.jpg)
មន្ត្រី CMAC ពិនិត្យគ្រាប់មិនទាន់ផ្ទុះក្នុងខេត្តព្រះសីហនុ។ រូបថត CMAC
ព្រះសីហនុៈ ក្រុមមន្ត្រីកម្ចាត់មីនចល័តនៃមជ្ឈមណ្ឌលកំចាត់មីនកម្ពុជា បាននាំគ្នាចុះទៅស្រាវជ្រាវ និងរុករកគ្រាប់យុទ្ធភណ្ឌមិនទាន់ផ្ទុះនៅសង្កាត់លេខ ៣ ក្រុងព្រះសីហនុបន្តទៀត ក្រោយពីអាជ្ញាធរមូលដ្ឋានអះអាងថា បានប្រទះឃើញគ្រាប់យុទ្ធភណ្ឌមិនទាន់ផ្ទុះប្រភេទ ៦០ ម.ម និង ១០៥ ម.ម សរុប ៣២ គ្រាប់ នៅចំណុចកែងផ្លូវសេតេជាប់នឹងហ្គារ៉ាស់សាំងតូតាល់កាលពីរសៀលថ្ងៃសៅរ៍ ហើយសង្ស័យថា អាចនៅមានគ្រាប់យុទ្ធភណ្ឌមិនទាន់ផ្ទុះមួយចំនួនទៀតនៅក្នុងតំបន់នោះ។
លោក សាំង ហត នាយរងការិយាល័យ អាវុធជាតិផ្ទុះក្រុងព្រះសីហនុបានប្រាប់ភ្នំពេញប៉ុស្តិ៍ថា ក្រោយពីក្រុមការងារកងវិស្វកម្មជួសជុលផ្លូវ និងបណ្ដាញលូទឹកបានជីកកាយដីនៅចំណុចទីតាំងដែលបានរកឃើញគ្រាប់នោះ ហើយប្រទះឃើញគ្រាប់យុទ្ធភណ្ឌមិនទាន់ផ្ទុះទាំងនោះ ក្រុមការងាររបស់លោកបានចុះពិនិត្យស្រាវជ្រាវ និងសាកសួរប្រជាពលរដ្ឋនៅក្នុងតំបន់នោះអំពីប្រវត្តិនៃទីតាំងនេះ ហើយដឹងថា កាលពីមុនវាជាកន្លែងស្តុកអេតចាយដ៏ធំមួយក្នុងក្រុងព្រះសីហនុ។
លោកបានបន្តថា បើតាមការអះអាងរបស់អ្នកភូមិ ក្រៅពីដែក និងគ្រឿងចក្រចាស់ៗដែលខូច ពួកគាត់ក៏ធ្លាប់ប្រទះឃើញមានក្បាលគ្រាប់កាំភ្លើងធំចាស់ៗ ដែលជាកាកសំណល់នៃសង្គ្រាមត្រូវបានគេគរទុកនៅក្នុងឃ្លាំងស្តុកអេតចាយនោះផងដែរ ប៉ុន្តែពួកគាត់មិនដឹងថាក្រោយមកក្បាលគ្រាប់ចាស់ៗទាំងនោះត្រូវបានគេកប់ចោល ឬដឹកទៅលក់បន្ត ឬកែច្នៃជាអ្វីនោះទេ។
លោកបានបន្តថា៖ «ដោយសារតែហេតុនេះហើយ ទើបក្រុមមន្ត្រីនគរបាលជំនាញយើងបានសម្រេចធ្វើការហ៊ុមព័ទ្ធទីតាំងនោះជាបណ្ដោះអាសន្ន ដើម្បីស្នើសុំក្រុមមន្ត្រីជំនាញស៊ីម៉ាក់ចុះមកពិនិត្យស្រាវជ្រាវនៅលើទីតាំងជុំវិញតំបន់នោះ ព្រោះយើងសង្ស័យថា វាអាចនៅមានក្បាលគ្រាប់យុទ្ធភណ្ឌមិនទាន់ផ្ទុះច្រើនទៀតកប់នៅក្នុងដីនៃតំបន់នេះ»។
លោក សាំង ហត បានឲ្យដឹងថា កាលពីឆ្នាំមុនក្រុមមន្ត្រីជំនាញស៊ីម៉ាក់បានស្រាវជ្រាវរកឃើញ និងជីកកាយយកក្បាលគ្រាប់យុទ្ធភណ្ឌមិនទាន់ផ្ទុះប្រភេទ ៦០ ម.ម និង ១០៥ ម.ម ប្រមាណជាង ៥០ គ្រាប់ផងដែរ។
លោក ហេង រតនា អគ្គនាយក CMAC មិនអាចទាក់ទងស្នើសុំការអធិប្បាយបានទេកាលពីម្សិលមិញ ប៉ុន្តែលោក អ៊ុំ ភូមិរ៉ូ អគ្គនាយករងនៃស្ថាប័ននេះបានថ្លែងថា អាជ្ញាធរមូលដ្ឋាន មន្ត្រីជំនាញស៊ីម៉ាក់បានចុះទៅកាន់ទីតាំងនោះ ដើម្បីពិនិត្យស្រាវជ្រាវដល់ទីកន្លែង ហើយពេលនេះពួកគេកំពុងបន្តការងាររបស់ពួកគេទៅតាមជំនាញក្រោយមានការស្នើសុំ៕
