The Phnom Penh Post Search

Search form




Logo of Phnom Penh Post newspaper Phnom Penh Post - គ្រូ​បង្រៀន​ទាមទារ​ឲ្យ​ដំឡើង​ប្រាក់​ខែ​យ៉ាង​តិច ១ លាន​កន្លះ

គ្រូ​បង្រៀន​ទាមទារ​ឲ្យ​ដំឡើង​ប្រាក់​ខែ​យ៉ាង​តិច ១ លាន​កន្លះ

គ្រូបង្រៀន​​ទាមទារ​ឡើង​ប្រាក់​ខែ​នៅក្នុង​ទិវា​គ្រូបង្រៀន​ពិភពលោក​កាលពី​ម្សិលមិញ​។
គ្រូបង្រៀន​​ទាមទារ​ឡើង​ប្រាក់​ខែ​នៅក្នុង​ទិវា​គ្រូបង្រៀន​ពិភពលោក​កាលពី​ម្សិលមិញ​។ ហុង មិនា

គ្រូ​បង្រៀន​ទាមទារ​ឲ្យ​ដំឡើង​ប្រាក់​ខែ​យ៉ាង​តិច ១ លាន​កន្លះ

ភ្នំពេញៈ ក្នុង​ឱកាស​​ទិវា​គ្រូ​បង្រៀន​ពិភពលោក​ពី​ម្សិលមិញ​តំណាង​​ក្រុម​គ្រូ​បង្រៀន​មកពី​តាម​បណ្តា​រាជធានី-ខេត្ត បាន​ស្នើ​ជាថ្មី​តាមរយៈ​ញត្តិ​ផ្ញើ​ទៅ​កាន់​រដ្ឋសភា​រាជរដ្ឋាភិបាល និង​​ក្រសួង​អប់រំ​ឲ្យ​ដំឡើង​ប្រាក់​ខែ​ដល់​​គ្រូបង្រៀន​យ៉ាង​ហោច​ណាស់​ឲ្យ​បាន​ ១ លាន​ ៥ សែន​រៀល (​ប្រហែល ៣៧៥ ដុល្លារ​) និង​ប្រាក់​ឧបត្ថម្ភ​ផ្សេង​ទៀត​ដើម្បី​លើក​កម្ពស់​ជីវភាព​គ្រូ និង​​គុណភាព​អប់រំ។

តាមរយៈ​ប្រធាន​បទ «លើក​កម្ពស់​អំណាច​គ្រូបង្រៀន» ដើម្បី​អបអរសាទរ​ទិវា​គ្រូ​បង្រៀន​ពិភពលោក ៥ តុលា ឆ្នាំ​ ២០១៥ ​នេះ​តំណាង​គ្រូ​បង្រៀន​ជាង ២០០ ​នាក់​ដែល​​មកពី​តាម​បណ្តា​រាជធានី-ខេត្ត​ដែល​ជា​សមាជិក​សមាគម​គ្រូបង្រៀន​​​​កម្ពុជា​ឯករាជ្យ​បាន​ប្រមូល​ផ្តុំ​នៅ​​ទីលាន​ប្រជាធិបតេយ្យ​រាជធានី​ភ្នំពេញ។

ក្នុង​ការ​បង្ហាញ​ពី​ចំណាប់​អារម្មណ៍​របស់​ខ្លួន​មិន​ខុស​គ្នា​តំណាង​គ្រូ​មកពី​តាម​បណ្តា​ខេត្ត​នីមួយៗ​បាន​បង្ហាញ​ពី​ទុក្ខ​លំបាក​ កង្វះ​ខាត​ការ​ផ្គត់ផ្គង់​ជីវភាព​រស់នៅ​របស់​ខ្លួន​ដោយសារ​តែ​ប្រាក់​ខែ​ទាប​ដែល​នាំ​ឲ្យ​ពួក​គាត់​បង្ខំ​ចិត្ត​ស្វែងរក​មុខរបរ​ខាង​ក្រៅ​លក់​ឯកសារ​បង្រៀន​គួរ​ក្រៅ​ម៉ោង​ជាដើម។

លោកគ្រូ ជីវ ប៊ុនថេង បង្រៀន​នៅ​បឋមសិក្សា​មួយ​ក្នុង​រាជធានី​ភ្នំពេញ​បាន​ឲ្យ​ដឹង​ថា៖ «ចំណូល​មធ្យម​របស់​ខ្ញុំ​ក្នុង​ ១ ​ខែ​បាន​ត្រឹមតែ​ជាង ២០០ ​ដុល្លារ​ប៉ុណ្ណោះ​បើ​គិត​ទាំង​លក់​ឯកសារ​ខ្លះ​ផង​អ៊ីចឹង​គឺ​ពិតជា​ពិបាក​រស់​នៅ​ណាស់​ហើយ​ខ្ញុំ​ឆ្លៀត​ពេល​​រក​មុខរបរ​ការងារ​ក្រៅ​បន្ថែម​ដើម្បី​​រកប្រាក់​ចិញ្ចឹម​គ្រួសារ​ទៀត។ ខ្ញុំ​ទទួល​ស្គាល់​ថា​ការ​ធ្វើ​បែប​នេះ​គឺ​ខ្ញុំ​ជា​គ្រូ​មិន​មាន​ពេល​គ្រប់គ្រាន់​ស្រាវជ្រាវ​ហើយ​លទ្ធផល​បង្រៀន​ក៏​មិន​សូវ​មាន​គុណភាព​នោះ​ដែរ»។

