The Phnom Penh Post Search

Search form

Logo of Phnom Penh Post newspaper Phnom Penh Post - គ្រូ​ធ្វើ​កូដកម្ម​ទាមទារ​ឲ្យ​ដក​នាយក​សាលា




គ្រូ​ធ្វើ​កូដកម្ម​ទាមទារ​ឲ្យ​ដក​នាយក​សាលា

គ្រូ​បង្រៀន​ធ្វើ​កូដកម្ម​ក្នុង​សាលា​កាលពី​ម្សិលមិញ។
គ្រូ​បង្រៀន​ធ្វើ​កូដកម្ម​ក្នុង​សាលា​កាលពី​ម្សិលមិញ។ រូបថត សហការី

គ្រូ​ធ្វើ​កូដកម្ម​ទាមទារ​ឲ្យ​ដក​នាយក​សាលា

តាកែវៈ គ្រូ​បង្រៀន​ប្រមាណ ៣០ នាក់​នៃ​​វិទ្យាល័យ​សុខអាន​ក្តីទន្ទឹម​ក្នុង​ស្រុក​សំរោង​បាន​នាំ​គ្នា​លើក​បដា​ធ្វើ​កូដកម្ម​មិន​ចូល​បង្រៀន​កាលពី​ម្សិលមិញ ដើម្បី​ស្នើ​ឲ្យ​​ដក​នាយក​សាលា​ចេញ​ដោយ​ពួកគេ​ចោទ​ថា​នាយក​រូប​នេះ​បាន​ចាយ​ថវិកា​តាម​កម្មវិធី (PB) គ្មាន​តម្លាភាព​។

លោក មាស ម៉ុង គ្រូ​បង្រៀន​ដែល​ចូលរួម​ធ្វើ​កូដកម្ម​ក្នុង​បរិវេណ​វិទ្យាល័យ​បាន​ឲ្យ​ដឹង​ថា មាន​គ្រូ​​ ២៧ នាក់​បាន​នាំគ្នា​លើក​បដា​ក្បែរ​ដង​ទង់ជាតិ​ទាមទារ​ឲ្យ​លោក ឡុង អ៊ិត​ជា​នាយក​ចុះ​ចេញ​ពី​តំណែង​ដោយសារ​លោក​មិន​បាន​ធ្វើការ​អភិវឌ្ឍ​សាលា​ឲ្យ​មាន​ការ​រីកចម្រើន តែ​បែរ​ជា​យក​លុយ​​ PB ដែល​មាន​ប្រមាណ​ ៧ លាន​រៀល​ក្នុង​មួយ​ត្រីមាស​ទៅ​ចាយ​វាយ​​មិន​ត្រឹម​ត្រូវ មិន​តែ​ប៉ុណ្ណោះ​ហេដ្ឋារចនាសម្ព័ន្ធ​ក្នុង​សាលា​ដូចជា​បង្គន់​អនាម័យ​ក៏​មិន​បាន​ជួសជុល​ដែរ​ធ្វើឲ្យ​សិស្ស​មិន​មក​សិក្សា​ជាដើម។

លោក​បន្ត​ថា៖ «បើ​គ្មាន​ដំណោះស្រាយ​ឲ្យ​ពួក​យើង​ដូច​ការ​ទាមទារ​នោះ​យើង​មិន​ព្រម​បញ្ឈប់​កូដកម្ម​ទេ»។

