ព្រះវិហារ:សមាគមគ្រូបង្រៀន និងគ្រូមួយចំនួនក្នុងខេត្តព្រះវិហារ រិះគន់នឹងបម្រាមដែលមន្ទីរអប់រំខេត្តនេះ ហាមគ្រូបង្រៀនទូទាំងខេត្ត យកថ្ងៃអាទិត្យ និងថ្ងៃបុណ្យជាថ្ងៃឈប់សម្រាករបស់សិស្សទៅបង្រៀនគួរក្រៅម៉ោង ដោយថា បម្រាមនេះ ហាក់រំលោភលើសិទ្ធិឯកជន តែក្រសួងអប់រំថា ប្រធានមន្ទីរអប់រំ មានសិទ្ធិក្នុងការចេញបម្រាមបែបនេះ។
លិខិតដែលចេញដោយមន្ទីរអប់រំខេត្តព្រះវិហារ ផ្ញើជូននាយកសាលាទូទាំងខេត្តព្រះវិហារ កាលពីថ្ងៃអង្គារបានហាម ការបង្រៀនគួរនៅថ្ងៃអាទិត្យ និងថ្ងៃបុណ្យជាតិ បុណ្យអន្តរជាតិ ទោះជាក្នុងបរិវេណសាលារៀនក្តី ឬក្រៅបរិវេណសាលារៀនក្តី ដោយអះអាងថា ការធ្វើបែបនេះបានជះឥទ្ធិពលមិនល្អ មកលើការសិក្សារបស់សិស្សានុសិស្សនិងប៉ះពាល់យ៉ាងធ្ងន់ធ្ងរដល់ប្រសិទ្ធភាព គុណភាព ក្នុងការបង្រៀន និងរៀនដែលបម្រាមនេះធ្វើឡើង ដើម្បីឆ្លើយតបនឹងសំណូមពររបស់អាណាព្យាបាលសិស្ស។
លោក ចេន លឹមហ៊ាន់ ប្រធានមន្ទីរអប់រំ ខេត្តព្រះវិហារ បានបញ្ជាក់ក្នុងលិខិតរបស់ខ្លួនថា បច្ចុប្បន្នការបង្រៀនក្រៅម៉ោង (រៀនគួរ) កំពុងមានឥទ្ធិពលមិនល្អ មកលើការសិក្សារបស់សិស្សានុសិស្សម្យ៉ាងទៀត លោកគ្រូ អ្នកគ្រូខ្លះឆ្លៀតពេលបង្រៀនគួរថ្ងៃអាទិត្យ ថ្ងៃបុណ្យ ធ្វើឲ្យសិស្សមិនមានពេលបានឈប់សម្រាក ដែលធ្វើឲ្យប៉ះពាល់ដល់ចិត្តសាស្ត្រគរុកោសល្យ ធ្វើឲ្យការបង្រៀន និងរៀន គ្មានប្រសិទ្ធភាព និងគុណភាព។ ដូច្នេះលោកហាមដាច់ខាត មិនឲ្យគាបសង្កត់ ឬបង្ខំសិស្សឲ្យរៀនគួរនៅថ្ងៃអាទិត្យ និងថ្ងៃឈប់សម្រាកឡើយ។
លោក លឹមហ៊ាន់ ព្រមានថា៖ «ករណីលោកគ្រូ អ្នកគ្រូដែលបង្រៀនគួរ មិនអនុវត្តតាមការណែនាំ សូមនាយកសាលារាយការណ៍មកការិយាល័យអប់រំដើម្បីមានវិធានការរដ្ឋបាល»។
លោក ធួន ពុទ្ធ ជាគ្រូបង្រៀនផ្នែកភាសាអង់គ្លេស នៅអនុវិទ្យាល័យហ៊ុនសែន រវៀង ប្រាប់ភ្នំពេញប៉ុស្តិ៍ពីម្សិលមិញថា បម្រាមនេះ បានរំលោភសិទ្ធិសេរីភាពរបស់ពួកគាត់ដែលជាទូទៅ ថ្ងៃឈប់សម្រាក គឺជាសិទ្ធិឯកជន របស់ពួកគាត់ ហើយសិស្សានុសិស្ស មានជម្រើសក្នុងការមករៀនគួរបន្ថែមតាមចិត្តរបស់ពួកគេ។
លោកបន្តថា ការដែលគ្រូបង្រៀនបើកបង្រៀនគួរព្រោះចង់ផ្ទេរចំណេះដឹង ទៅសិស្សបន្ថែម ស្របពេលកត្តាជីវភាពរបស់ពួកគាត់មិនល្អ ដែលត្រូវរកកម្រៃបន្ថែម ក្នុងថ្ងៃឈប់សម្រាកនេះ តែបើមន្ទីរហាមបែបនេះ វាជាការបិទសេរីភាពរបស់ពួកគាត់តែម្តង។
លោកបញ្ជាក់ថា៖ «មន្ទីរមានគោលនយោបាយក្នុងការដឹកនាំហ្នឹង ថាតើគ្រូបង្ខំសិស្សមានមូលហេតុអ្វី អាហ្នឹងយើងរកមូលហេតុឲ្យឃើញ មិនមែនចេះតែប្រកាសបិទអ៊ីចឹងទេ ព្រោះវាមិនមែនជាលក្ខណៈទូទៅទេ វាជាលក្ខណៈបុគ្គលទេ។ បញ្ហាបង្ខំសិស្សឲ្យរៀនគួរនេះគឺជារឿងបុគ្គល ហើយតែមួយចំនួនតូចទេ ដូច្នេះមន្ទីរគួរតែដោះស្រាយឲ្យត្រូវសាច់រឿង មិនមែនចេញបម្រាមបែបនេះទេ។ យើងសុំកុំឲ្យចេញបម្រាម ដោយទុកឲ្យសិស្សគាត់សម្រេចចិត្តដោយខ្លួនគាត់ ថា សិស្សត្រូវទៅ ឬមិនចង់ទៅគឺជាសិទ្ធិរបស់គាត់ហើយបើគ្រូណាគាត់ចាប់បង្ខំ ប្តឹងផ្តល់គាត់ទៅ»។
