បាត់ដំបងៈ គ្រាប់កាំភ្លើងធំប្រភេទ ១០៥ ម.ម ចំនួន ៥៨ គ្រាប់ ត្រូវបានកម្លាំងអង្គភាពកំចាត់មីនស៊ីម៉ាក់ជួយអន្តរាគមន៍យកចេញពីក្នុងរណ្ដៅដីនៃចម្ការពោត ១ កន្លែង ដែលមានទីតាំងស្ថិតនៅក្នុងភូមិលំផាត់ ឃុំអូរដា ស្រុកកំរៀងកាលពីរសៀលថ្ងៃទី ២២ ខែមេសា។
លោក គឹម ពន្លក អធិការស្រុកកំរៀងបានប្រាប់ភ្នំពេញប៉ុស្តិ៍នៅថ្ងៃព្រហស្បតិ៍ថា នៅវេលាម៉ោង ១០ ព្រឹកថ្ងៃទី ២២ ខែមេសា ឆ្នាំ ២០២០ មានពលរដ្ឋម្នាក់ឈ្មោះ ឈុន ហឿប អាយុ ៦៦ ឆ្នាំ មានលំនៅភូមិលំផាត់ ឃុំអូរដា បានរាយការណ៍ប្រាប់លោកឲ្យជួយអន្តរាគមន៍ទៅមន្ត្រីជំនាញស៊ីម៉ាក់ ដើម្បីមកជួយពិនិត្យ និងជីកយកក្បាលគ្រាប់កាំភ្លើងធំមួយរណ្ដៅនៅក្នុងចម្ការពោតរបស់គាត់។
លោកបញ្ជាក់ថា៖ «នៅលើទីតាំងចម្ការនោះ សមត្ថកិច្ចយើងពិនិត្យឃើញមានក្បាលគ្រាប់កាំភ្លើងធំប្រភេទ ១០៥ ម.ម ចំនួន ៣ បានហើបចេញពីក្នុងដីតាមអាចម៍បំណះផាលនង្គ័លត្រាក់ទ័រ។ នៅក្បែរនោះមន្ត្រីជំនាញបានរកឃើញក្បាលគ្រាប់កាំភ្លើងនេះ ១ រណ្ដៅថែមទៀតធ្វើឲ្យចំនួនក្បាលគ្រាប់ដែលបានរកឃើញនៅក្នុងដីចម្ការនោះសរុប ៥៨ គ្រាប់»។
ម្ចាស់ទីតាំងចម្ការលោក ឈុន ហឿប បានប្រាប់ភ្នំពេញប៉ុស្តិ៍ថា លោកមានការតក់ស្លុតខ្លាំងណាស់ នៅពេលផាលនង្គ័លត្រាក់ទ័រភ្ជួរដីរបស់លោកបានគាស់រំលើងក្បាលគ្រាប់ទាំងនោះចេញមកបើទោះជាវាមិនបានបង្កការផ្ទុះគ្រោះថ្នាក់ដល់ជីវិតរបស់លោកក្ដី។
លោកថ្លែងថា៖ «គ្រាន់តែឃើញក្បាលគ្រាប់នោះ ៣ គ្រាប់ ផុសចេញពីក្នុងដីតាមបំណះផាលនង្គ័លត្រាក់ទ័រភ្ជួរដីភ្លាម ខ្ញុំភ័យឡើងញ័រខ្លួន ហើយបញ្ឈប់ត្រាក់ទ័រចុះរត់ចេញពីទីនោះព្រោះខ្លាចវាផ្ទុះ។ ក្រុមមន្ត្រីស៊ីម៉ាក់បានរកឃើញ ៥៥ គ្រាប់ថែមទៀតកប់នៅក្នុងដីក្រោមទីតាំងក្បាលគ្រាប់ទាំង ៣ នោះបានផុសចេញ»។
នៅថ្ងៃទី ២២ មេសា នោះដែរនៅចំណុចភូមិបល្ល័ង្ក ឃុំដំរីផុង ស្រុកឆ្លូង ខេត្តក្រចេះ ប្រជានេសាទម្នាក់បានបង់សំណាញ់ចាប់ត្រី ក៏ប៉ុន្តែបានជាប់គ្រាប់បែកចង្កោមដ៏ធំមួយ។ លោក សុង តូរ៉ាន់ អធិការស្រុកឆ្លូងឲ្យដឹងថា បន្ទាប់ពីឃើញគ្រាប់ដ៏ធំនេះ «យើងបានទាក់ទងភ្លាមៗទៅមន្ត្រីជំនាញស៊ីម៉ាក់ ឲ្យចុះពិនិត្យគ្រាប់នោះ ហើយមន្ត្រីជំនាញប្រាប់ថា វាជាគ្រាប់បែកចង្កោម (CBU-46/A) ប៉ុន្តែវានៅសល់តែសម្បកប៉ុណ្ណោះ»។
នាយកមជ្ឈមណ្ឌលកំចាត់មីនកម្ពុជាលោក ហេង រតនា បញ្ជាក់ពីម្សិលមិញថា បើផ្អែកតាមលក្ខណៈបច្ចេកទេសវិទ្យាសាស្ត្រ គ្រាប់បែកចង្កោមប្រភេទ (CBU-46/A) របស់អាមេរិកនេះមានទម្ងន់រហូតដល់ ៣៤០ គីឡូក្រាមមានប្រវែង ៣,២២ ម៉ែត្រ និងទំហំ ៤០១ ម.ម។ វាត្រូវបានគេប្រើសម្រាប់ទម្លាក់ពីលើយន្តហោះចម្បាំងដែលនៅក្នុងតួនៃគ្រាប់បែកចង្កោមនេះមានកូនគ្រាប់បែកចំនួន ៤៤៤ គ្រាប់ដែលក្នុង ១ គ្រាប់មានទម្ងន់ ៥០០ ក្រាម៕