.jpg)
គ្រូពេទ្យម្នាក់ ដែលត្រូវបានអភិបាលខេត្តប៉ៃលិនបណ្ដេញចេញពីក្របខ័ណ្ឌរដ្ឋនាពេលកន្លងមក។ រូបថត ហ្វេសប៊ុក
ភ្នំពេញៈ គ្រូពេទ្យម្នាក់ដែលត្រូវបានអភិបាលខេត្តប៉ៃលិនបណ្ដេញចេញពីក្របខ័ណ្ឌរដ្ឋ បន្ទាប់ពីបង្ហោះសារពីភាពអសកម្មដែលខ្លួនបានជួបប្រទះ បានដាក់ពាក្យបណ្តឹងតវ៉ាមកក្រសួងសុខាភិបាល និងក្រសួងមុខងារសាធារណៈពីម្សិលមិញ ដើម្បីស្នើឱ្យស្ថាប័នទាំង ២ នេះជួយរកយុត្តិធម៌។
គ្រូពេទ្យនៅខេត្តប៉ៃលិនលោក ខឹម មុនីកុសល ត្រូវបានលោកស្រី បាន ស្រីមុំ អភិបាលខេត្តប៉ៃលិនចេញលិខិតបណ្ដេញចេញពីក្របខ័ណ្ឌរដ្ឋកាលពីថ្ងៃទី ១៩ មីនា ដោយសំអាងថា គ្រូពេទ្យរូបនេះបានប្រព្រឹត្តកំហុស និងការឆ្គាំឆ្គងក្នុងវិជ្ជាជីវៈ។
ការដកចេញពីក្របខ័ណ្ឌនេះកើតមានឡើងក្រោយពីពេលលោក ខឹម មុនីកុសល បង្ហោះសារលើហ្វេសប៊ុកថា «មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កនៅមន្ទីរបក្សខេត្តប៉ៃលិន មិនជួយធ្វើការងារគ្រូពេទ្យខ្លះនោះទេ ប៉ុន្តែនាំគ្នាអង្គុយលេង Facebook ក្នុងតង់ និងថតរូបបង្អួតគេឯងទៅវិញ»។ លោកសរសេររៀបរាប់ទៀតថា ការងារទាំងឡាយទាំងពួងគឺក្រុមគ្រូពេទ្យជាអ្នកទទួលបន្ទុកទាំងអស់សូម្បីការរៀបចំបាយម្ហូបឱ្យអ្នកធ្វើចត្តាឡីស័ក។
បន្ទាប់ពីបានដាក់ពាក្យបណ្តឹងមកក្រសួងសុខាភិបាល និងក្រសួងមុខងារសាធារណៈលោក ខឹម មុនីកុសល ប្រាប់ ភ្នំពេញ ប៉ុស្តិ៍ ពីម្សិលមិញថា ការដែលលោកបង្ហោះសារលើហ្វេសប៊ុកគឺគ្រាន់តែជាការបញ្ចេញមតិ និងបង្ហាញអារម្មណ៍ដែលបានជួបប្រទះដើម្បីស្វែងរកដំណោះស្រាយ។
លោករំពឹងថា ដូច្នេះលោកសង្ឃឹមថា ក្រសួងទាំង ២ នឹងផ្តល់យុត្តិធម៌ដល់រូបលោកវិញ ខណៈលោកក៏បានធ្វើលិខិតសុំទោស ចំពោះការបង្ហាញសារទាំងនេះ ដោយអចេតនាផងដែរ។ «ខ្ញុំដាក់ពាក្យបណ្តឹងនេះ គឺគ្រាន់សុំយុត្តិធម៌សម្រាប់ខ្ញុំមកវិញ ព្រោះការដកយើងចេញពីក្របខ័ណ្ឌនេះដូចជាមិនត្រឹមត្រូវទៅតាមច្បាប់ទេ។ យើងសូមឱ្យអ្នកជំនាញដែលមានវិជ្ជាជីវៈទាំង ២ ក្រសួងនេះ លោកជួយពិនិត្យមើល និងផ្តល់ក្របខ័ណ្ឌមកឱ្យខ្ញុំវិញ»។
