.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ រូបថត ក្រសួងអប់រំ
ភ្នំពេញ៖ រដ្ឋមន្រ្ដីក្រសួងអប់រំ យុវជន និងកីឡា លោក ហង់ជួន ណារ៉ុន នៅថ្ងៃទី ២១ ខែឧសភា បានជម្រាបទៅលោក លោកស្រី ប្រធានមន្ទីរអប់រំរាជធានី-ខេត្ដ ឱ្យប្រកាសជ្រើសរើសសាលាចំណេះទូទៅសាធារណៈ ដើម្បីផ្តល់ជូនកុំព្យូទ័របន្ទះ និងសម្ភារបច្ចេកទេស ដើម្បីគាំទ្រដល់ការបង្រៀន បច្ចេកវិទ្យាព័ត៌មាន និងសារគមនាគមន៍។
ការប្រកាសរបស់ក្រសួងអប់រំនេះ បន្ទាប់ពីក្រសួងអប់រំបានទទួលកុំព្យូទ័របន្ទះ ពីមន្ទីរអប់រំទីក្រុងប៊ូសាន នៃសាធារណរដ្ឋកូរ៉េ តាមរយៈអនុស្សរណៈនៃការយោគយល់រវាងភាគីទាំង ២ កាលពីថ្ងៃទី ៧ ខែ វិច្ឆិកា ឆ្នាំ ២០១៧។
លោករដ្ឋមន្រ្ដីក្រសួងអប់រំបានថ្លែងថា៖ «ខ្ញុំសូមជម្រាបជូន លោក លោកស្រី ប្រធានជ្រាបថា ក្រសួងអប់រំ បានទទួលកុំព្យូទ័របន្ទះ និងសម្ភារៈព័ត៌មានវិទ្យា (ICT) ពីមន្ទីរអប់រំក្រុងប៊ូសាន នៃសាធារណរដ្ឋកូរ៉េ សម្រាប់បំពាក់នៅសាលាចំណេះទូទៅសាធារណៈ ដើម្បីគាំទ្រដល់ការបង្រៀន និងរៀន មុខវិជ្ជាឯកទេសព័ត៌មានវិទ្យា (ICT) និងការប្រើប្រាស់ ICT ជំនួយការសិក្សាមុខវិជ្ជាទូទៅ នៅតាមគ្រឹះស្ថានសិក្សានៃព្រះរាជាណាចក្រកម្ពុជា ដើម្បីធានាឲ្យបានថា សិស្សានុសិស្សអាចទទួលបានការអប់រំប្រកបដោយគុណភាព និងសមធម៌ ពង្រឹងសមត្ថភាពឲ្យទាន់ការរីកចម្រើនយ៉ាងឆាប់រហ័សនៃបច្ចេកវិទ្យាពិភពលោក»។
ក្រសួងបញ្ជាក់ថា កុំព្យូទ័របន្ទះ និងសម្ភារបច្ចេកទេស ICT នេះ នឹងផ្តល់ជូនសាលាមធ្យមសិក្សាសាធារណៈចំនួន ៧ ដែលមានលក្ខណសម្បត្តិគ្រប់គ្រាន់ និងមានលទ្ធភាពប្រើប្រាស់ប្រកបដោយប្រសិទ្ធភាព និងនិរន្តរភាព។ ក្រសួងបានផ្ដល់ឱកាសដល់វិទ្យាល័យ ដែលមិនទាន់មានកុំព្យូទ័របន្ទះសម្រាប់ការបង្រៀនសិស្ស អាចដាក់ពាក្យស្នើសុំសម្រាប់សាលារៀនរបស់ខ្លួន ដោយត្រូវបំពេញពាក្យស្នើសុំឱ្យបានត្រឹមត្រូវ ស្របតាមគោលការណ៍ណែនាំដែលបានកំណត់។
បើតាមសេចក្ដីជូនដំណឹងរបស់ក្រសួងអប់រំ គ្រឹះស្ថានសិក្សាសាធារណៈ ដែលបានដាក់ពាក្យស្នើសុំ នឹងត្រូវឆ្លងកាត់ការវាយតម្លៃ និងសម្រេចជ្រើសរើសគ្រឹះស្ថានសិក្សាសាធារណៈចំនួន ៧ ដែលមានលក្ខណៈសមស្របបំផុតស្របតាមលក្ខន្តិកៈនៃការជ្រើសរើស។
