ភ្នំពេញៈ លោកគ្រូ អ្នកគ្រូ បុគ្គលិកបម្រើការក្នុងវិស័យអប់រំ គ្រប់ជាន់ថ្នាក់ ទាំងក្នុងវិស័យសាធារណៈ និងឯកជនសរុបចំនួន ១៦ ម៉ឺន ៨ ពាន់នាក់នៅទូទាំង ២៥ ខេត្ត-រាជធានី បានស្ម័គ្រចិត្តចាក់វ៉ាក់សាំងប្រឆាំងកូវីដ ១៩ ខណៈការចាក់វ៉ាក់សាំងមានដំណើរការរលូនទូទាំងប្រទេសចាប់តាំងពីថ្ងៃចាប់ផ្ដើមចាក់មក។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាថ្លែងពីម្សិលមិញថា តាមគោលការណ៍របស់រាជរដ្ឋាភិបាលក្រសួងអប់រំបានចាប់ផ្តើមដំណើរការ ការចាក់វ៉ាក់សាំង ស៊ីណូវ៉ាក់ (Sinovac) ពីថ្ងៃទី ១ ខែមេសា ២០២១ ជូនដល់បុគ្គលិកអប់រំសាធារណៈ និងឯកជនដែលបានស្ម័គ្រចិត្ត សរុប ១៦ ម៉ឺន ៨ ពាន់នាក់នៅទូទាំង ២៥ ខេត្ត-រាជធានី។
លោកថ្លែងថា៖ «តាំងពីថ្ងៃទី ១ ខែមេសាដល់ថ្ងៃម្សិលមិញមិនមានហេតុការណ៍គួរឱ្យកត់សម្គាល់ទេ។ ការចាក់វ៉ាក់សាំងមានដំណើរការរលូនទូទាំងប្រទេស»។ គិតត្រឹមថ្ងៃម្សិលមិញមិនទាន់មានទិន្នន័យសរុបនៃអ្នកបានចាក់វ៉ាក់សាំងដូសទី ១ នៅឡើយទេ។
ប៉ុន្ដែលោកបានឱ្យដឹងថា នៅភ្នំពេញមានបុគ្គលិកអប់រំស្ម័គ្រចិត្តចាក់សរុបចំនួន ៣៤ ៧៣១ នាក់ ហើយបើគិតត្រឹមថ្ងៃទី ៥ ខែមេសាចាក់បាន ៥៨%។ ក្រសួងអប់រំមានផែនការចាក់វ៉ាក់សាំងដូសទី ១ ចាប់ពីថ្ងៃទី ១ ខែមេសាដល់ថ្ងៃទី ១០ ខែមេសា។ រីឯផែនការចាក់ដូសទី ២ ចាប់ពីថ្ងៃទី ១៥ ខែមេសា ដល់ថ្ងៃទី ២៤ ខែមេសា ឆ្នាំ ២០២១។
បើតាមក្រសួងអប់រំ ដំណើរការផ្តល់វ៉ាក់សាំងបានប្រព្រឹត្តទៅដោយរលូន និងដោយស្មារតីអនុគ្រោះកម្រិតខ្ពស់ ដោយមានគោលដៅធានាសុខភាពសុខុមាលភាព និងសុវត្ថិភាពជូនបុគ្គលិកអប់រំកម្ពុជាទាំងអស់គ្នា។
ក្រសួងអប់រំបានអំពាវនាវដល់លោកគ្រូ-អ្នកគ្រូ បុគ្គលិកអប់រំ បុគ្គលិកបម្រើការក្នុងវិស័យអប់រំ គ្រប់ជាន់ថ្នាក់ ទាំងក្នុងវិស័យសាធារណៈ និងឯកជន ដែលមានឈ្មោះក្នុងបញ្ជីទទួលវ៉ាក់សាំងឱ្យចុះឈ្មោះក្នុងកម្មវិធីទូរស័ព្ទដៃ Android KhmerVacc ឬតាមវេបសាយ https://cambodia-vaccine.gov.kh/patient/create ហើយរង់ចាំទទួលកម្មវិធីផ្តល់វ៉ាក់សាំង តាមការរៀបចំរបស់ក្រសួង ឬមន្ទីរអប់រំ។
