.jpg)
ទឹកជំនន់លិចចូលដល់បន្ទប់អ្នកជំងឺនៅអគារមន្ទីរពេទ្យស្រុកអង្គរជុំ ខេត្តសៀមរាបកាលពីថ្ងៃទី ២៤ កញ្ញា។ រូបថត FN
សៀមរាបៈ អ្នកជំងឺ ៤៣ នាក់ ក្នុងនោះមានធ្ងន់ធ្ងរ ៦ នាក់ កាលពីថ្ងៃទី ២៤ កញ្ញា ត្រូវបានជម្លៀសចេញពីមន្ទីរពេទ្យបង្អែកអង្គរជុំ ស្រុកអង្គរជុំ ខេត្តសៀមរាប ហើយបញ្ជូនបន្តទៅព្យាបាលនៅមន្ទីរពេទ្យស្រុកពួកវិញ ដោយសារទឹកជំនន់លិចទីធ្លាមន្ទីរពេទ្យ និងចូលដល់អគារសម្រាករបស់អ្នកជំងឺ ប៉ុន្ដែមន្ត្រីអះអាងថារហូតមកដល់ថ្ងៃទី ២៥ កញ្ញា ទឹកចាប់ផ្ដើមស្រកទៅវិញខ្លះហើយ ។
លោក ម៉ក់ សំអឿន ប្រធានការិយាល័យសុខាភិបាលស្រុកប្រតិបត្តិអង្គរជុំបានប្រាប់ភ្នំពេញ-ប៉ុស្ដិ៍កាលពីថ្ងៃទី ២៤ កញ្ញា ថារហូតមកដល់ពេលនេះស្ថានភាពទឹកជំនន់បានស្រកទៅវិញខ្លះហើយ ក្រោយពីទឹកទើបតែឡើងនៅយប់ថ្ងៃទី ២៤ កញ្ញាដែលបណ្ដាលឲ្យប៉ះពាល់អ្នកជំងឺចំនួន ៤៣ នាក់នោះ។
លោកបន្តថាក្រោយពីមានទឹកជំនន់ចូលមកក្រុមគ្រូពេទ្យបានចល័តអ្នកជំងឺទាំងអស់ចេញពីមន្ទីរពេទ្យដោយបានបញ្ជូនពួកគាត់មួយចំនួនទៅសម្រាកព្យាបាលនៅមន្ទីរពេទ្យស្រុកពួកវិញ។ ក្នុងនោះ ៣៧ នាក់ដែលមានស្ថានភាពធូរស្រាលបានត្រឡប់ទៅផ្ទះវិញ ប៉ុន្ដែត្រូវបានគ្រូពេទ្យឲ្យថ្នាំពួកគាត់សម្រាប់ហូបព្យាបាលបន្តនៅផ្ទះទៀត។
លោកបញ្ជាក់ថា៖ «ចំពោះអ្នកជំងឺចំនួន ៦ នាក់ ដែលស្ថានភាពជំងឺធ្ងន់នោះ យើងបានដឹកជញ្ជូនគាត់តាមរថយន្តសង្គ្រោះបន្ទាន់ទៅមន្ទីរពេទ្យស្រុកពួក។ នៅស្រុកអង្គរជុំនេះក៏មានលិចមណ្ឌលសុខភាពចំនួន ៥ ផ្សេងទៀត ប៉ុន្ដែមណ្ឌលសុខភាពទាំងនោះមិនមានអ្នកជំងឺស្នាក់នៅព្យាបាលនៅទីនោះទេ។ ដូច្នេះវាមិនសូវចោទជាបញ្ហាដល់អ្នកជំងឺទេ»។
លោក ណុប វ៉ាន់នី ប្រធានមន្ទីរពេទ្យអង្គរជុំថ្លែងពីម្សិលមិញថាស្ថានភាពទឹកជំនន់បានស្រកទៅវិញខ្លះហើយមកដល់ថ្ងៃទី ២៥ កញ្ញានេះ។ ប៉ុន្តែអ្នកជំងឺត្រូវទុកបន្តព្យាបាលនៅមន្ទីរពេទ្យស្រុកពួកមួយរយៈសិនដោយមិនទាន់កំណត់យកមកវិញនៅពេលណាទេ។
រីឯអ្នកជំងឺមកថ្មីមន្ទីរពេទ្យទទួលព្យាបាលបន្តជាធម្មតា ប៉ុន្តែមិនអនុញ្ញាតឱ្យស្នាក់នៅទេដោយគ្រាន់តែពិនិត្យរួចហើយផ្តល់ថ្នាំ។ ទោះយ៉ាងណាមិនមានអ្វីប៉ះពាល់ធ្ងន់ធ្ងរដល់អ្នកជំងឺទេ ព្រោះក្រុមគ្រូពេទ្យបានបញ្ជូនអ្នកជំងឺទាំង ៤៣ នាក់ចេញពីមន្ទីរពេទ្យអង្គរជុំរួចរាល់ហើយ។
