The Phnom Penh Post Search

Search form




Logo of Phnom Penh Post newspaper Phnom Penh Post - គ្រួសារ​កម្មករ​ទូក​នេសាទ​នៅ​ថៃ​ បារម្ភ​ពី​ការ​បាត់​ដំណឹង​កូន​

គ្រួសារ​កម្មករ​ទូក​នេសាទ​នៅ​ថៃ​ បារម្ភ​ពី​ការ​បាត់​ដំណឹង​កូន​

រូបថត​ឯក​សារ​ ពលរដ្ឋ​ខ្មែរ​ដែល​ធ្វើ​ចំណាក​ស្រុក​ទៅ​ធ្វើ​ការ​នៅ​ប្រ​ទេសថៃ​កន្លងមក​​​។ រូបថត ហេង ជីវ័ន
រូបថត​ឯក​សារ​ ពលរដ្ឋ​ខ្មែរ​ដែល​ធ្វើ​ចំណាក​ស្រុក​ទៅ​ធ្វើ​ការ​នៅ​ប្រ​ទេសថៃ​កន្លងមក​​​។ ហេង ជីវ័ន

គ្រួសារ​កម្មករ​ទូក​នេសាទ​នៅ​ថៃ​ បារម្ភ​ពី​ការ​បាត់​ដំណឹង​កូន​

ភ្នំពេញៈ ​នៅ​ខែ​មីនា ឆ្នាំ ២០០៧ កូន​ប្រុស​របស់​ហៃ ខ្លៅ ដែល​ផ្លាស់​លំនៅ​ពី​ខេត្ត​ព្រៃវែង មក​ធ្វើ​ជា​​អ្នក​រត់​ម៉ូតូឌុប ​នៅ​ខេត្ត​កោះកុង បាន​ទូរស័ព្ទ​ប្រាប់​ថា គាត់​ប្តូរ​លំនៅ​ទៀត​ហើយ គឺ​ពេល​នេះ ទៅ​ថៃ​ធ្វើ​ជា​អ្នក​នេសាទ។

បន្ទាប់​ពី​បាន​បញ្ជាក់​ថា គាត់​រក​បាន​ការងារ​​លើ​ទូក​នេសាទ​ថៃ លោក ទិក សៀងលី ដែល​មាន​អាយុ ២១ ឆ្នាំ​ពេល​នោះ បាន​បាត់​ខ្លួន។ អស់​រយៈ​ពេល ៧ ឆ្នាំ មក​ហើយ គ្មាន​អ្នក​ណា​ម្នាក់​ដឹង​ដំណឹង​ពី​គាត់​ទេ។

លោកខ្លៅ បាន​ថ្លែង​ថា៖ «​នៅ​ថ្ងៃ​ទី ៣ ខែ មីនា កូន​ប្រុសខ្ញុំ​បាន​ទូរស័ព្ទ​មក​ខ្ញុំថា មេ​របស់​វានឹង​អនុញ្ញាត​ឲ្យ​វា​វិល​មក​ផ្ទះ​វិញ​នៅ​ខែ​ធ្នូ ឆ្នាំ ២០១៤ ប៉ុន្តែ នឹង​មិន​បើក​ប្រាក់​ឈ្នួល​ទេ។ វា​ថា មិន​ដែល​បាន​បើក​ប្រាក់​ខែ​ពី​មេ​ទេ ចាប់​តាំង​ពី​វា​បាន​ធ្វើ​ការ​នៅ​ថៃ និង​ឥណ្ឌូនេស៊ី»។

លោក សៀងលី ត្រូវ​បាន​ជួញ​ដូរ និង​លក់​ពី​ទូក​មួយ​ទៅ​ទូក​មួយ​ទៀត ដោយ​គ្មាន​ប្រាក់​ឈ្នួល និង​មាន​ជម្រើស​តិច​តួច​ក្នុង​ការ​គេច​ពី​វិស័យ​នេសាទ ដែល​រំលោភ​សិទិ្ធ​មនុស្ស​នេះ។

ក្នុង​ឆ្នាំ ២០១៣ ការ​សិក្សា​មួយ​របស់​អង្គការ​ពលកម្ម​អន្តរជាតិ បាន​រក​ឃើញ​ថា ​អ្នក​នេសាទ​ចំនួន ១៧ ភាគរយ​ដែល​បាន​ស្ទង់​មតិ នៅ​ថៃ កំពុង​ធ្វើ​ការ​ផ្ទុយ​ពី​ឆន្ទៈ​របស់​ខ្លួន ហើយ​មិន​អាច​ចាក​ចេញ​ពី​សមុទ្រ​ទេ។

