The Phnom Penh Post Search

Search form

Logo of Phnom Penh Post newspaper Phnom Penh Post - គ្រូពេទ្យ​ ជ្រិន ​បដិសេធ​ចំពោះ​បទ​ចោទ​ចម្លង​​អេដស៍​ដល់​អ្នក​ភូមិ​ជាង​ ២០០ នាក់

គ្រូពេទ្យ​ ជ្រិន ​បដិសេធ​ចំពោះ​បទ​ចោទ​ចម្លង​​អេដស៍​ដល់​អ្នក​ភូមិ​ជាង​ ២០០ នាក់

គ្រូ​ពេទ្យ​ភូមិ យ៉ែម ជ្រិន ដែល​ជាប់​ពាក់ព័ន្ធ​នឹង​ការ​ធ្វើឲ្យ​អ្នក​ភូមិ​រកា​ឆ្លង​មេរោគ​អេដស៍​ពេល​ត្រូវ​បាន​នាំ​ទៅ​សវនាការ​នៅ​សាលា​ដំបូង​ខេត្ត​បាត់ដំបង​កាលពី​ម្សិលមិញ​។
គ្រូ​ពេទ្យ​ភូមិ យ៉ែម ជ្រិន ដែល​ជាប់​ពាក់ព័ន្ធ​នឹង​ការ​ធ្វើឲ្យ​អ្នក​ភូមិ​រកា​ឆ្លង​មេរោគ​អេដស៍​ពេល​ត្រូវ​បាន​នាំ​ទៅ​សវនាការ​នៅ​សាលា​ដំបូង​ខេត្ត​បាត់ដំបង​កាលពី​ម្សិលមិញ​។ ហេង ជីវ័ន

គ្រូពេទ្យ​ ជ្រិន ​បដិសេធ​ចំពោះ​បទ​ចោទ​ចម្លង​​អេដស៍​ដល់​អ្នក​ភូមិ​ជាង​ ២០០ នាក់

បាត់ដំបងៈ សំឡេង​ទ្រហោ​យំ​ពី​សំណាក់​ក្រុម​គ្រួសារ​បាន​​ឮ​ឡើង​នៅពេល​ដែល​រថយន្ត​ដឹក​ជន​ជាប់​សង្ស័យ​ជា​គ្រូពេទ្យ​អត់​អាជ្ញាប័ណ្ណ​ដែល​បាន​បង្ក​ឲ្យ​ប្រជាពលរដ្ឋ​ជាង​ ២០០ នាក់​នៅក្នុង​ភូមិ​រកា ស្រុក​សង្កែ ឆ្លង​មេរោគ​អេដស៍​ស្រប​ពេល​ដែល​ជន​សង្ស័យ​បាន​បដិសេធ​រាល់​ការ​ចោទ​ប្រកាន់​របស់​តុលាការ​ក្នុង​សវនាការ​លើក​ដំបូង​កាលពី​ម្សិលមិញ​។

នៅក្នុង​សវនាការ​ដែល​មាន​ការ​រឹតបន្ដឹង​ដោយ​មិន​អនុញ្ញាត​ឲ្យ​អ្នក​សារព័ត៌មាន​យក​ប៊ិក​សៀវភៅ​ចូល​ដោយ​ធ្វើការ​ឆែកឆេរ​តាំងពី​ស្មា​រហូត​ដល់​ចុង​ជើង​មុន​អនុញ្ញាត​ឲ្យ​ចូល​ស្តាប់​សវនាការ​ប៉ុន្តែ​អ្នក​សារព័ត៌មាន​របស់​ទូរទស្សន៍​ក្នុង​​ស្រុក​មួយ​រូប​ប្រចាំ​នៅ​ខេត្ត​បាត់ដំបង​ត្រូវ​បាន​តុលាការ​ឲ្យ​ចូល​ថតរូប​រយៈពេល​ខ្លី​នៅពេល​ចាប់ផ្តើម​សវនាការ​ដំបូង​ស្រប​ពេល​ដែល​ជនសង្ស័យ​នៅ​បន្ត​ដាក់​ខ្នោះ​ដៃ​នៅក្នុង​បន្ទប់​សវនាការ​បើ​ទោះបី​ជា​មន្ត្រី​តុលាការ​បាន​ចូល​ក្នុង​បន្ទប់​សវនាការ​ហើយ​ក៏ដោយ​។

