ភ្នំពេញៈ គ្រឹះស្ថានសិក្សាឯកជនបានឯកភាពទៅតាមក្រសួងអប់រំ យុវជន និងកីឡាស្ដីពីការបើកដំណើរការឡើងវិញក្នុងដំណាក់កាលទី ២ នៃបរិបទជំងឺកូវីដ ១៩ បន្ទាប់ពីក្រសួងបានណែនាំឱ្យគណៈគ្រប់គ្រងគ្រឹះស្ថានសិក្សាឯកជនទាំងអស់ត្រូវពិនិត្យលក្ខណសម្បត្ដិគ្រឹះស្ថានសិក្សារបស់ខ្លួនទៅតាមស្ដង់ដាកំណត់ដើម្បីស្នើសុំបើកឡើងវិញកាលពីថ្ងៃទី ១ ខែកញ្ញា។
លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្ដមសិក្សាកម្ពុជាបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ក្រោយពីមានកិច្ចប្រជុំរួមជាមួយម្ចាស់គ្រឹះស្ថានសិក្សាឯកជនដែលជាសមាជិកសមាគមគឺបានឯកភាពគ្នាយល់ព្រមអនុវត្ដតាមសេចក្ដីណែនាំរបស់ក្រសួងអប់រំចំពោះការបើកដំណើរការគ្រឹះស្ថានសិក្សាឡើងវិញ និងគោលការណ៍ប្រតិបត្ដិស្ដង់ដា នៅតាមគ្រឹះស្ថានសិក្សាក្នុងបរិបទនៃជំងឺកូវីដ១៩នេះ។
លោកបានថ្លែងថា៖ «អ្វីដែលយើងចង់បញ្ជាក់ទៅកាន់ក្រសួងអប់រំនោះ គឺរឿងរក្សាគម្លាតម៉ែត្រក្រឡាក្នុងថ្នាក់រៀន ព្រោះថ្នាក់រៀនខ្លះមានទំហំតូច និងខ្លះមានទំហំធំ។ ដូច្នេះតើស្ដង់ដាត្រូវរក្សាគម្លាតប៉ុនណា និងអាចដាក់សិស្សចំនួនប៉ុន្មាននាក់ក្នុង ១ ថ្នាក់ៗ។ ដូច្នេះចម្លើយមក (ពីក្រសួងអប់រំ) គឺច្បាស់ហើយ ចំនួនសិស្សក្នុង ១ ថ្នាក់យ៉ាងច្រើនបំផុតគឺដាក់បានតែចំនួន ២៥ នាក់ជាអតិបរមា ទោះបីថ្នាក់រៀននោះមានទំហំប៉ុន្មានក៏ដោយ»។
ទោះជាយ៉ាងណា បើតាមលោក ហេង វ៉ាន់ដា ឡានដឹកសិស្សដែលពីមុនសាលារៀនឯកជនមានគឺពេលនេះមិនអនុញ្ញាតឱ្យដឹកសិស្សទៀតឡើយ ព្រោះនេះជាគោលការណ៍ណែនាំរបស់ក្រសួងអប់រំ។
ចំណែកអាហារដ្ឋាននៅតាមសាលារៀនក៏មិនតម្រូវឱ្យលក់ទៀតដែរ ប៉ុន្ដែប្រសិនបើក្រសួងចុះពិនិត្យឃើញអាហារដ្ឋានណាមួយអនុវត្ដតាមលក្ខណៈស្ដង់ដា ហើយអាចអនុញ្ញាតឱ្យបើកលក់បានឬយ៉ាងណានោះ គឺអាស្រ័យលើក្រសួងជាអ្នកសម្រេច។
លោក ហង់ជួន ណារ៉ុន រដ្ឋមន្ដ្រីក្រសួង អប់រំ យុវជន និងកីឡាកាលពីថ្ងៃទី ១ ខែកញ្ញា បានចេញសេចក្ដីណែនាំលេខ ៤៣ ស្ដីពីការបើកដំណើរការឡើងវិញគ្រឹះស្ថានសិក្សាឯកជនក្នុងដំណាក់កាលទី ២។ តាមសេចក្ដីណែនាំនេះគណៈគ្រប់គ្រងគ្រឹះស្ថានសិក្សាឯកជនត្រូវអនុវត្ដតាមគោលការណ៍ប្រតិបត្ដិស្ដង់ដា (SOP) ជាពិសេសពង្រឹងការអនុវត្ដវិធានការការពារទប់ស្កាត់ និងឆ្លើយតបការរីករាលដាលជំងឺកូវីដ១៩ របស់ក្រសួងសុខាភិបាល ឬអាចអនុវត្ដលើសពីស្ដង់ដាដែលបានកំណត់នេះ។