ភ្នំពេញប៉ុស្តិ៍បានទាក់ទងសុំអត្ថាធិប្បាយលើបញ្ហានេះពីលោកស្រី បាន ស្រីមុំ ប៉ុន្តែលោកស្រីប្រាប់ថា កំពុងជាប់រវល់ប្រជុំ។ ចំណែកលោកស្រី ឱ វណ្ណឌីន អ្នកនាំពាក្យក្រសួងសុខាភិបាលមិនអាចទាក់ទងបានទេ។
ទោះយ៉ាងណាលោក ឈឿន ប៊ុណ្ណារ័ត្ន អ្នកនាំពាក្យ និងជារដ្ឋលេខាធិការក្រសួងមុខងារសាធារណៈថ្លែងថា ក្រសួងនឹងពិនិត្យលើឯកសារដែលគ្រូពេទ្យរូបនេះបានដាក់ចូលមកក្រសួងហើយនឹងសម្រេចនៅពេលក្រោយ។
ប៉ុន្តែលោកមិនបានបញ្ជាក់ទេថាតើការបណ្តេញគ្រូពេទ្យម្នាក់នេះចេញពីក្របខ័ណ្ឌពីសំណាក់អភិបាលខេត្តប៉ៃលិន ត្រឹមត្រូវឬយ៉ាងណានោះទេ ដោយលោកគ្រាន់តែបញ្ជាក់ថា ក្រសួងរង់ចាំពិនិត្យឯកសារផ្ទាល់ជាមុនសិន។ «ខ្ញុំអាចជម្រាបបានថា កិច្ចការងារនេះគឺស្ថិតលើសមត្ថកិច្ចរបស់រដ្ឋបាលថ្នាក់ក្រោមជាតិ ហើយឥឡូវនេះ ខ្ញុំមិនទាន់បានឃើញលិខិតជាផ្លូវការណាមួយនោះទេ។ ខ្ញុំនឹងសួរនាំផ្នែករដ្ឋបាលរបស់ខ្ញុំ ហើយបើមានពាក្យបណ្តឹង ខាងក្រសួងនឹងមានចំណាត់ការ។ ប៉ុន្តែលទ្ធផលយ៉ាងណានោះ មិនទាន់អាចឆ្លើយបានទេ»។
លោក យិន ម៉េងលី មន្ត្រីសម្របសម្រួលសមាគមការពារសិទ្ធិមនុស្សអាដហុកខេត្តបាត់ដំបង និងប៉ៃលិន ថ្លែងថាការបង្ហោះសាររិះគន់អាជ្ញាធរនៅក្នុងហ្វេសប៊ុករបស់គ្រូពេទ្យនេះ ពុំមែនជាការប្រព្រឹត្តខុសច្បាប់អ្វីឡើយ ព្រោះនេះគឺជាការសម្ដែងមតិរបស់ប្រជាពលរដ្ឋដោយស្របច្បាប់។ បើទោះបីគ្រូពេទ្យម្នាក់នេះបានប្រព្រឹត្តកំហុសដែលអាជ្ញាធរខេត្តមិនពេញចិត្ត ប៉ុន្តែការដាក់ទណ្ឌកម្មក៏មិនសមាមាត្រទៅនឹងកំហុសដែលគ្រូពេទ្យបានធ្វើនោះដែរ។ «គ្រាន់តែគ្នាបង្ហោះសារប៉ុណ្ណឹង តើវាចាំបាច់ក្នុងការចាត់វិធានការទៅលើរូបគាត់? ថាតើអាជ្ញាធរបានស្រាវជ្រាវថា សារដែលគាត់បានបង្ហោះនេះ គឺជាការពិតឬអត់? នេះគឺជាមូលហេតុជាការញុះញង់ដែរឬទេ?»។
ក្រៅពីលើកឡើងដូច្នេះលោក ម៉េងលី រំពឹងថាក្រសួងទាំង ២ ដែលគ្រូពេទ្យរូបនេះបានស្វែងរកកិច្ចអន្តរាគមន៍នឹងជួយផ្តល់យុត្តិធម៌ដល់គាត់ឱ្យទទួលបានក្របខ័ណ្ឌវិញ ដោយមន្ត្រីជំនាញនៃក្រសួងទាំង ២ នេះនឹងចុះស្រាវជ្រាវ ដើម្បីផ្តល់យុត្តិធម៌ដល់ជនរងគ្រោះ៕
វីដេអូ៖