លោក​ យ៉ែម ជ្រិន ដែល​ជា​ជន​ជាប់​សង្ស័យ​បាន​ថ្លែង​នៅក្នុង​អង្គ​សវនាការ​បន្ទាប់ពី​ចៅក្រម​បាន​អាន​ចប់​បទ​ចោទ​មក​លើ​រូប​គាត់​ទាំង​បី​ចំណុច​ថា​លោក​សុំ​បដិសេធ​បទ​ចោទ​ទាំង​បី​មក​លើ​រូប​លោក​ពីព្រោះ​លោក​មិន​បាន​ដឹង​រឿង​នោះ​ទេ​លោក​គ្រាន់តែ​ជា​គ្រូពេទ្យ​ម្នាក់​ព្យាបាល​អ្នក​ជំងឺ​ឲ្យ​ជា​តែ​ប៉ុណ្ណោះ​។

លោក​បាន​ថ្លែង​ទាំង​លើក​ដៃ​សំពះ​ចៅក្រម​ថា​៖ «ខ្ញុំ​សុំ​ឲ្យ​តុលាការ​មេត្តា​រក​យុត្តិធម៌​ដល់​រូប​ខ្ញុំ​ដោយ​ធ្វើការ​ស្រាវជ្រាវ​ឲ្យ​បាន​ច្បាស់លាស់​ទាក់ទិន​ទៅ​នឹង​បញ្ហា​នេះ។ ខ្ញុំ​មិន​មាន​គំនុំ​អី​ជាមួយ​ពួកគាត់​ទេ​គឺ​ខ្ញុំ​ព្យាបាល​ដើម្បី​ឲ្យ​ពួកគាត់​ជាសះ​ស្បើយ​គ្រួសារ​ខ្លះ​ក្រ​ខ្ញុំ​ព្យាបាល​ឲ្យ​គាត់​នៅពេល​ណា​ដែល​មាន​លុយ​ឲ្យ​ក៏​បាន​»។

លោក យ៉ែម ជ្រិន ត្រូវ​បាន​តុលាការ​ចោទ​ប្រកាន់ ៣ បទ​ល្មើស​គឺ​ទី​ ១ ប្រព្រឹត្ត​ក្នុង​ចេតនា​ចម្លង​មេរោគ​អេដស៍​ទៅ​អ្នក​ដទៃ​តាម​មាត្រា​ ១៨, ៥០ នៃ​ច្បាប់​ស្តីពី​ការ​បង្ការ​ និង​ការ​ប្រយុទ្ធ​ទប់ស្កាត់​ការ​រីក​រាលដាល​មេរោគ​អេដស៍/ជំងឺ​អេដស៍​,ទី​ ២ ឃាតកម្ម​ដោយ​អំពើ​ឃោរឃៅ​តាម​មាត្រា​ ២០៥​ នៃ​ក្រម​ព្រហ្មទណ្ឌ​ និង​ទី ៣ បើក​កន្លែង​ពិគ្រោះ​ព្យាបាល​ជំងឺ​ដោយ​គ្មាន​ការ​អនុញ្ញាត​ពី​ក្រសួង​សុខាភិបាល។