ចំពោះការរក្សាគម្លាតសុវត្ថិភាពក្នុងគ្រឹះស្ថានសិក្សា លោករដ្ឋមន្ដ្រីបានណែនាំថា៖ «ត្រូវរៀបចំតុ កៅអីអង្គុយ សម្រាប់អ្នកសិក្សានៅក្នុងបន្ទប់រៀនដោយរក្សាគម្លាតសុវត្ថិភាពយ៉ាងតិច ១,៥ ម៉ែត្រ និងរៀបចំចំណុះថ្នាក់ដោយកំណត់សិស្សមិនលើសពី ២០ ទៅ ២៥ នាក់ក្នុង ១ ថ្នាក់»។
ចំណែកនីតិវិធីនៃការស្នើសុំបើកដំណើរការគ្រឹះស្ថានសិក្សាឯកជនឡើងវិញ លោក ហង់ជួន ណារ៉ុន ក៏បានបញ្ជាក់ដែរថា គ្រឹះស្ថានសិក្សាឯកជនត្រូវអនុវត្ដតាមនីតិវិធីដូចជា ដាក់ពាក្យស្នើសុំបើកដំណើរការឡើងវិញក្នុងដំណាក់កាលទី ២។ អនុញ្ញាត និងសម្របសម្រួលឱ្យក្រុមការងារអធិការកិច្ចរបស់ក្រសួងចុះពិនិត្យ (មុនពេលបើក និងអំឡុងពេលដំណើរការ)។
ចុះអនុស្សរណៈយោគយល់គ្នាស្ដីពីការបើកដំណើរការឡើងវិញគ្រឹះស្ថានសិក្សាឯកជនក្នុងដំណាក់កាលទី ២ ជាមួយក្រសួងដោយក្រសួងនឹងចេញលិខិតអនុញ្ញាតឱ្យបើកដំណើរការឡើងវិញ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាថ្លែងកាលពីម្សិលមិញថា ក្រសួងអប់រំសូមថ្លែងអំណរគុណចំពោះកិច្ចសហការនៃគ្រឹះស្ថានសិក្សានានាដែលមានស្រាប់ និងអំពាវនាវឱ្យបន្តកិច្ចសហការពីគ្រប់ភាគីពាក់ព័ន្ធក្នុងការរៀបចំ និងអនុវត្ដសេចក្ដីណែនាំរបស់ក្រសួងអប់រំ។
លោកថា សម្រាប់គ្រឹះស្ថានសិក្សាសាធារណៈគឺយោងទៅតាមសេចក្ដីណែនាំដែលមាននៅក្នុងលិខិតលេខ ៣៧-៣៨-៣៩។ ចំណែកគ្រឹះស្ថានសិក្សាឯកជនគឺយោងទៅតាមលិខិតលេខ ៤៣។
លោកបានបញ្ជាក់ថា៖ «នៅក្នុងលិខិតទាំង ៤ ខាងលើនេះអ្វីដែលជាមូលដ្ឋានគ្រឹះគឺផ្សារភ្ជាប់ទៅនឹងគោលការណ៍ប្រតិបត្តិស្ដង់ដា (SOP) សម្រាប់បើកដំណើរការគ្រឹះស្ថានសិក្សាឡើងវិញនៅក្នុងបរិបទនៃជំងឺកូវីដ ១៩ ដែលបានចុះកាលពីថ្ងៃទី ៤ ខែ សីហា ឆ្នាំ ២០២០»។
បើតាមលោក សុវាចា សម្រាប់ឆ្នាំសិក្សា ២០១៩-២០២០ ចំនួនគ្រឹះស្ថានសិក្សាឯកជនចាប់ពីកម្រិតមត្តេយ្យទៅដល់កម្រិតមធ្យមសិក្សា (ថ្នាក់ទី ១២) គឺមានសរុបចំនួន ១ ៤២៦ នៅទូទាំង ២៥ រាជធានី-ខេត្ត៕
វីដេអូ៖