កំពង់ស្ពឺៈ មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាមនឹងរៀបចំពិធីកម្ទេចគ្រាប់ និងយុទ្ធភណ្ឌមិនទាន់ផ្ទុះប្រភេទចម្រុះដែលខូចគុណភាពចំនួន ២៥០ តោនចាប់ពីថ្ងៃទី ១០ ខែ កញ្ញា ដល់ថ្ងៃទី ៣១ ខែ តុលា ឆ្នាំនេះនៅក្នុងខេត្តកំពង់ស្ពឺ ដើម្បីបញ្ចៀសពីហានិភ័យដែលអាចកើតមានជាយថាហេតុដល់ប្រជាពលរដ្ឋ។
យោងតាមសេចក្តីប្រកាសព័ត៌មានរបស់មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាមដែលភ្នំពេញប៉ុស្តិ៍ទទួលបានកាលពីម្សិលមិញបានឲ្យដឹងថាពិធីកម្ទេចគ្រាប់ខូចគុណភាពនេះគឺធ្វើឡើងនៅទីតាំងសាលាហ្វឹកហ្វឺនកងកម្លាំងរក្សាសន្តិភាពពហុជាតិ (អាសេអូ) ក្នុងឃុំមហាសាំង ស្រុកភ្នំស្រួច ខេត្តកំពង់ស្ពឺក្រោមអធិបតីភាពលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសដោយមានការអញ្ជើញភ្ញៀវជាតិ និងអន្តរជាតិចូលរួមផងដែរ។
បើតាមសេចក្តីប្រកាសដដែលបានបញ្ជាក់ថា៖ «គ្រាប់ខូចគុណភាពចំនួន ២៥០ តោនក្នុងនោះមួយចំនួនជាប្រភេទគ្រាប់ WP នៅពេលត្រូវកម្ដៅថ្ងៃខ្លាំងបង្កឲ្យហុយឆេះ និងប្រភេទគ្រាប់ RPG7 មានស្ថានភាពពុកផុយងាយនឹងផ្ទុះ អាចប្រឈមនឹងហានិភ័យខ្ពស់ ដូច្នេះដើម្បីធានាបាននូវសុវត្ថិភាពជូនប្រជាជន និងទប់ស្កាត់បានទាន់ពេលវេលារាល់គ្រោះថ្នាក់ដែលអាចកើតឡើងជាយថាហេតុ មជ្ឈមណ្ឌលជាតិនឹងរៀបចំពិធីកម្ទេចគ្រាប់ខូចគុណភាពទាំងអស់នេះចោលចាប់ពីថ្ងៃទី ១០ ខែ កញ្ញា ដល់ថ្ងៃទី ៣១ ខែ តុលា ឆ្នាំ ២០១៩»។
ទាក់ទងនឹងការរៀបចំកម្ទេចគ្រាប់នេះ មជ្ឈមណ្ឌលជាតិក៏បានជូនដំណឹងដល់អាជ្ញាធរដែនដីក៏ដូចពលរដ្ឋដែលកំពុងរស់នៅក្នុង និងជុំវិញបរិវេណ (អាសេអូ) ក្នុងឃុំមហាសាំង ស្រុកភ្នំស្រួច ខេត្តកំពង់ស្ពឺ កុំឲ្យមានការភ្ញាក់ផ្អើលផងដែរ។
លោក ផល សាម៉ន អគ្គនាយករងមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាមបានថ្លែងកាលពីម្សិលមិញថា នេះជាលើកទី ១ ហើយសម្រាប់មជ្ឈមណ្ឌលក្នុងការរៀបចំពិធីកម្ទេចគ្រាប់ខូចគុណភាព ដោយលោកថាដំណើរការនេះត្រូវធ្វើឡើងជាជំហានៗ។
