Post newspaper Phnom Penh Post - គ្មាន​ការ​ព្រម​ព្រៀង​ លើ​តម្លៃ​ផ្ទះ​នៅ ប៊ុលឌិង នឹង​បន្ត​ពិភាក្សា​ទៀត

គ្មាន​ការ​ព្រម​ព្រៀង​ លើ​តម្លៃ​ផ្ទះ​នៅ ប៊ុលឌិង នឹង​បន្ត​ពិភាក្សា​ទៀត

Content image - Phnom Penh Post
ផ្ទះ​នៅ​ប៊ុលឌិងមិន​ទាន់​ត្រូវ​គ្នាលើ​តម្លៃ​ ត្រូវលើក​ពេល​ពិភាក្សា​បន្ត​ទៀត​។ ហុង មិនា

គ្មាន​ការ​ព្រម​ព្រៀង​ លើ​តម្លៃ​ផ្ទះ​នៅ ប៊ុលឌិង នឹង​បន្ត​ពិភាក្សា​ទៀត

ភ្នំពេញ: ការ​បន្ត​ពិភាក្សា​គ្នា​ពី​តម្លៃ​ផ្ទះ​គិត​ជា​ម៉ែត្រ ការ៉េ​ រវាង​អ្នក​រស់​នៅ​អគារ ប៊ុលឌិង កាល​ពី​សប្តាហ៍​មុន​ជាមួយ​រដ្ឋ​មន្រ្តី​ក្រសួង​រៀបចំ​ដែនដី នគរូបនីយកម្ម និង សំណង់ លោក ជា សុផារ៉ា មិន​ទទួល​បាន​ការ​ព្រម​ព្រៀង​គ្នា​នោះ​ទេ ខណៈ​ដែល​អ្នក​ពិគ្រោះ យោបល់​ផ្នែក​សេដ្ឋកិច្ច​ យល់​ឃើញ​ថា គួរ​តែ​ឲ្យ​តម្លៃ​ខុស​គ្នា​រវាង​ផ្ទះ​ជាន់​ដី និង​ជាន់​លើ។

ទីប្រឹក្សា​ជាន់​ខ្ពស់​ផ្នែក​ សេដ្ឋកិច្ច​និង​អភិវឌ្ឍន៍​នៃ​ក្រុមហ៊ុន​ពិគ្រោះ យោបល់ EMC លោក ង៉ែត ជូ បាន​បង្ហាញ​ឲ្យ​ឃើញ​ថា តម្លៃ​ផ្ទះ​គិត​ជា​ម៉ែត្រ​ការ៉េ​សម្រាប់​អគារ​ប៊ុលឌិង​ស​ជាន់​ទី ១ ជាន់​ទី ២ និង​ទី ៣ គឺ​សមរម្យ​ដែល​តម្លៃ​រដ្ឋ​មន្រ្តី​ដាក់​ឲ្យ​ចរចា​ ប៉ុន្តែ​សម្រាប់​អ្នក​ជាន់​ផ្ទាល់​ដី​អាច​នឹង​មាន​តម្លៃ​លើស​ពី​នេះ​ គឺ​ពី ៤ ០០០ ដុល្លារ​ទៅ ៥ ០០០ ដុល្លារ​ក្នុង​មួយ​ការ៉េ​សម្រាប់​ជាន់​ផ្ទាល់​ដី។

លោក​ថ្លែង​ថា៖ «តម្លៃ​គឺ​សមរម្យ​ហើយ​សម្រាប់​អ្នក​ជាន់​ទី ១ ទី ២ ទី ៣ តែ​សម្រាប់​ផ្ទាល់​ដី​គឺ​គួរ​លើស​នេះ ព្រោះ​តំបន់​អគារ​ ប៊ុលឌិង ស​ជា​តំបន់​ថ្លៃ​ជាង​គេ​ក្នុង​ក្រុង»។