លោកស្រី អ៊ុក ឆាយាវី ប្រធាន​ស្តីទី​សមាគម​គ្រូបង្រៀន​កម្ពុជា​ឯករាជ្យ​បាន​ថ្លែង​ថា៖ «ក្រៅពី​រឿង​ប្រាក់​បៀវត្សរ៍ ​អំពើ​ពុករលួយ បក្ខពួក​និយម ការ​រើសអើង​ចំពោះ​គ្រូបង្រៀន​ដែល​ជា​សមាជិក​សមាគម​ក៏​នៅ​តែ​ជា​បញ្ហា​ដែល​​ធ្វើឲ្យ​វិស័យ​អប់រំ​មិន​មាន​​ភាព​រឹងមាំ។ មួយ​វិញ​ទៀត​គឺ​ការ​ហាមឃាត់​និយាយ​ពី​រឿង​នយោបាយ​នៅ​សាលារៀន​ខ្ញុំ​គិត​ថា​ក្រសួង​ត្រូវ​ពិចារណា​លើ​បញ្ហា​ទាំង​នេះ​បើ​ពុំ​នោះ​ទេ​ច្បាស់​ជា​ពិបាក​ក្នុង​ការ​ធានា​នូវ​គុណភាព​វិស័យ​នេះ»​។

ក្នុង​ការ​ប្រារព្ធ​ទិវា​គ្រូបង្រៀន​កាលពី​ម្សិលមិញ​តំណាងរាស្ត្រ និង​ជា​អ្នក​នាំពាក្យ​គណបក្ស​សង្គ្រោះ​ជាតិ​លោក យឹម សុវណ្ណ ដែល​​បាន​ស្តាប់​នូវ​ការ​ថ្លែង​ពី​ទុក្ខ​លំបាក​របស់​គ្រូបង្រៀន​ក៏​បាន​បង្ហាញ​ការ​គាំទ្រ​ចំពោះ​ការ​ស្នើ​សុំ​ទាំង​នោះ​ដោយ​លោក​សន្យា​​នឹង​​លើក​យក​បញ្ហា​នេះ​ទៅ​ពិភាក្សា និង​ពិចារណា​ដាក់​បញ្ចូល​ក្នុង​កញ្ចប់​ថិវកា​ជាតិ។

លោក​ថា៖ «វាសនា​ប្រទេស​ជាតិ​គឺ​ពឹង​​ផ្អែក​លើ​គ្រូបង្រៀន​ដូចនេះ​យើង​ត្រូវតែ​វាយតម្លៃ​ខ្ពស់​ចំពោះ​ការ​ខិតខំ​របស់​គ្រូបង្រៀន​ហើយ​លើក​កម្ពស់​ជីវភាព​របស់​ពួកគាត់​ឲ្យ​បាន​សមរម្យ និង​មាន​សក្តានុពល​ដើម្បី​បណ្តុះបណ្តាល​ធនធាន​មនុស្ស​ជូន​ប្រទេស​យើង»។

អ្នក​នាំពាក្យ​ក្រសួង​អប់រំ​លោក រស់ សាលីន បាន​ឲ្យ​ដឹង​ថា​ក្រសួង​បាន​និង​កំពុង​យក​ចិត្ត​ទុកដាក់​ក្នុង​ការ​​សម្រេច​ដំឡើង​ប្រាក់​បៀវត្សរ៍​សម្រាប់​គ្រូបង្រៀន និង​ពង្រឹង​គុណភាព​អប់រំ​។

លោក សាលីន បាន​បញ្ជាក់​​ថា៖ «ក្រសួង​បាន​ដឹង​ពី​ទុក្ខ​លំបាក​របស់​បងប្អូន​គ្រូបង្រៀន​តែ​ការ​ដំឡើង​គឺ​ត្រូវ​ធ្វើ​ឡើង​តាម​ដំណាក់ៗ និង​ធានា​នូវ​តុល្យភាព​ចរន្ត​ចំណូល និង​ចំណាយ​ដែល​ជា​ថវិកា​រដ្ឋ​ផង​ដែរ​​»​។ បើ​តាម​លោក សាលីន បច្ចុប្បន្ន​គ្រូ​បង្រៀន​កម្រិត​បឋមសិក្សា​ទទួល​បាន​ប្រាក់​បៀវត្សរ៍​ចន្លោះ​ពី ៦៥ ម៉ឺន​រៀល ដល់​ ៨៦ ម៉ឺន​រៀល កម្រិត​អនុវិទ្យាល័យ​ពី ៧៣ ម៉ឺន​រៀល​ទៅ​ ៩៩ ​ម៉ឺន​រៀល​កម្រិត​មធ្យម​សិក្សា​ពី ៨០ ម៉ឺន​រៀល​ទៅ ១ លាន ១ ​សែន ៦ ម៉ឺន​រៀល និង​កម្រិត​ឧត្តម​សិក្សា​ពី ៩០ ម៉ឺន​រៀល​ទៅ​ ១ លាន ២ សែន​ ៨ ម៉ឺន​រៀល​។ លោក​បញ្ជាក់​ថា​សម្រាប់​ផែនការ​ក្នុង​ឆ្នាំ​ ២០១៦ ខាង​មុខ​បៀវត្សរ៍​គ្រូ​បង្រៀន​កម្រិត​បឋមសិក្សា​នឹង​ត្រូវ​ដំឡើង​យ៉ាង​តិច​បំផុត ៨០ ម៉ឺន​រៀល៕

អត្ថបទគួរចាប់អារម្មណ៍