លោក​ ជ្រិន ​បាន​ថ្លែង​បន្ត​នៅក្នុង​រង្វង់​ក្រចក​សេះ​ទៅ​កាន់​តុលាការ​ថា​លោក​បាន​ចាប់ផ្តើម​ប្រកប​មុខរបរ​នេះ​បន្ទាប់ពី​រូប​លោក​បាន​ត្រឡប់​មកពី​ជំរំ​នៅ​ប្រទេស​ថៃ​វិញ​នៅក្នុង​ឆ្នាំ​ ១៩៩៣ ប៉ុន្តែ​ពលរដ្ឋ​ក្នុង​ភូមិ​​ចាប់ផ្តើម​ស្គាល់​លោក​ចាប់​តាំងពី​ឆ្នាំ​ ១៩៩៥ រហូត​ដល់​សព្វថ្ងៃ។ លោក​តែងតែ​ជិះ​ម៉ូតូ​ទៅ​ចាក់​ថ្នាំ​ឲ្យ​ពលរដ្ឋ​នៅក្នុង​ភូមិ​នៅពេល​ដែល​គេ​តេ​មក​រក​រូប​លោក​ឲ្យ​ជួយ​ព្យាបាល​។

លោក​បាន​ថ្លែង​ថា៖​ «ខ្ញុំ​រៀន​ពេទ្យ​នៅ​ជំរំ​ជាមួយ​គ្រូពេទ្យ​បរទេស​ពី​ឆ្នាំ​ ១៩៨២ ខ្ញុំ​យល់​ពី​វិជ្ជា​ពេទ្យ ប៉ុន្តែ​កាលពី​ចាប់​ផ្តើម​ធ្វើ​ពេទ្យ​នៅ​ភូមិ​រកា​ដំបូង​ចន្លោះ​ឆ្នាំ​ ១៩៩៥ ពុំ​សូវ​មាន​ស៊ីរ៉ាំង​ប៉ុន្មាន​ទេ​ដូច្នេះ​ស៊ីរ៉ាំង​ដែល​ប្រើ​ហើយ​យក​ទៅ​ស្រុស​ទឹកក្តៅ​ដើម្បី​ទុក​ព្យាបាល​បន្ត​ហើយ​ខ្ញុំ​ធ្លាប់​ព្យាបាល​គ្រួសារ​មួយ​ប្រមាណ​ជា ១០ នាក់​ផ្ទុក​មេរោគ​អេដស៍​ប៉ុន្តែ​ពួកគាត់​ស្លាប់​អស់​ហើយ​នៅ​សល់​តែ​កូន​មួយ​ទេ​»។

សាច់ញាតិ​គ្រូពេទ្យ​ជ្រិន​ស្រែក​យំ​នៅ​ខាង​មុខ​សាលា​ដំបូង​ខេត្ត​បាត់ដំបង​ពី​ម្សិលមិញ​។
សាច់ញាតិ​គ្រូពេទ្យ​ជ្រិន​ស្រែក​យំ​នៅ​ខាង​មុខ​សាលា​ដំបូង​ខេត្ត​បាត់ដំបង​ពី​ម្សិលមិញ​។ ហេង ជីវ័ន

ផ្ទុយ​ពី​ការ​លើក​ឡើង​របស់​លោក យ៉ែម ជ្រិន លោក​ ហេង លុយ ព្រះ​រាជអាជ្ញា​រង​ប្រចាំ​ខេត្ត​បាត់ដំបង​បាន​លើក​ឡើង​នៅក្នុង​អង្គ​សវនាការ​ថា​លោក​គ្រូពេទ្យ​កំពុង​តែ​ឆ្លើយ​លាក់បាំង​ការ​ពិត​ដែល​ខុស​ពី​ការ​ឆ្លើយ​លើក​ដំបូង​នៅក្នុង​ដំណាក់កាល​ស៊ើបសួរ​នៅ​ប៉ូលិស។

លោក​ថ្លែង​ថា៖ «គាត់​​ថា​ឲ្យ​ថ្នាំ​ច្រើន​ជាង​ចាក់​មិន​បាន​ប្រើ​ស៊ីរ៉ាំង​ពីរ​ដង​ប៉ុន្តែ​ភ័ស្តុតាង​នៅក្នុង​កាបូប​របស់​គាត់​បាន​បង្ហាញ​ទាំង​ស៊ីរ៉ាំង​ចាស់​ និង​ថ្មី។ គាត់​កំពុង​តែ​និយាយ​លាក់បាំង»។