លោកស្រី អ៊ុក ឆាយ៉ាវី ប្រធានសមគមគ្រូបង្រៀនកម្ពុជាឯករាជ្យបានលើកឡើងស្រដៀងគ្នាដែរថា មន្ទីរអប់រំខេត្តព្រះវិហារ មិនគួរណាចេញបម្រាមបែបនេះនោះទេ។ លោកស្រី សង្កត់ធ្ងន់ថា ទង្វើនេះ គឺរឹតត្បឹតការដើរហើរ និងការសិក្សារបស់ក្មេងៗ និងការបង្រៀនរបស់លោកគ្រូអ្នកគ្រូ ដែលលោកស្រីយល់ថា ជាការប្រសើរទៅវិញទេ បើគ្រូបើកបង្រៀនគួរ នៅថ្ងៃឈប់សម្រាក ដោយមិនយកម៉ោងរដ្ឋមកបង្រៀន។
លោកស្រីបញ្ជាក់ថា៖ «នេះជាការរំលោភសិទ្ធិរបស់លោកគ្រូ អ្នកគ្រូយើង ជាពិសេសគឺសិស្សានុសិស្សយើង ព្រោះអីសិទ្ធិរបស់គាត់ នៅក្នុងថ្ងៃឈប់សម្រាក គាត់អត់មានបានយកម៉ោងសិក្សាទៅបង្រៀនគួរអីថា អ្នកគ្រូលោកគ្រូយើងខុស តែសិទ្ធិឯកជនរបស់គាត់ នៅថ្ងៃឈប់សម្រាកគាត់ចង់ធ្វើអ្វីគាត់ចង់បង្រៀន គាត់ចង់ដើរលេង គឺជាសិទ្ធិរបស់គាត់ មិនត្រូវស្ថាប័ននេះចេញសារាចរ បែបនេះទេ»។
បើតាមលោក រស់ សុវាចា អ្នកនាំពាក្យក្រសួងអប់រំ ឲ្យដឹងថា កន្លងទៅក្រសួងអប់រំ ធ្លាប់បានចេញបម្រាមជាច្រើនដងមកហើយ ក្នុងការហាមគ្រូបង្រៀនទូទាំងប្រទេស មិនឲ្យបង្រៀនគួរក្នុងម៉ោងសិក្សា និងនៅចុងម៉ោងសិក្សា ដោយសារថា ធ្វើឲ្យប៉ះពាល់ដល់គុណភាពអប់រំ។
ប៉ុន្តែបើទោះជាក្រសួង មិនបានចេញបម្រាមហាមឲ្យគ្រូបង្រៀននៅខេត្តព្រះវិហារ បង្រៀនគួរនៅថ្ងៃអាទិត្យុ និងថ្ងៃបុណ្យក៏ដោយ ក៏អ្នកនាំពាក្យរូបនេះអះអាងថា ករណីនេះ មន្ទីរអាចប្រើប្រាស់សិទ្ធិរបស់ខ្លួន ក្នុងការចេញបម្រាមនានា ដើម្បីឆ្លើយតបនឹងតម្រូវការជាក់ស្តែង និងសំណូមពរពីសំណាក់អាណាព្យាបាលសម្រាប់គ្រប់គ្រងនៅក្នុងដែនដីរបស់ខ្លួន ព្រោះមន្ទីរមានសិទ្ធិ។
លោកបញ្ជាក់ថា៖«ករណីដាច់ដោយឡែកក្នុងខេត្តព្រះវិហារនេះ គឺជាការគ្រប់គ្រងដែលគាត់ជាប្រធានមន្ទីរ មានសិទ្ធិក្នុងការចេញសេចក្តីណែនាំ យោងទៅលើសមត្ថកិច្ចរបស់គាត់ ដោយពិភាក្សាទៅលើសំណូមពរអាណាព្យាបាលមាតាបិតារបស់សិស្សជាក់ស្តែង»។
ទោះយ៉ាងណាលោកបញ្ជាក់បន្តថា៖ «ការបង្រៀនគួរមិនមែនជារឿងខុសច្បាប់ទេដូចនៅក្នុងប្រទេសកម្ពុជាយើង ការបង្រៀនគួរ ក្រសួងមិនហាមមិនឲ្យមានការបង្រៀនគួរនោះសោះតែម្តងទេគឺ (ក្រសួង) ហាមមិនឲ្យបង្រៀនគួរក្នុងម៉ោងសិក្សា ជាពិសេសនៅចុងម៉ោងសិក្សាដែលប៉ះពាល់ដល់សុខភាពសិស្ស និងគុណភាពគ្រូតែម្តង។ ប៉ុន្តែការបង្រៀនគួរនោះត្រូវស្ថិតនៅក្នុងការយោគយល់គ្នាបានន័យថាឪពុកម្តាយ ហើយ និងសិស្សជាមួយនឹងគ្រូមានការយល់ព្រមគ្នានោះការបង្រៀនគួរមិនត្រូវបានហាមទេ»៕