.jpg)
គ្រាប់កាំភ្លើងចម្រុះដែលពលរដ្ឋប្រទះឃើញនៅខេត្តបាត់ដំបងថ្មីៗនេះ ។ CMAC ឈន ណន
បាត់ដំបងៈ សមត្ថកិច្ចនគរបាលស្រុកភ្នំព្រឹក ខេត្តបាត់ដំបង បានប្រគល់គ្រាប់កាំភ្លើងគ្រប់ប្រភេទចំនួន ៥៤ កេស ឲ្យអង្គភាពកម្ចាត់មីន (CMAC) ខេត្តបាត់ដំបងកាលពីម្សិលមិញ បន្ទាប់ពីពលរដ្ឋបានប្រទះឃើញនៅក្នុងភូមិអូរ ឃុំពេជ្រចិន្តា ស្រុកភ្នំព្រឹក ហើយរាយការណ៍ប្រាប់សមត្ថកិច្ចកាលពីថ្ងៃទី ៤ ខែ សីហា ឆ្នាំ ២០១៩ ។
លោកវរសេនីយ៍ទោ សារ៉េត វិសេដ្ឋ អធិការនគរបាលស្រុកភ្នំព្រឹកបានប្រាប់ភ្នំពេញប៉ុស្តិ៍ពីម្សិលមិញថា គ្រាប់គ្រប់ប្រភេទចំនួន ៥៤ កេស ដែលពលរដ្ឋប្រទះឃើញកប់ក្នុងដីនោះ ត្រូវបានសមត្ថកិច្ចរបស់លោកប្រគល់ឲ្យទៅអង្គភាពកម្ចាត់មីនប្រចាំនៅខេត្តបាត់ដំបងកាលពីថ្ងៃត្រង់ ថ្ងៃទី ៥ សីហា។ ប៉ុន្តែគ្រាប់ទាំងអស់នោះបានខូចគុណភាពស្ទើរតែអស់ហើយ នៅសល់ប្រមាណ ១០ ទៅ ២០ ភាគរយប៉ុណ្ណោះ ដែលអាចប្រើការបាន។
បើតាមលោក សារ៉េត វិសេដ្ឋ គ្រាប់ទាំងនោះមានប្រភេទ ១២,៧ មិល្លីមែត្រ ៤៤ កេស, គ្រាប់ PK ឬហៅថា K 57 ចំនួន ៩ កេស, គ្រាប់ AK 44 ចំនួន ១ កេស (ប្រើបានខ្លះ) , គ្រាប់កាំភ្លើងត្បាល់ឬហៅថា ១២០ (អុក) ចំនួន២, គ្រាប់ B41 ចំនួន ១ គ្រាប់។ គ្រាប់ទាំងនោះត្រូវបានពលរដ្ឋម្នាក់ឈ្មោះ ទន់ សាបឿន ភេទប្រុស អាយុ ៥៤ ឆ្នាំ រស់នៅក្នុងភូមិឃុំខាងលើ បានប្រទះឃើញខណៈគាត់កំពុងកាប់ដីធ្វើចម្ការ។
លោកថា៖ «គ្រាប់ទាំងនោះស្ថិតនៅតំបន់អតីតសមរភូមិចាស់របស់ខ្មែរក្រហមធ្វើសង្គ្រាមជាមួយរដ្ឋកម្ពុជាហើយស្ថិតនៅជាប់ព្រំដែន កម្ពុជា-ថៃ ផង» ។
លោក ម៉ម វណ្ណា រិទ្ធ អនុប្រធានអង្គភាពកម្ចាត់គ្រាប់មីននៅខេត្តបាត់ដំបងបានប្រាប់កាលពីម្សិលមិញថាលោកបានទទួលគ្រាប់ទាំងនោះពីនគរបាលស្រុកភ្នំព្រឹកហើយនៅពេលថ្ងៃត្រង់ ថ្ងៃទី ៥ ខែ សីហា (ម្សិលមិញ)។
ប៉ុន្តែលោកថាគុណភាពគ្រាប់ទាំងនោះខូចអស់ហើយ នៅសល់តែគ្រាប់ AK ខ្លះប្រើបាន។ទោះជាយ៉ាងណា លោកបានអះអាងថា អង្គភាពរបស់លោកបានប្រមូលគ្រាប់ទាំងនោះ ទុកយកទៅអង្គភាពកម្ចាត់មីននៅខេត្តកំពង់ឆ្នាំងបន្តទៀតដើម្បីកម្ទេចចោលទាំងអស់ ។
លោកបានបញ្ជាក់ថា៖ «បើនិយាយពីគ្រាប់យុទ្ធភណ្ឌមិនទាន់ផ្ទុះវិញនៅខេត្តបាត់ដំបងទាំង ១៤ ស្រុក និងក្រុងបាត់ដំបងគឺមានសំណល់គ្រាប់នៅរាយប៉ាយគ្រប់ស្រុកក្រុង ទាំងអស់ហ្នឹង»។
ចំពោះករណីគ្រោះថ្នាក់ដោយសារគ្រាប់មីនវិញ លោក ម៉ម វណ្ណារិទ្ធ បានបង្ហាញថា តាមស្ថិតិរបស់អាជ្ញាធរមីនកម្ពុជាបានឲ្យដឹងថា គិតពីឆ្នាំ ២០១០ ដល់ខែមេសាឆ្នាំ ២០១៩ គឺមានជនរងគ្រោះដោយគ្រាប់មីនសរុបចំនួន ២៨៥ នាក់នៅក្នុងខេត្តបាត់ដំបងទាំងមូល។
ដោយឡែកគិតពីដើមខែមករា ដល់ខែ មេសា ឆ្នាំ ២០១៩ មានជនរងគ្រោះដោយសារគ្រាប់មីនចំនួន ៩ នាក់៕
