.jpg)
ភ្នំពេញៈ គ្រូពេទ្យ ២ នាក់ក្នុងខេត្តកំពង់ចាមដែលបានភ្លេចកន្សែងពោះគោតូចមួយនៅក្នុងពោះស្ត្រីម្នាក់ បន្ទាប់ពីការវះកាត់ឆ្លងទន្លេកាលពីខែតុលាឆ្នាំមុន ត្រូវបានផ្ទេរទៅតំណែងបច្ចេកទេសនៅមន្ទីរសុខាភិបាលខេត្ត។ នេះបើតាមមន្ត្រីម្នាក់ដែលបានថ្លែងកាលពីថ្ងៃម្សិលមិញ។
លោក គីម ស៊ុលភិរុន ប្រធានមន្ទីរសុខាភិបាលខេត្តកំពង់ចាមបានថ្លែងថា គ្រូពេទ្យទាំង ២ នាក់ត្រូវបានផ្ទេរតំណែងពីតំណែងវះកាត់របស់ពួកគេនៅមន្ទីរពេទ្យបង្អែកខេត្តកាលពីថ្ងៃទី ១ មីនា។
លោក ស៊ុលភិរុន មិនឆ្លើយសំណួរត្រង់អំពីថា មូលហេតុអ្វីអ្នកទាំង ២ នាក់មិនត្រូវបានបញ្ឈប់ពីការងារជាជាងការគ្រាន់តែផ្ទេរ។ គ្រូពេទ្យទាំង ២ នាក់បានធ្វើជាគ្រូពេទ្យវះកាត់ចាប់តាំងពីឆ្នាំ ២០១២។
លោកបានថ្លែងថា៖ «ពួកគេធ្វេសប្រហែសនៅក្នុងការវះកាត់របស់ខ្លួន»។ «នៅពេលយើងផ្ទេរពួកគេទៅកន្លែងថ្មី ពួកគេនឹងមិនធ្វេសប្រហែសជាមួយអ្នកជំងឺដទៃទេ ដោយសារការងាររបស់ពួកគេនៅទីនោះមានលក្ខណៈសាមញ្ញគឺអប់រំប្រជាពលរដ្ឋអំពីជំងឺគ្រុនចាញ់ និងជំងឺគ្រុនឈាម»។
លោកបានថ្លែងថានេះនឹងមិនធ្វើឲ្យពួកគេធ្វេសប្រហែសក្នុងការវះកាត់នាពេលខាងមុខ។ លោកបានបន្ថែមថា៖ «ពួកគេគ្រាន់តែអប់រំប្រជាពលរដ្ឋអំពី [ជំងឺគ្រុនចាញ់ និងគ្រុនឈាម] ដូច្នេះមិនមានការគំរាមកំហែងដល់ជីវិត»។
ទោះយ៉ាងណាក្តីចំណាត់ការដាក់វិន័យពីគណៈគ្រូពេទ្យកម្ពុជានៅកំពុងរង់ចាំនៅឡើយ។
កាលពីចុងខែកុម្ភៈអ្នកស្រី ឌីម ស្រីមុំ បានទទួលសំណងប្រមាណ ៧០០០ ដុល្លារបន្ទាប់ពីគ្រូពេទ្យនៅគ្លីនិកឯកជនមួយក្នុងរាជធានីភ្នំពេញកាលពីខែមករាបានរកឃើញកន្សែងពោះគោតូចមួយនៅក្នុងពោះរបស់អ្នកស្រីបន្ទាប់ពីការវះកាត់ម្តងទៀត។ អ្នកស្រីបានធ្វើដំណើរមករាជធានីភ្នំពេញដើម្បីស្វែងរកការព្យាបាលបន្ទាប់ពីមានការឈឺចុកចាប់ខ្លាំងនៅក្នុងពោះរបស់អ្នកស្រី។
អ្នកស្រី មុំ មកពីស្រុកកងមាសបានឆ្លងទន្លេកូនប្រុសតាមរយៈការវះកាត់នៅមន្ទីរពេទ្យបង្អែកខេត្តកំពង់ចាមកាលពីខែតុលា។ លោក ជុំ សុផា នាយកប្រតិបត្តិនៃអង្គការសម្ព័ន្ធសុខភាព និងអភិវឌ្ឍន៍បានថ្លែងថាទោសទណ្ឌវិន័យដែលគ្រូពេទ្យទទួលគឺមិនគ្រប់គ្រាន់ទេ។ ប្រសិនបើវាគ្រាន់តែជាការផ្ទេរវាមិនសមស្របទេ។ វាមិនមានការដាក់ទោសទណ្ឌ។ អស់រយៈពេលជាច្រើនឆ្នាំមកហើយ កម្ពុជាបាននិងកំពុងព្យាយាមកែលម្អជំនាញគ្រូពេទ្យដែលផ្តល់ការវះកាត់៕ PS
រាយការណ៍បន្ថែមៈ Yesenia Amaro
