.jpg)
គ្រូដោះអំពើដែលត្រូវបានតុលាការព្រៃវែងសម្រេចឃុំខ្លួន។ រូប សហការី
ព្រៃវែងៈ ចៅក្រមស៊ើបសួរនៃសាលាដំបូង ខេត្តព្រៃវែងបានឃុំខ្លួនលោកគ្រូដោះអំពើវ័យចំណាស់ម្នាក់នៅពន្ធនាគារខេត្តកាលពីថ្ងៃទី ៥ មករា បន្ទាប់ពីរំលោភសេពសន្ថវៈលើស្ត្រីជាអ្នកជំងឺម្នាក់កាលពីថ្ងៃទី ៣ មករា នៅឃុំដំរីពូន ស្រុកស្វាយអន្ទរ ខេត្តព្រៃវែង។
លោកស្រី ព្រាប សាវី ស្នងការរងនៃស្នងការដ្ឋាននគរបាលខេត្តព្រៃវែងប្រាប់ភ្នំពេញប៉ុស្តិ៍ថ្ងៃទី ៦ មករា ថា បុរសវ័យចំណាស់ម្នាក់ឈ្មោះ មាស មឿន អាយុ ៦៩ ឆ្នាំ ដែលជាប់ពាក់ព័ន្ធនឹងការរំលោភសេពសន្ថវៈលើអ្នកជំងឺម្នាក់នោះត្រូវបានចៅក្រមស៊ើបសួរ លោក កែ សុផន នៃសាលាដំបូងខេត្តព្រៃវែង ចោទប្រកាន់ និងឃុំខ្លួនក្នុងពន្ធនាគារហើយដោយចោទពីបទរំលោភសេពសន្ថវៈមានស្ថានទម្ងន់ទោសទាក់ទងនឹងជនរងគ្រោះ។
លោកស្រីបានថ្លែងថា៖ «ករណីគ្រូដោះអំពើនោះត្រូវបានតុលាការចោទតាមមាត្រា ២៤១ នៃក្រមព្រហ្មទណ្ឌ»។
យោងលើមាត្រា ២៤១ នៃក្រមព្រហ្មទណ្ឌនេះ ប្រសិនបើតុលាការរកឃើញថា ជនជាប់ចោទពិតជាបានប្រព្រឹត្តមែននោះ ជនប្រព្រឹត្តនឹងត្រូវជាប់ពន្ធនាគារពី ៧ ឆ្នាំ ទៅ ១៥ ឆ្នាំ។
ដោយឡែកលោក អ៊ុង ផាន អធិការនគរបាលស្រុកស្វាយអន្ទរប្រាប់ពីថ្ងៃទី ៦ មករា ថាស្ត្រីរងគ្រោះឈ្មោះ ស.ថ អាយុ ២៩ ឆ្នាំ និងមានប្តីហើយ ប៉ុន្តែស្ត្រីរងគ្រោះមានសតិមិនប្រក្រតី។ ជនឈ្មោះ មាស មឿន ត្រូវម្តាយស្ត្រីរងគ្រោះប្តឹងមកសមត្ថកិច្ចរបស់លោកនៅថ្ងៃទី ៣ មករា ហើយក៏ត្រូវចាប់ខ្លួននៅថ្ងៃដដែលដែរ។
លោករំឭកថា មុនសមត្ថកិច្ចចាប់ខ្លួនគ្រូដោះអំពើនោះត្រូវបានម្តាយនារីរងគ្រោះហៅឲ្យទៅដោះអំពើ និងដេញព្រាយបិសាចចេញពីក្នុងខ្លួនរបស់កូនស្រីគាត់។ ព្រោះថាស្ត្រីរងគ្រោះមានជំងឺម្យ៉ាងចេះតែរវើរវាយ ហើយលោកគ្រូនោះទៅព្យាបាលស្ត្រីរងគ្រោះអស់រយៈពេលជាង ១០ ថ្ងៃមកហើយ។ រាល់ការព្យាបាលម្តងៗលោកគ្រូនោះតែងតែប្រាប់ម្តាយស្ត្រីរងគ្រោះថា ពេលគាត់ព្យាបាលមិនត្រូវឲ្យអ្នកណាម្នាក់ចូលទៅមើលនៅក្នុងបន្ទប់ទេ ព្រោះបើមានមនុស្សទៅមើលគឺព្រាយមិនចេញពីក្នុងខ្លួនអ្នកជំងឺទេ។
លោក អ៊ុង ផាន បានប្រាប់តាមសម្តីម្តាយស្ត្រីរងគ្រោះថានៅថ្ងៃទី ២ ខែមករា ឆ្នាំ ២០២០ លោកគ្រូនោះបានទៅព្យាបាលស្ត្រីរងគ្រោះហើយរាល់ពេលព្យាបាលម្តងៗតែងតែតម្រូវឲ្យម្តាយស្ត្រីរងគ្រោះទៅអុជធូបដោយប្រាប់ចាំធូបឆេះអស់ ១ ដើមចាំចូលក្នុងបន្ទប់មើលកូន បើមិនដូច្នេះទេមិនពូកែទេ។ បើគ្រូនោះមិនឲ្យអុជធូបក៏តម្រូវឲ្យយកសំណែនទៅកប់ក្នុងដី ប៉ុន្តែមិនឲ្យយកចបជីកដី ឬ យកចបកាប់រណ្តៅដីទេ ឲ្យយកកូនកាំបិតជីកដីធ្វើបែបនេះជាតំណមរបស់គ្រូគាត់។
លោកអធិការបានបន្តទៀតថា៖ «គ្រូនោះធ្វើរបៀបនេះ ដើម្បីពន្យារពេលងាយស្រួលគាត់ប្រព្រឹត្តអំពើល្មើស»។
លោក អ៊ុង ផាន ប្រាប់ថានៅថ្ងៃទី ២ ខែមករានោះ ម្តាយស្ត្រីរងគ្រោះបានទៅទាន់ឃើញគ្រូនោះកំពុងនៅពីលើកូនស្រីរបស់គាត់។ ប៉ុន្តែគាត់មិនហ៊ានប្រើសម្តីខ្លាំងៗដាក់លោកគ្រូនោះទេ ដោយសារគ្រូនោះមានកូនកាំបិតនៅក្បែរខ្លួនចំនួន ៥ ដើមដែលគាត់ខ្លាចគេចាក់សម្លាប់កូន និងខ្លួនគាត់។ លុះដល់ថ្ងៃទី ៣ ខែមករាទើបម្តាយស្ត្រីរងគ្រោះប្តឹងសមត្ថកិច្ចឲ្យចាប់ខ្លួនតែម្តង៕
