.jpg)
នារីម្នាក់កំពុងពន្យល់ប្រាប់ប្អូនប្រុសរបស់ខ្លួន ពីបច្ចេកទេសរៀនតាមប្រព័ន្ធអនឡាញ នៅភូមិបាក់ខែង ខណ្ឌជ្រោយចង្វារ រាជធានីភ្នំពេញកាលពីថ្ងៃទី ១៥ ខែមីនា។ ហុង មិនា
ភ្នំពេញៈ នៅថ្ងៃទី ១ ខែមេសានេះ ក្រសួងអប់រំ យុវជន និងកីឡា បើកសិក្ខាសាលា ស្តីពីការរៀនតាមរយៈប្រព័ន្ធអេឡិចត្រូនិក “eLearning Platform” តាមអនឡាញ ជាមួយគ្រូបង្រៀនតាមបណ្តារាជធានី-ខេត្តចំនួន ១០០ នាក់ ដើម្បីស្វែងយល់ពីភាពខុសគ្នា រវាងការសិក្សាតាមប្រព័ន្ធអេឡិចត្រូនិក និងសិក្សាដោយជួបគ្នាផ្ទាល់នៅក្នុងថ្នាក់។
អ្នកចូលរួមក្នុងសិក្ខាសាលា ស្តីពីការររៀនតាមរយៈប្រព័ន្ធអេឡិចត្រូនិកនេះ រួមមានគ្រូបង្រៀននៅសាលាគរុកោសល្យ និងវិក្រឹតការមជ្ឈមណ្ឌលគរុកោសល្យភូមិភាគ និងវិទ្យាស្ថានគរុកោលស្យរាជធានី-ខេត្តប្រមាណ ១០០ នាក់។ អ្នកចូលរួមនឹងស្វែងយល់ពីភាពខុសគ្នា រវាងការសិក្សា តាមរយៈអេឡិចត្រូនិក និងការសិក្សាដោយជួបគ្នាផ្ទាល់។
លោក រស់ សុវាចា អ្នកនាំពាក្យក្រសួងអប់រំ ថ្លែងនៅថ្ងៃទី ៣១ ខែមីនាថា យុទ្ធសាស្រ្តរបស់ក្រសួងអប់រំ សម្រាប់លើកកម្ពស់ការអប់រំតាមបែបឌីជីថល គឺបញ្ជ្រាបបច្ចេកវិទ្យាព័ត៌មាន និងសារគមនាគមន៍ (ប.ព.ស) ឱ្យក្លាយជាឧបករណ៍សម្រាប់បង្រៀន និងរៀននិងចែករំលែកចំណេះដឹង ក្នុងវិស័យអប់រំទាំងមូល សំដៅឱ្យសិស្សនិស្សិត នូវចំណេះដឹង និងបំណិន ប.ព.ស ដើម្បីធ្វើអន្តរកាលទៅរកពិភពការងារក្នុងសតវត្សរ៍ទី២១។
លោកបញ្ជាក់ថា៖ «ក្រសួងបានប្រើប្រាស់ដំណើរការគ្រប់គ្រង និងបែបបទការងារថ្មី ដើម្បីធ្វើទំនើបកម្មការអនុវត្តការងារ និងបង្កើនប្រសិទ្ធភាព តម្លាភាព និងភាពស័ក្តិសិទ្ធិ នៃអភិបាលកិច្ច និងការពិនិត្យតាមដានលទ្ធផលការងារ ក្នុងវិស័យអប់រំ។ ក្រសួងធានាឱ្យសិស្សនិស្សិតកម្ពុជាគ្រប់រូប បញ្ចប់ការសិក្សាក្នុងប្រព័ន្ធមានចំណេះដឹង និងបំណិន ប.ព.ស. ដើម្បីមានលទ្ធភាពបន្តការសិក្សា និងបំពេញការងារវិជ្ជាជីវៈ»។
បើតាមនាយកដ្ឋានបច្ចេកវិទ្យាព័ត៌មាន នៃក្រសួងអប់រំ ការសិក្សាតាមប្រព័ន្ធអេឡិកត្រូនិក គឺជាការប្រើប្រាស់កុំព្យទ័រ ឧបករណ៍វៃឆ្លាត និងបច្ចេកវិទ្យាព័ត៌មាន សម្រាប់ការរៀន និងបង្រៀនមានដូចជា ការប្រើប្រាស់កុំព្យូទ័រ សម្រាប់ធ្វើឱ្យកាន់តែប្រសើរឡើង ក្នុងការសិក្សាពីចម្ងាយរវាងគ្រូ និងសិស្ស។
ការសិក្សាបែបនេះ ផ្ដល់នូវភាពបត់បែនសម្រាប់អ្នករៀនក៏ដូចជាសម្រាប់គ្រូ។ អ្នករៀនអាចជ្រើសរើសល្បឿននៃការរៀន ដោយខ្លួនឯងបាន។ កាត់បន្ថយកត្ដារារាំងផ្សេងៗ ដើម្បីចូលរួមក្នុងវគ្គសិក្សា ដែលក្នុងនោះអ្នកសិក្សា និងគ្រូ អាចជ្រើសរើសពេលវេលា និងទីកន្លែងសម្រាប់រៀន និងបង្រៀន មិនបាច់ចំណាយពេលវេលាក្នុងការធ្វើដំណើរ មិនចាច់ចំណាយថ្លៃសម្រាប់ការស្នាក់នៅ និងមិនបាច់ឈប់សម្រាកពីការងារដែលកំពុងធ្វើដើម្បីមករៀនឡើយ។
លោក រស់ សុវាចា បានបន្ថែមថា ជាទូទៅសួងអប់រំស្វាគមន៍កិច្ចសហការវិជ្ជមាន ពីសំណាក់ក្រសួង-ស្ថាប័ន និងគ្រប់ភាគី ពាក់ព័ន្ធ ក្នុងការលើកកម្ពស់ការអប់រំ តាមបែបឌីជីថល ដែលស្របនឹងផែនការយុទ្ធសាស្ត្រវិស័យអប់រំ ២០១៩-២០២៣ ដើម្បីឆ្លើយតបនឹងសេដ្ឋកិច្ចឌីជីថល របស់រាជរដ្ឋាភិបាល។
លោកថ្លែងថា ដំណាក់កាលបន្ទាប់ ២០១៩-២០២៣ និងឆ្ពោះទៅឆ្នាំ ២០៣០ ក្រសួងអប់រំ ប្តេជ្ញាសម្រេចឱ្យបានគោលដៅអភិវឌ្ឍន៍ប្រកបដោយចីរភាពទី៤ ស្តីពីការអប់រំ ដោយឈរលើគោលការណ៍ គុណភាព សមធម៌ បរិយាបន្ន ការសិក្សាពេញមួយជីវិត និងទាំងអស់គ្នា៕
