កំពង់ចាមៈ មន្ត្រីជំនាញបានដុតកម្ទេចចោលនូវគ្រាប់យុទ្ធភណ្ឌមិនទាន់ផ្ទុះចំនួន ១,៦ តោន ស្មើនឹង ១០ ភាគរយក្នុងចំណោមគ្រាប់ចំនួនជាង ១៦ តោនដែលត្រូវបានស្រង់ចេញពីនាវាចម្បាំងដែលលិចក្នុងទន្លេមេគង្គនៅខេត្តកំពង់ចាម កាលពីសម័យសង្គ្រាម ខណៈនៅសល់ពីនេះនឹងត្រូវយកទៅដោះបន្សាបសម្រាប់ត្រៀមរក្សាទុកនៅក្នុងសារមន្ទីរ។
លោក ម៉ី សុភា មេបញ្ជាការបោសសម្អាតគ្រាប់មិនទាន់ផ្ទុះនៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម (NPMEC) ប្រាប់ភ្នំពេញប៉ុស្តិ៍កាលពីម្សិលមិញថាគ្រាប់ដែលត្រូវបានដុតកម្ទេចចោលនេះជាប្រភេទគ្រាប់ដែលចាស់ ពុក និងមានច្រែះចាប់ ហើយមិនអាចទុកយូរបាន។
លោក ម៉ី សុភា ថ្លែងថាគ្រាប់ដែលត្រូវបានកម្ទេចនេះ ជាប្រភេទគ្រាប់ចម្រុះដូចជាគ្រាប់ផ្លោង គ្រាប់ត្បាល់ គ្រាប់អាវុធធុនតូច និងគ្រាប់ប្រភេទផ្សេងៗទៀតដែលគ្រាប់ទាំងអស់នេះប្រមូលយកចេញពីនាវាលិចនៅក្នុងទន្លេ។
លោកបញ្ជាក់ថា៖ «រហូតមកដល់ពេលនេះការប្រមូលគ្រាប់ចេញពីនាវា លេចនៅក្នុងទន្លេបានសម្រេច ១០០ ភាគរយ ហើយប៉ុន្តែបើអាចសល់គឺសល់តិចតួចបំផុត ដែលស្ថិតនៅក្រោមបាតនាវា។ ប៉ុន្តែយើងនឹងបញ្ចប់នៅក្រោយពេលចូលឆ្នាំខ្មែរ បន្ទាប់ពីលើកនាវាចេញពីក្នុងទឹក»។
លោក អៀម វណ្ណ អនុប្រធានក្រុមការងារកងបោសសម្អាតគ្រាប់យុទ្ធភណ្ឌមិនទាន់ផ្ទុះ ក្រោមទឹកបានថ្លែងនៅក្នុងពិធីដុតកម្ទេចគ្រាប់កាលពីម្សិលមិញថា គ្រាប់ខូចគុណភាពចំនួន ១០% ត្រូវធ្វើការកម្ទេចចោលចាប់តាំងពីថ្ងៃទី ៣១ ខែមីនាដល់ថ្ងៃទី ៧ ខែមេសា ឆ្នាំ ២០២១ (រយៈពេល ៨ ថ្ងៃ) ស្ថិតក្នុងភូមិសាស្ត្រ ភូមិពោធិ៍ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម។
លោកអៀម វណ្ណ បានថ្លែងបន្តថា ដោយឡែកចំនួនគ្រាប់ ៩០ ភាគរយ ដែលមានទ្រង់ទ្រាយល្អ មានសុវត្ថិភាព និងត្រូវធ្វើការដោះបន្សាបចាប់ពីថ្ងៃទី ៣១ ខែ មីនា ឆ្នាំ ២០២១ ដល់ថ្ងៃទី ១៩ ខែ ឧសភា ឆ្នាំ ២០២១ រយៈពេល (៤៣ ថ្ងៃ) ដើម្បីបញ្ចប់ផែនការសម្រាប់ការទុកដាក់តាំងគ្រាប់ទាំងនេះនៅក្នុងសារមន្ទីរ។ ទីតាំងដោះបន្សាបគ្រាប់ទាំងនេះគឺនៅទីបញ្ជាការ Golden west ស្ថិតនៅក្នុងខេត្តកំពង់ឆ្នាំង និងនៅទីបញ្ជាការកងសុនខ ហិតមីន។
លោកនាយករដ្ឋមន្ត្រី ហ៊ុន សែន កាលពីថ្ងៃទី ២៨ ខែ សីហា ឆ្នាំ ២០២០ បានសម្រេចបង្កើតក្រុមការងារអន្តរក្រសួង ដើម្បីចុះសិក្សា និងដោះស្រាយករណីរកឃើញគ្រាប់យុទ្ធភណ្ឌមិនទាន់ផ្ទុះក្នុងនាវា ដែលលិចក្នុងទឹកទន្លេមេគង្គស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាមក្នុងគោលដៅធ្វើយ៉ាងណាមិនឱ្យមានគ្រាប់យុទ្ធភណ្ឌមិនទាន់ផ្ទុះនៅក្នុងប្រទេស៕