ក្រសួងបានឱ្យដឹងថា មុខសញ្ញាជ្រើសរើស គឺជាគ្រឹះស្ថានសិក្សាមធ្យមសិក្សាសាធារណៈ (សាលាមធ្យមសិក្សាធនធាន និងសាលាដែលមានកុំព្យូទ័របន្ទះរួចហើយ មិនអនុញ្ញាតឱ្យដាក់ពាក្យ)។ គ្រឹះស្ថានសិក្សាមធ្យមសិក្សាសាធារណៈដែលមានអគ្គិសនីប្រើប្រាស់ (រដ្ឋ/ឯកជន/ម៉ាស៊ីនភ្លើង/បន្ទះពន្លឺព្រះអាទិត្យ)។
គណៈគ្រប់គ្រង និងលោកគ្រូ-អ្នកគ្រូ នៃគ្រឹះស្ថានសិក្សាមធ្យមសិក្សាសាធារណៈនោះមានការប្ដេជ្ញាចិត្តខ្ពស់ក្នុងការទទួលយកកុំព្យូទ័របន្ទះ និងដំណើរការប្រើប្រាស់ឱ្យមានប្រសិទ្ធភាព និងនិរន្តរភាព។ គ្រឹះស្ថានសិក្សាមធ្យមសិក្សាសាធារណៈនោះក៏ត្រូវមានការគាំទ្រពីសហគមន៍ និងគណៈកម្មការទ្រទ្រង់សាលារៀនផងដែរ។
ចំពោះដំណើរការនៃការដាក់ពាក្យស្នើសុំគណៈគ្រប់គ្រងសាលាដែលមានបំណងចូលរួមគម្រោងនេះ ត្រូវបំពេញពាក្យសុំឲ្យបានត្រឹមត្រូវ ដោយឆ្លងកាត់ការត្រួតពិនិត្យ និងឯកភាពពីការិយាល័យ អប់រំ ក្រុង ខណ្ឌ ស្រុក សាមី។ ចំណែកពាក្យស្នើសុំត្រូវចម្លងជូន (ច្បាប់ចម្លង) មួយច្បាប់ជូនមន្ទីរ អប់រំ សាមី។
ក្រសួងបញ្ជាក់ថា ការទទួលពាក្យស្នើសុំកុំព្យូទ័របន្ទះនេះ គឺចាប់ផ្តើមពីថ្ងៃជូនដំណឹងនេះ រហូតដល់ថ្ងៃទី ៣០ ខែ មិថុនា ឆ្នាំ ២០២១ ជាកំណត់។ ពាក្យស្នើសុំត្រូវបញ្ជូនជាឯកសារទន់ (Soft copy) ដែលមានហត្ថលេខា និងត្រាអង្គភាព និងឯកសារដែលអាចកែបាន ផ្ញើមកនាយកដ្ឋានបច្ចេកវិទ្យាព័ត៌មាន តាមរយៈសារអេឡិចត្រូនិក dit.its@moeys.gov.kh ឬតាមលេខទូរស័ព្ទ (Telegram) ០៦៦ ៩០១ ៨៤៥ ។
ចំណែក ការវាយតម្លៃពាក្យស្នើសុំទាំងអស់នឹងត្រូវឆ្លងកាត់ការវាយតម្លៃដោយក្រុមការងារជំនាញនៃនាយកដ្ឋានបច្ចេកវិទ្យាព័ត៌មាននៃក្រសួងអប់រំ ដើម្បីជ្រើសរើសសាលាជាបេក្ខភាពជាបឋម។ គ្រឹះស្ថានសិក្សាដែលជាប់ជាបេក្ខភាពនឹងត្រូវបន្តផ្ទៀងផ្ទាត់ព័ត៌មាន និងចុះវាយតម្លៃស្ថានភាពជាក់ស្ដែងនៅតាមសាលារៀន ដោយក្រុមការងារជំនាញ ដើម្បីពិនិត្យ វាយតម្លៃ និងស្នើសុំថ្នាក់ដឹកនាំក្រសួងសម្រេចជ្រើសរើស៕