ជាមួយ​គ្នា​នោះ​ដែរ​លោក​ ស្រី យ៉ិច ឈាណាវី ចៅក្រម​ជម្រះ​បាន​ពន្យល់​នៅក្នុង​អង្គ​សវនាការ​ទៅ​ដល់​ជន​ជាប់​ចោទ​ថា​លោក​ចង់​និយាយ​ប្រាប់​តុលាការ​លោក​និយាយ​ពីព្រោះ​នៅក្នុង​ច្បាប់​មាន​ស្ថាន​សម្រាល​ស្ថាន​ទម្ងន់​ និង​ស្ថាន​ដាក់​ទម្ងន់​ទោស។

លោកស្រី​ថា៖ «លោក​ត្រូវ​តែ​និយាយ​ពាក្យ​ពិត​ដើម្បី​ឲ្យ​តុលាការ​ស្វែងរក​យុត្តិធម៌​ដល់​រូប​លោក​ព្រោះ​ពេល​នេះ​លោក​ពុំ​ទាន់​មាន​ទោស​ទេ​លោក​គ្រាន់តែ​ត្រូវ​បាន​តុលាការ​ចោទប្រកាន់​តែ​ប៉ុណ្ណោះ»​។

អង្គុយ​ទាំង​ទឹក​មុខ​អស់​សង្ឃឹម​​នៅ​ខាង​មុខ​តុលាការ​លោកតា​ សម ឡម អាយុ​ ៨១ ឆ្នាំ​ដែល​ជា​អាចារ្យ​វត្ត​ផ្ទុក​មេរោគ​អេដស៍​ហើយ​ក៏​ជា​ដើម​បណ្តឹង​បាន​ថ្លែង​ថា​លោកតា​បាន​ស្រឡញ់​លោក​គ្រូពេទ្យ​នោះ​ដូចជា​កូន​ជា​ចៅ​នៅក្នុង​ភូមិ​លោក​ពុំ​ដែល​គិត​ថា​គាត់​គិត​អាក្រក់​នោះ​ទេ។

លោកតា​ថ្លែង​ថា៖ «ខ្ញុំ​គ្រាន់​តែ​ចង់​ឲ្យ​គាត់​សង​ថ្លៃ​ជំងឺ​ចិត្ត​ ៥ ​លាន​រៀល​ហើយ​ឲ្យ​តុលាការ​ផ្ទន្ទាទោស​គាត់​តាម​ច្បាប់»​។

មិន​ខុស​ពី​គ្នា​លោក លឿម ឡោម អាយុ​ ៥២ ​ឆ្នាំ​ដែល​អះអាង​ថា​ជា​អ្នក​ដែល​ដឹង​ថា​ផ្ទុក​មេរោគ​អេដស៍​ដំបូង​គេ​នៅក្នុង​ភូមិ​បាន​ថ្លែង​ថា​បច្ចុប្បន្ន​នេះ​ពលរដ្ឋ​ដែល​ផ្ទុក​មេរោគ​នេះ​នៅក្នុង​ភូមិ​គឺ​មួយ​ថ្ងៃ​កាត់​មួយ​ថ្ងៃ​កោរ​ហើយ​មិន​អាច​ទៅ​រកស៊ី​អ្វី​បាន​នោះ​ទេ​គឺ​នៅ​តែ​ផ្ទះ​តែ​ប៉ុណ្ណោះ​ដូច្នេះ​បាន​ជា​លោក​ដាក់​ពាក្យ​បណ្តឹង​មក​តុលាការ​ដើម្បី​ឲ្យ​ជួយ​រក​យុត្តិធម៌​ដល់​ពួក​លោក​ និង​ទាមទារ​ប្រាក់​សំណង​ខ្លះ។