អង្គការយូណេស្កូនៅថ្ងៃទី ៦ ខែមេសា បានចេញផ្សាយអត្ថបទស្រាវជ្រាវមួយដោយបង្ហាញថា ប្រទេសកម្ពុជា គឺស្ថិតក្នុងចំណោមប្រទេសចំនួន ១៧ ផ្សេងទៀតក្នុងពិភពលោកដែលបានផ្តល់អាទិភាពចំពោះការចាក់វ៉ាក់សាំងសម្រាប់គ្រូបង្រៀន។
យូណេស្កូបានឱ្យដឹងថា ក្នុងខែមីនា ឆ្នាំ ២០២១ នេះគឺរយៈពេល ១ ឆ្នាំ វិបត្តិនៃការរីករាលដាលជំងឺកូវីដ១៩ អង្គការយូណេស្កូ និងក្រុមការងារអន្តរជាតិស្តីពីគ្រូសម្រាប់ការអប់រំឆ្នាំ ២០-៣០ បានធ្វើការស្ទង់មតិមួយអំពីប្រទេស ដើម្បីសួរថា តើប្រទេសនានាបានផ្តល់អាទិភាពដល់គ្រូនៅក្នុងផែនការជាតិយ៉ាងដូចម្តេច។ ផ្អែកលើទិន្នន័យពីប្រទេសចំនួន ១៥០ រួមមានទិន្នន័យពីការស្ទង់មតិរបស់យូណេស្កូ យូនីសេហ្វ ធនាគារពិភពលោកស្តីពីការឆ្លើយតបការអប់រំថ្នាក់ជាតិ ចំពោះការបិទសាលារៀនក្នុងពេលនៃការរីករាលដាលកូវីដ ១៩។
ការស្រាវជ្រាវបានរកឃើញថា មានតែប្រទេសចំនួន ១៧ បានផ្តល់អាទិភាពដល់គ្រូនៅក្នុងក្រុមទី១ សម្រាប់ការចាក់វ៉ាក់សាំងក្នុងនោះរួមមានប្រទេសកៀហ្ស៊ីស៊ីស្ថាន តាហ្ស៊ីគីស្ថាន និងអ៊ូសបេគីស្ថាន និងបណ្តាប្រទេសដែលមានប្រាក់ចំណូលមធ្យម និងទាបមួយចំនួនទៀតរួមមានប្រទេសកម្ពុជា វៀតណាម និង ហ្គំប៊ី រវ៉ាន់ដា និងអ៊ូហ្គង់ដា។
យូណេស្កូបានជំរុញឱ្យប្រទេសទាំងអស់ផ្តល់អាទិភាពដល់គ្រូបង្រៀនក្នុងផែនការចាក់វ៉ាក់សាំងប្រយុទ្ធប្រឆាំងនឹងកូវីដ ១៩ ដើម្បីធានាថា ការអប់រំអាចបន្តដោយសុវត្ថិភាពហើយសាលារៀននៅតែបើកចំហ។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យបានឱ្យដឹងថា លោកស្រីមិនបានចុះឈ្មោះចាក់វ៉ាក់សាំងទេ ព្រោះមានបញ្ហាជំងឺទឹកនោមផ្អែមធ្ងន់ធ្ងរ។ ប៉ុន្ដែលោកស្រីអះអាងថា លោកគ្រូ-អ្នកគ្រូ និងបុគ្គលិកអប់រំ គឺបានស្ម័គ្រចិត្ដចុះឈ្មោះចាក់វ៉ាក់សាំងដោយខ្លួនឯងដោយមិនមានការបង្ខិតបង្ខំឡើយ។
លោកស្រីបញ្ជាក់ថា៖ «លោកគ្រូអ្នកគ្រូភាគច្រើនគឺបានចុះឈ្មោះចាក់វ៉ាក់សាំងច្រើនគ្នាហើយ អ្នកដែលមិនបានចុះឈ្មោះចាក់វ៉ាក់សាំង គឺមានតែអ្នកមានជំងឺ មានផ្ទៃពោះ និងមានកូនកំពុងបំបៅដោះជាដើម»។ លោកស្រីបានឱ្យដឹងថា ក្រោយការចាក់វ៉ាក់សាំង លោកគ្រូ អ្នកគ្រូ បានផ្ដល់ព័ត៌មានតាមបណ្ដាញក្រុមតេឡេក្រាមថា គ្មានបញ្ហាមិនប្រក្រតីចំពោះសុខភាពណាមួយកើតឡើង បន្ទាប់ពីចាក់វ៉ាក់សាំងស៊ីណូវ៉ាក់នេះទេ៕