លោកបញ្ជាក់ថា៖ «ទឹកហ្នឹងវាជន់លិចពីយប់ថ្ងៃទី ២៤ កញ្ញាដែលធ្វើឲ្យបុគ្គលិកយើងមិនបានសម្រាកទេ គឺបានចល័តអ្នកជំងឺចេញពីមន្ទីរពេទ្យ ដើម្បីការពារកុំឲ្យមានបញ្ហា ជាពិសេសយើងប្រយ័ត្នការឆ្លងចរន្តអគ្គិសនីដោយខ្ញុំបានបិទអគ្គិសនីទាំងអស់។ ដំបូងវាលិចត្រឹមទីធ្លាមុខអគារហ្នឹងទេ តែបន្ដិចក្រោយមកវាឡើងចូលដល់ក្នុងអគារអ្នកជំងឺយើងកំពុងស្នាក់នៅ ហើយយើងក៏ចាប់ផ្ដើមចល័តពួកគាត់ចេញពីអគារនោះ»។
លោក លុក ផុស អភិបាលស្រុកអង្គរជុំថ្លែងថា មន្ត្រីចម្រុះ និងក្រុមគ្រូពេទ្យបានជួយសង្គ្រោះអ្នកជំងឺចេញពីមន្ទីរពេទ្យអង្គរជុំអស់ហើយ។ ក្រោយពីបញ្ជូនដល់មន្ទីរពេទ្យពួក ក្រុមគ្រូពេទ្យបានសហការគ្នាជួយពួកគាត់យ៉ាងយកចិត្តទុកដាក់ និងមិនមានប៉ះពាល់ដល់អាយុជីវិតទេ។
លោកបន្តថាទឹកដែលឡើងមកខ្លាំងទើបតែនៅឆ្នាំ ២០១៩ នេះ ព្រោះមានភ្លៀងធ្លាក់ប្រហែល ៣ ថ្ងៃជាប់ៗគ្នា និងហូរចេញពីស្រុកវ៉ារិនមកផង ទើបបណ្ដាលឲ្យលិចមន្ទីរពេទ្យបែបនេះ។ រីឯដំណាំកសិកម្មរបស់ពលរដ្ឋមិនមានផលប៉ះពាល់ទេ។ ជាមួយគ្នានេះបរិមាណទឹកភ្លៀងមានកម្រិត ១៤០,១ មម ធ្វើឲ្យមានជំនន់ទឹកភ្លៀង ទឹកជំនន់បានបណ្តាលឲ្យមានការលិចលង់ក្នុងឃុំចំនួន ២ ផ្សេងទៀតនៅក្នុងស្រុកអង្គរជុំ គឺឃុំដូនពែង និងឃុំចារឈូក ខេត្តសៀមរាប។
លោក ផុស បញ្ជាក់ថា៖ «នៅតាមមណ្ឌលសុខភាពផ្សេងៗទៀតលិចដែរ ប៉ុន្ដែមិនប៉ះពាល់ធ្ងន់ធ្ងរដូចនៅអង្គរជុំទេ គឺមណ្ឌលសុខភាពទាំងនោះមិនមានអ្នកជំងឺស្នាក់នៅ ហើយទោះយ៉ាងណាយើងនៅតែទទួលអ្នកជំងឺដដែល។ ប៉ុន្ដែបើអ្នកជំងឺមានស្ថានភាពធ្ងន់ធ្ងរគឺយើងនឹងជួយដឹកបញ្ជូនគាត់បន្តទៅមន្ទីរពេទ្យផ្សេងៗដែលនៅជិតអង្គរជុំនេះ»។
តាមក្រសួងធនធានទឹក និងឧតុនិយមបានប្រកាសកាលពីថ្ងៃទី ២៣ កញ្ញា ព្រមានពីជំនន់ទឹកភ្លៀងនៅតាមខេត្តមួយចំនួននៅជាប់ព្រំដែនកម្ពុជា-ថៃ និងឡាវក្រោយទទួលឥទ្ធិពលប្រព័ន្ធសម្ពាធទាប (ITCZ)។ ក្រសួងបញ្ជាក់ថា៖ «ស្ថានភាពបែបនេះនឹងធ្វើឲ្យនៅបណ្ដារាជធានី ខេត្ត មានភ្លៀងបន្តធ្លាក់រាយប៉ាយនៅក្នុងកម្រិតបរិមាណពីមធ្យមទៅច្រើន និងនៅផ្នែកខ្លះមានភ្លៀងធ្លាក់ខ្លាំង។ ដោយឡែកនៅថ្ងៃទី ២៤-២៥ ភ្លៀងមានភាពរអាក់រអួលបន្ដិច» ៕