លោក​បាន​ថ្លែង​ថា៖ «ខ្ញុំ​លក់​គោ​អស់​ ១០ ​ក្បាល​ដើម្បី​មើល​ជំងឺ​ហើយ​ជំងឺ​របស់​ខ្ញុំ​នោះ​លោក​គ្រូពេទ្យ​ ជ្រិន ​ថា​ជំងឺ​ពោះវៀន​ដូច្នេះ​ខ្ញុំ​សូម​ឲ្យ​តុលាការ​បង្គាប់​ឲ្យ​គាត់​សង​ជំងឺ​ចិត្ត​ខ្ញុំ​ ១០ ​លាន​រៀល​ហើយ​កាត់​ទោស​គាត់​ទៅ​តាម​ច្បាប់​ពីព្រោះ​ប្រជាជន​យើង​មួយ​ភូមិ​មាន​មេរោគ​នេះ​ដោយសារ​តែ​គាត់​»។

យំ​ស្រែក​នៅ​ខាង​មុខ​តុលាការ​ជាមួយ​នឹង​កូនស្រី​ ៤ ​នាក់​របស់​លោក​គ្រូពេទ្យ​រូប​នោះ​អ្នកស្រី ឃួន ចិន្តា អាយុ ៤៥​ឆ្នាំ​ដែល​ជា​ភរិយា​របស់​លោក​គ្រូពេទ្យ​នោះ​បាន​ថ្លែង​ថា​ប្តី​របស់​អ្នកស្រី​គឺជា​មនុស្ស​ល្អ​ហើយ​តែងតែ​យក​អាសា​គេ​នៅក្នុង​ភូមិ​គាត់​មិន​ដែល​មាន​បំណង​ណា​ទៅ​ធ្វើ​បាប​ប្រជាជន​នោះ​ទេ​គាត់​ជួយ​មនុស្ស​តាំងតែ​ពី​នៅ​ជំរំ​រហូត​មក​ដល់​ភូមិ​រកា​នេះ។

អ្នកស្រី​ថ្លែង​ថា៖ «ប្តី​ខ្ញុំ​ស្លូត​បូត​ណាស់​មេត្តា​ជួយ​រក​យុត្តិធម៌​ដល់​គាត់​ផង​ហើយ​ដោយសារ​តែ​គាត់​ជាប់​គុក​កូន​ខ្ញុំ​បាន​ឈប់​រៀន​អស់​ហើយ»។

អ្នកស្រី​ ឡាយ សាវ៉ន បង​ថ្លៃ​លោក​គ្រូពេទ្យ​ ជ្រិន បាន​ថ្លែង​ទាំង​ទឹកភ្នែក​ថា​ពី​មុន​អ្នកស្រី​ស្អប់​គ្រូពេទ្យ​ដោយសារ​តែ​គ្រូពេទ្យ​ពុំ​សូវ​យក​ចិត្ត​ទុក​ដាក់​ដល់​អ្នក​ជំងឺ​ប៉ុន្តែ​នៅពេល​ដែល​អ្នកស្រី​ស្គាល់​ប្អូន​ថ្លៃ​មក​គឺ​ខុស​ពី​ពេទ្យ​គេ​គឺ​ស្លូតបូត​ និង​ជួយ​អ្នក​ជំងឺ​នៅពេល​ដែល​គេ​ត្រូវការ។​ អ្នកស្រី​ថ្លែង​ថា៖ «ខ្ញុំ​ក៏​ផ្ទុក​មេរោគ​ដែរ​តែ​ខ្ញុំ​មិន​ខឹង​ប្អូន​ទេ​ពីព្រោះ​គ្នា​ព្យាបាល​ដើម្បី​ឲ្យ​ជា​មិនមែន​ឲ្យ​យើង​ងាប់​ទេ​តែ​មិន​ដឹង​មកពី​ស្អី​បាន​ទៅ​ជា​បែប​នេះ»។