កាល​ពី​ថ្ងៃទី ៧ ខែ មេសា លោក ជា សុផារ៉ា បាន​អញ្ជើញ​ជា​អធិបតី​ក្នុង​កិច្ច​ពិគ្រោះ​យោបល់​ជា​សាធារណៈ​នៅ​ទី​ស្តីការ​ក្រសួង ដើម្បី​ពិភាក្សា​រក​ដំណោះ​ស្រាយ​សមស្រប​ជូន​បង​ប្អូន​ប្រជាពលរដ្ឋ​ចំនួន ៤៩៣ គ្រួសារ​ដែល​រស់​នៅ​ក្នុង​អគារ ប៊ុលឌិង សង្កាត់ ទន្លេ​បាសាក់ ខណ្ឌ ចំការមន រាជធានី ភ្នំពេញ។ ក្រសួង​បាន​ដាក់​តម្លៃ​ចរចា​ជាមួយ​ក្រុមហ៊ុន​ពី ១២៦៣ ដុល្លារ​សហរដ្ឋ​អាមេរិក​ក្នុង​មួយ​ម៉ែត្រ​ការ៉េ​ឬ​អាច​លើស​ ៥០ ដុល្លារ​ទៀត។

លោក​ថ្លែងថា៖ «ក្រុមហ៊ុន​អាច​ឲ្យ​ក្នុង​តម្លៃ​ចន្លោះ​ពី ១២៦៣ ដុល្លារ និង​ ១៣៥០ ដុល្លារ​ក្នុង​មួយ​ម៉ែត្រ​ការ៉េ អ៊ីចឹង​បង​ប្អូន​ដែល​មាន​ទំហំ ៤៧,៥ ម៉ែត្រ​ការ៉េ​អាច​ទទួល​បាន​ជាង ៦ ម៉ឺន​ដុល្លារ​ទាល់​តែ​ព្រម ១០០% ទើប​ក្រសួង​ធ្វើ​ការ​អភិវឌ្ឍ ព្រោះ​មិន​អាច​អភិវឌ្ឍ​អគារ​ធ្វើ​ឡើង​ហើយ​មួយ​គ្រួសារ​មិន​ព្រម​នោះ​ទេ»។

ក្នុង​កិច្ច​ប្រជុំ​នោះ​ក៏​បាន​ជំរុញ​ឲ្យ​អ្នក​ភូមិ​បោះឆ្នោត​ជូន​ចៅ​សង្កាត់​ ទន្លេ​បាសាក់ ដែល​មក​ពី​គណបក្ស​ប្រជាជន​ សម្រាប់​ការ​បោះឆ្នោត​នា​ពេល​ខាង​មុខ ដើម្បី​និរន្តរ​ភាព​ឯកសារ​និង​ដំណោះ​ស្រាយ។

យ៉ាង​ណា​ក៏​ដោយ​ការ​ជួប​ពិភាក្សា​គ្នា​រវាង​រដ្ឋ​មន្រ្តី​ក្រសួង​ដែនដី និង​ប្រជាពលរដ្ឋ​បញ្ចប់​ទៅ​ដោយ​មិន​ទាន់​ត្រូវ​គំនិត​គ្នា​លើ​តម្លៃ​នោះ​ទេ​ហើយ​ក្រសួង​នឹង​ពិភាក្សា​ជាមួយ​ភាគី​ក្រុមហ៊ុន​ម្តង​ទៀត។

លោកស្រី ឌី សុផាន់ណារ៉ាម៉ានី ជា​ប្រជាពលរដ្ឋ​រស់​នៅ​ ប៊ុលឌិងស បាន​ឲ្យ​ដឹង​ថា ពលរដ្ឋ​បាន​ដាក់​តម្លៃ​ជាង ២០០០ ដុល្លារ​ក្នុង​មួយ​ម៉ែត្រ​ការ៉េ ទើប​ពួក​គាត់​ព្រម​លក់។