លោកបានបញ្ជាក់ថា៖ «មកទល់ពេលនេះគឺជាការបើកប្រតិបត្តិការដំបូងក្នុងការកម្ទេចគ្រាប់ពីមុនមកយើងកម្ទេចគ្រាប់នៅតាមការដ្ឋាននានាបន្ទាប់ពីយើងបានរកឃើញ និងប្រមូលពីគ្រប់កន្លែង និងពីប្រជាពលរដ្ឋ។ យើងប្រកាសជូនព័ត៌មានទៅប្រជាពលរដ្ឋ អាជ្ញាធរដែនដីដើម្បីឲ្យលោកដឹងថានឹងមានការកម្ទេចគ្រាប់ចោល ហើយកុំឲ្យពួកគាត់មានការភ្ញាក់ផ្អើល»។
នៅពេលសួរទាក់ទងនឹងប្រភពគ្រាប់ដែលត្រូវកម្ទេចលោក ផល សាម៉ន បានបដិសេធផ្តល់ព័ត៌មានលម្អិត ពីព្រោះវាស្ថិតក្នុងដំណាក់កាលនីតិវិធីផ្ទៃក្នុងរបស់មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព។ ប៉ុន្តែលោកបានឲ្យដឹងថា ពិធីនេះមានការអញ្ជើញចូលរួមមន្ត្រីជាន់ខ្ពស់ក្រសួងការពារជាតិ អង្គការ UNDP អង្គការ Halo Trush ស៊ីម៉ាក់ អាជ្ញាធរមីន និងអង្គការផ្សេងៗដែលធ្វើការពាក់ព័ន្ធនឹងការដោះមីននៅកម្ពុជា ហើយការកម្ទេចនេះគឺដំណើរការដោយផ្អែកតាមនិតីវិធី និងបច្ចេកទេសត្រឹមត្រូវ។
លោកថា៖ «យើងជាកងទ័ពជំនាញ ដោយសារតែយើងមិនត្រឹមតែធ្វើការបោសសម្អាតមីននៅក្នុងប្រទេសរបស់យើងទេ តែយើងក៏ធ្វើការបោសសម្អាតមីននៅក្នុងប្រទេសស៊ូដង់ លីបង់ អាហ្វ្រិកកណ្តាល និងម៉ាលី។
ការកម្ទេចនេះគឺធ្វើឡើងក្នុងសាលាហ្វឹកហ្វឺនកងកម្លាំងរក្សាសន្តិភាពពហុជាតិដែលជាទីតាំងធ្លាប់កម្ទេចជាច្រើនដងមកហើយ ហើយវាមិនប៉ះពាល់អីដល់សុវត្ថិភាពដល់ពលរដ្ឋ និងសំឡេងមិនរំខាននោះទេ»។
លោកថា៖ «នេះគឺជាបទដ្ឋានបច្ចេកទេសដែលក្រុមកម្ទេចគ្រាប់មានការទទួលស្គាល់ពីអង្គការសហប្រជាជាតិ និងអាជ្ញាធរមីន។ នីតិវិធីយើងត្រូវរៀបគ្រាប់រំសេវប៉ុន្មានដើម្បីធ្វើឲ្យវាផ្ទុះដើម្បីកម្ទេចគ្រាប់ហ្នឹង។ គេមានរូបមន្តរបស់គេដើម្បីកម្ទេច...គ្រាប់ដែលយើងសល់ពីឆ្នាំ ១៩៧៥ ហើយគ្រាប់មួយចំនួនទៀតយើងប្រមូលបានពីសង្គ្រាមដែលវាចាស់សឹករេចរឹលតាំងពីសម្បក និងក្បាលជាប្រភេទគ្រាប់ពុកផុយគ្រាប់ត្បាល់ កាំភ្លើងផ្លោងដែលបន្សល់ទុកយូរហើយ។ វាជាគ្រាប់ចម្រុះ»។
លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា (CMAC) មិនបានអត្ថាធិប្បាយពាក់ព័ន្ធនឹងការកម្ទេចគ្រាប់ខូចគុណភាព ២៥០ តោននេះទេ កាលពីម្សិលមិញ៕