យំ​រត់​តាម​មើល​មុខ​ឪពុក​ដែល​ប៉ូលិស​នាំ​ចូល​បន្ទប់​សវនាការ ជ្រិន តុលា ដែល​ជា​កូន​ស្រី​ទី​ ២ បាន​ថ្លែង​ទាំង​ទឹកភ្នែក​ថា​ឪពុក​របស់​នាង​បាន​ប្រាប់​នាង​ថា​ឲ្យ​ខំ​សិក្សា​​នៅពេល​ដែល​នាង​បាន​ចូល​ទៅ​សួរ​សុខទុក្ខ​នៅ​ពន្ធនាគារ​ប៉ុន្តែ​នាង​មិន​អាច​ធ្វើ​បាន​គឺ​នាង​បាន​ព្យួរ​ការ​សិក្សា​របស់​នាង​រួច​ទៅ​ហើយ។

នាង​បាន​ថ្លែង​ថា៖ «ខ្ញុំ​រៀន​ឆ្នាំ​ទី​ ៣ ​នៅ​សាកល​វិទ្យាល័យ​បៀលប្រាយ​នៅ​ខេត្ត​ប៉ុន្តែ​ចាប់​តាំងពី​ប៉ា​ជាប់​ពន្ធនាគារ​ខ្ញុំ​ក៏​សម្រេច​ចិត្ត​ថា​ឈប់​រៀន​ដោយសារ​តែ​អត់​លុយ​បង់​ថ្លៃ​សាលា។ សូម​តុលាការ​មេត្តា​រក​យុត្តិធម៌​ឲ្យ​ប៉ា​ខ្ញុំ​ផង​វា​អយុត្តិធម៌​ណាស់​សម្រាប់​គាត់»​។

គួរ​បញ្ជាក់​ថា​ករណី​នៃ​ការ​រីករាល​ដាល​ឆ្លង​មេរោគ​អេសដស៍​ដែល​ធ្វើឲ្យ​មាន​ការ​ភ្ញាក់ផ្អើល​នៅ​ឃុំ​រកា ស្រុក​សង្កែ ខេត្ត​បាត់ដំបង​នេះ​បាន​ផ្ទុះ​ឡើង​កាលពី​ខែ​ធ្នូ ឆ្នាំ ២០១៤ រហូត​មក​ដល់​ពេល​នេះ​មាន​មនុស្ស​ ២៩០ នាក់​បាន​ផ្ទុក​មេរោគ​អេដស៍​ក្នុង​ចំណោម​នោះ​មាន​ចំនួន​អ្នក​ស្លាប់​ ១០ ​នាក់​គឺ​ស្រី​ ៦ នាក់ និង​បុរស​ ៤ ​នាក់។

កាលពី​ថ្ងៃ​ទី​ ៩ មករា​កន្លង​មក​ក្រសួង​សុខាភិបាល​អង្គការ​សុខភាព​ពិភពលោក និង​អង្គការ​យូអិន​អេដស៍​បាន​ចេញ​សេចក្តី​ប្រកាស​ព័ត៌មាន​រួម​ដោយ​បញ្ជាក់​ថា​លទ្ធផល​នៃ​ការ​សិក្សា​ស្រាវជ្រាវ​រក​ប្រភព​នៃ​ការ​ឆ្លង​រាលដាល​មេរោគ​អេដស៍​ដែល​រួម​បញ្ចូល​ទាំង​ការ​សិក្សា​លើ​ករណី​ឆ្លង និង​មិន​ឆ្លង​មេរោគ​អេដស៍​បង្ហាញ​ថា​អ្នក​ឆ្លង​មេរោគ​អេដស៍​ដែល​បាន​ចាក់​ថ្នាំ និង​ចាក់​ស៊ីរ៉ូម​មាន​កម្រិត​ខ្ពស់​ជាង​អ្នក​មិន​ឆ្លង​មេរោគ​អេដស៍​៕

អត្ថបទគួរចាប់អារម្មណ៍