ភ្នំពេញៈ លោក ពេជ្រ ព្រហ្មមុនី ដែលជាគ្រូមន្តអាគម និងជាមនុស្សជំនិតលោក អាំង មាលតី អតីតប្រធានសាលាដំបូងរាជធានីភ្នំពេញដែលត្រូវបានតុលាការសម្រេចចោទពីបទជ្រៀតជ្រែកខុសច្បាប់ក្នុងមុខងារសាធារណៈអាចនឹងមានសេរីភាពវិញនៅថ្ងៃទី ១៩ ខែធ្នូខាងមុខនេះ។
កាលពីថ្ងៃទី ២០ ខែវិច្ឆិកា ឆ្នាំ ២០១៥ ចៅក្រម វ៉េង ហ៊ត់ អនុប្រធានសាលាដំបូងរាជធានីភ្នំពេញបានបើកសវនាការកាត់ទោសលោក ពេជ្រ ព្រហ្មមុនី ថាបានជ្រៀតជ្រែកខុសច្បាប់ក្នុងមុខងារសាធារណៈក្នុងសំណុំរឿងស៊ើបអង្កេតលើឃាតកម្មលោកឧកញ្ញា អ៊ឹង ម៉េងជឺ តាមមាត្រា ៦០៩ នៃក្រមព្រហ្មទណ្ឌដែលបានចែងផ្តន្ទាទោសជនល្មើសឲ្យជាប់ពន្ធនាគារពីមួយឆ្នាំទៅបីឆ្នាំ។ ក្នុងសវនាការនោះលោក ចៅក្រមបានប្រកាសសាលក្រមសម្រេចផ្តន្ទាទោសលោក ពេជ្រ ព្រហ្មមុនីរយៈពេល ១៨ ខែតែអនុវត្តទោសត្រឹម ១០ ខែប៉ុណ្ណោះ។
ជាមួយគ្នានេះលោកចៅក្រម វ៉េង ហ៊ត់ ក៏បានសម្រេចទម្លាក់បទចោទ «ការប្រើប្រាស់ស្លាកលេខរថយន្តយោធា ខ.ម ក្លែងក្លាយ» ពីលោក ពេជ្រ ព្រហ្មមុនី ដោយអះអាងថាតុលាការគ្មានភ័ស្តុតាងដើម្បីបញ្ជាក់ថាជនជាប់ចោទប្រើរថយន្ត ខ.ម ដោយគ្មានការអនុញ្ញាតនោះទេ។
លោកចៅក្រម វ៉េង ហ៊ត់ បានបដិសេធបកស្រាយលម្អិតលើករណីនេះដោយគ្រាន់តែអះអាងថាតុលាការបានសម្រេចតាមនីតិវិធីត្រឹមត្រូវហើយ។
លោកថា៖ «ខ្ញុំមិនចង់និយាយច្រើនទេព្រោះខ្លាចមានការបកស្រាយខុសនាំឲ្យមានបញ្ហាច្រើនទៀត»។
យ៉ាងណាក៏ដោយលោក ផេង ស៊ីដេត មេធាវីការពារលោក ពេជ្រ ព្រហ្មមុនី បានហៅការចោទប្រកាន់របស់តុលាការតាមមាត្រា ៦០៩ ថាជារឿងអយុត្តិធម៌មួយព្រោះមិនមានធាតុផ្សំណាមួយដែលបញ្ជាក់ពីបទល្មើសនោះទេដោយហេតុថា សកម្មភាពរបស់កូនក្តីលោកគឺធ្វើឡើងតាមបញ្ជារបស់មន្ត្រីមុខងារសាធារណៈតែប៉ុណ្ណោះ។
លោកថា៖ «គាត់ (ជនជាប់ចោទ) ធ្វើអ្វីៗគឺឆ្លងតាមបញ្ជាថ្នាក់លើទាំងអស់ចៅក្រមចង្អុលបង្ហាញមាត្រាខុសតែម្តងយើងមានការសោកស្តាយណាស់រឿងនេះ»។
ប៉ុន្តែករណីនេះលោកចៅក្រម វ៉េង ហ៊ត់ អះអាងថាគ្រាន់តែជាទស្សនៈរបស់មេធាវីជនជាប់ចោទតែប៉ុណ្ណោះហើយតុលាការគ្រាន់តែអនុវត្តទៅតាមផ្លូវច្បាប់ និងនីតិវិធី។
បើតាមលោកមេធាវី ផេង ស៊ីដេត បច្ចុប្បន្នកូនក្តីលោកគ្មានជម្រើសអ្វីផ្សេងក្រៅពីទទួលយកការអនុវត្តទោសទៅតាមសាលក្រមតែប៉ុណ្ណោះហើយតាមកាលបរិច្ឆេទលោក ពេជ្រ ព្រហ្មមុនី នឹងមានសេរីភាពវិញនៅថ្ងៃទី ១៩ ខែធ្នូខាងមុខនេះដោយហេតុថាលោកត្រូវបានចាប់ឃុំខ្លួនតាំងពីខែកុម្ភៈមកម្ល៉េះ។
គួររំឭកថាលោក ពេជ្រ ព្រហ្មមុនី ត្រូវបានលោក អាំង មាលតី ស្នើសុំលោក មាស សុភា មេបញ្ជាការកងទ័ពជើងគោកឲ្យមកជួយមើលការងារសន្តិសុខរបស់ខ្លួននៅសាលាដំបូងរាជធានីភ្នំពេញខណៈដែលលោក អាំង មាលតី ត្រូវបានផ្លាស់មកធ្វើការប្រធានសាលាដំបូងរាជធានីកាលពីឆ្នាំ ២០១៤។ លោក ពេជ្រ ព្រហ្មមុនី គឺជាបងធម៌ និងជាមនុស្សជំនិតរបស់លោក អាំង មាលតី និងជាគ្រូមន្តអាគមម្នាក់ដែលគេល្បីតៗគ្នាថាបាញ់មិនផ្ទុះ។
បច្ចុប្បន្នលោក អាំង មាលតី អតីតប្រធានសាលាដំបូងរាជធានីភ្នំពេញកំពុងជាប់ឃុំឃាំងនៅក្នុងពន្ធនាគារខេត្តកណ្តាលដោយរងការចោទពីបទ «វិតិក្រម» (ជំរិតទារប្រាក់) ឬ «ពុករលួយ»៕