លោកស្រី​បាន​ថ្លែង​ថា ប្រជាពលរដ្ឋ​សំណូម​ពរ​ដល់​រដ្ឋ​មន្រ្តី​ក្រសួង​ដែនដី​ជួយ​ពិភាក្សា​បន្ត​ទៅ​ក្រុមហ៊ុន ដើម្បី​ដាក់​តម្លៃ​ណា​ដែល​ភាគី​ទាំង​ពីរ​អាច​ទទួល​យក​បាន។

លោកស្រី បាន​និយាយ​ថា៖ «ខ្ញុំ​រស់​នៅ​ទីនេះ​ជិត ៣០ ឆ្នាំ​វា​ដូច​ភូមិ​កំណើត​ខ្ញុំ​អ៊ីចឹង ហើយ​មិន​ចង់​ចេញ​ទៅ​ទាំង​ទឹក​ភ្នែក​ដោយ​យក​លុយ​ទិញ​ផ្ទះ​ផ្សេង​មិន​បាន​នោះ​ទេ។ ចង់​ចេញ​ទៅ​ដោយ​ស្នាម​ញញឹម»។

ចំណែក​ អ្នក​ភូមិ​ម្នាក់​ទៀត ឈ្មោះ កុល សុវ៉ាន់ អាយុ ៦២ ឆ្នាំ បាន​ឲ្យ​ដឹង​ថា បើ​ផ្ទះ​អ្នក​ខ្លះ​ទំហំ ៣០ ម៉ែត្រ​ការ៉េ​អ៊ីចឹង​លុយ​ទទួល​បាន​ ៤ ម៉ឺន​ដុល្លារ​គឺ​មិន​អាច​ទៅ​ទិញ​ផ្ទះ​ថ្មី​បាន​ទេ ហើយ​បើ​ទិញ​បាន​គឺ​នៅ​ជាយ​ក្រុង។

ស្រីរូប​នោះ​និយាយ​ថា៖ «ខ្ញុំ​លក់ ៩ ម៉ឺន​ដុល្លារ ព្រោះ​តំបន់​នេះ​គឺ​តំបន់​ខ្លាញ់ ព្រោះ​យើង​ចង់​លក់​ហើយ​អាច​ទៅ​ទិញ​ផ្ទះ​ថ្មី​បាន​ព្រោះ ផ្ទះ​ឥឡូវ​ថ្លៃៗ​ណាស់​ហើយ​ឆ្ងាយ​ក្រុង​ទៀត»។

ការ​សិក្សា​រវាង​ក្រសួង​រៀបចំ ដែនដី នគរូបនីយកម្ម និង សំណង់ ជាមួយ​ក្រុមហ៊ុន ជប៉ុន Arakawa គឺ​គ្រោង​ចំណាយ​ថវិកា​ប្រមាណ ៧០-៨០ លាន​ដុល្លារ​សហរដ្ឋ​អាមេរិក រួម​មាន​ការ​សាង​សង់​ទីតាំង​ស្នាក់​នៅ​បណ្តោះ​អាសន្ន និង​អគារ​ថ្មី​មាន​កម្ពស់ ២១ ជាន់​ដែល​ក្នុង​នោះ​ត្រៀម​ធ្វើ​ទីតាំង​ចំណត ៣ ជាន់​កន្លែង​លក់​ដូរ ១ ជាន់ និង កន្លែង​ស្នាក់​នៅ ៥ ជាន់ ដែល​បន្ទប់​ស្នាក់​នៅ​នីមួយៗ មាន​ទំហំ​ធំ​ជាង​មុន​ ១០ ភាគរយ ហើយ​ចាប់​ពី​ជាន់​ទី ៩ ឡើង​ទៅ នឹង​ផ្តល់​ជា​កម្មសិទ្ធិ​វិនិយោគ​របស់​ក្រុមហ៊ុន​ ជប៉ុន Arakawa៕

អត្ថបទគួរចាប់អារម្មណ៍