កាលពី​ដើម​ខែ​មករា​គ្រូ​ធ្លាប់​បាន​ធ្វើ​លិខិត​សុំ​អន្តាគមន៍​ឲ្យ​មាន​ការ​ដក​តំណែង​នាយក​​រូប​នេះ​ម្តង​ហើយ ហើយ​ក្រោយ​មក​ក៏​មាន​ការ​សម្រេច​ពី​ក្រសួង​អប់រំ​ចេញ​លិខិត​ព្រមាន​ដល់​នាយក​រូប​នេះ​ថា ជា​កំហុស​រដ្ឋបាល​ប៉ុន្តែ​នៅ​តែ​មិន​ឃើញ​មាន​ការ​កែប្រែ​អ្វី​ឡើយ​។ លោក​បន្ត​ថា​ក្រុម​គ្រូបង្រៀន​សុំ​ឲ្យ​​ដក​​នាយក​នេះ​ចេញ និង​ស្នើ​ដាក់​អ្នក​ថ្មី​ដែល​អាច​អភិវឌ្ឍ​សាលា​បាន។

តាម​បណ្តឹង​ដាក់​ជូន​ក្រសួង​អប់រំ​កាលពី​ម្សិលមិញ​លោកគ្រូ​អ្នកគ្រូ​ទាំងនេះ បាន​រៀបរាប់​ពី​មូលហេតុ​មួយ​ចំនួន​ថា​បន្ទប់​បុគ្គលិក​ក្នុង​សាលា​គ្មាន​កៅអី​អង្គុយ​បរិវេណ​សាលា​គ្មាន​សួនច្បារ​ខ្លោង​ទ្វារ​ និង​ច្រក​ចូល​មិន​បាន​ជួសជុល។

បណ្តឹង​បន្ត​ថា​៖ «គ្មាន​បង្គន់​អនាម័យ​គ្រប់គ្រាន់​មាន​តែ​ ៩ បន្ទប់ឯ ៦ បន្ទប់​ទៀត​ទុក​ឲ្យ​ខូច​ចោល​មិន​ជួសជុល​»​។

ទាក់ទង​ការ​ចាយ​ថវិកា (PB) រាល់​ការ​ចាយ​គឺ​គណនេយ្យ​ និង​នាយក​សាលា​ធ្វើ​ភូតកុហក​ដើម្បី​បង្គ្រប់​លុយ​តែ​ប៉ុណ្ណោះ «មាន​ន័យ​ថា​ការ​សរសេរ​ថា​ទិញ​សម្ភារ​ក្នុង​ទីចាត់ការ​មួយ​ចំនួន​មិន​បាន​ទិញ​។ ការ​សរសេរ​ថា​​ទិញ​សម្ភារ​ឧបទេស​បង្រៀន​ និង​រៀន​មួយ​ចំនួន​មាន​តែ​ក្នុង​វិក្កយបត្រ​តែ​គ្មាន​សម្ភារ​»។

ប៉ុន្តែ លោក ឡុង អ៊ិត បាន​ថ្លែង​កាលពី​ម្សិលមិញ​ថា​រាល់​ការ​ចោទប្រកាន់​ត្រូវ​បាន​ដោះស្រាយ​រួច​ហើយ ហើយ​លោក​មិន​យល់​​ពី​បំណង​កូដកម្ម​របស់​គ្រូបង្រៀន​ទាំងនោះ​ទេ​។ «និយាយ​ឲ្យ​ខ្លី ខ្ញុំ​មិន​ដឹង​អី​ទាំងអស់»។

លោក ស៊ីវ សុខន ប្រធាន​មន្ទីរ​អប់រំ ខេត្ត​តាកែវ បាន​ថ្លែង​ថា៖ «បញ្ហា​នេះ​គឺជា​រឿង​បច្ចេកទេស។ សូម​កុំ​ឲ្យ​ប៉ះពាល់​ដល់​ការ​សិក្សា​របស់​សិស្ស»។

កាលពី​ល្ងាច​ម្សិលមិញ​មន្ត្រី​ពី​ក្រសួង​អប់រំ​បាន​ចុះ​ទៅ​ដល់​សាលា​នេះ​ក៏​ប៉ុន្តែ​គេ​មិន​ដឹង​ថា​តើ​ក្រសួង​នឹង​ដោះស្រាយ​យ៉ាងណា​នៅ​ឡើយ​ទេ​៕

អត្ថបទគួរចាប់អារម្មណ៍