លោក ខ្លៅ បាន​ថ្លែង​ថា គាត់​បាន​ទទួល​ទូរស័ព្ទ​មួយ​ទៀត​នៅ​ខែ​ធ្នូ។ ទូក​របស់​លោក សៀងលី ត្រូវ​បាន​ចាប់​ទុក ដោយសារ​នេសាទ​ខុស​ច្បាប់​នៅ​កោះ Vichada ប៉ុន្តែ គាត់​បាន​រក​ឃើញ និង​បាន​សុំ​ជំនួយ​ដើម្បី​ចាក​ចេញ​ពី​កោះ​នោះ។

លោក Dy The Hoya មន្រ្តី​កម្ម​វិធី​ការងារ​នៅ​មជ្ឈមណ្ឌល​អប់រំ​ច្បាប់​សម្រាប់​សហគមន៍ បាន​ថ្លែង​ថា គាត់​បាន​ព្យា​យាម​ទាក់​ទង​លោក សៀងលី តាម​លេខ​ទូរស័ព្ទ​ដែល​ឪពុក​គាត់​បាន​ផ្តល់​ឲ្យ​ពួកគេ​ ប៉ុន្តែ លេខ​នោះ​ត្រូវ​បាន​ផ្តាច់។

នេះ​ជា​ពាក្យ​បណ្តឹង​ទី​មួយ ដែល​មជ្ឈមណ្ឌល​អប់រំ​ច្បាប់​សម្រាប់​សហគមន៍ បាន​ទទួល​នៅ​ឆ្នាំ នេះ ប៉ុន្តែ វា​មិនមែន​ជារឿង​ខុស​ពីធម្មតា​ទេ។ តាម​​ទិន្ន​ន័យ​ផ្លូវ​ការ ​ពលករ​ចំណាក​ស្រុក​កម្ពុជា ១៣៣ ៤០០ នាក់ ត្រូវ​បាន​បញ្ជូន​ទៅ​ក្រៅ​ប្រទេស តាម​ច្រក​ស្រប​ច្បាប់​ពីឆ្នាំ ២០០០ ដល់ ២០១២ ប៉ុន្តែ ពលករ​រាប់​សិបពាន់​នាក់ ត្រូវ​បាន​ប៉ាន់​​ប្រមាណ​ថា ឆ្លង​កាត់​ព្រំ​ដែន​ដោយ​គ្មាន​ឯកសារ ​តាម​​រយៈ​មេ​ខ្យល់។

ក្នុង​ខែ​វិចិ្ឆកា ថៃ​បាន​ចុះ​បញ្ជី​ពលករ​ចំណាក​ស្រុក​កម្ពុជា​ដែល​គ្មាន​ឯកសារ​ជិត ៦៨២ ០០០ នាក់ ធ្វើ​ការ​នៅ​ថៃ។

តួលេខផ្លូវការ​ចុះ​បញ្ជី​ចំនួន​ពលករ​ចំណាក​ស្រុក​តិច​តួច​ដែល​ធ្វើ​​ដំណើរ​ទៅ​ឥណ្ឌូនេស៊ី ប៉ុន្តែ ទូក​នេសាទ​ថៃ​តែង​តែ​ចូល​ដែន​ទឹក​របស់​ឥណ្ឌូនេស៊ី។ កាល​ពី​ខែ​តុលា​ឆ្នាំមុន ​កម្ពុជា ២០ នាក់ ដែល​ត្រូវ​បាន​គេ​បោក​លក់​​ទៅឲ្យ​ទូក​នេសាទ​ ថៃ បាន​រត់​គេច​ដោយ​មាន​ជំនួយ​ពី​អ្នក​ភូមិ​ឥណ្ឌូនេស៊ី។ បុរស​ទាំង​នេះត្រូវ​បាន​បញ្ជូន​មក​វិញ ១ ខែ​ក្រោយ​មក។

ស្ថានទូត​កម្ពុជា​នៅ​ឥណ្ឌូនេស៊ី និង​លោក កុយ គួង អ្នក​នាំ​ពាក្យ​ក្រសួង​ការបរទេស មិន​អាច​ទាក់​ទង​បាន​ទេ កាល​ពី​ម្សិលមិញ។

លោក ហៃ ខ្លៅ បាន​ថ្លែង​បន្ត​​ថា៖ «​ខ្ញុំ​នឹក​កូន​ និង​​អាណិត​​កូន​ណាស់​។ ​យើង​​​​បួង​សួង​​​ឲ្យ​វាមក​ផ្ទះ​វិញ​ដោយ​​សុវ​ត្ថិ​ភាព​ក្នុង​ពេល​ឆាប់ៗ»៕ TK

អត្ថបទគួរចាប់អារម្មណ៍