កំពតៈ គ្រួសារក្មេងស្រីវ័យ ១៤ ឆ្នាំ ដែលបានបង្ហោះព័ត៌មានមិនពិតករណីជំងឺកូវីដ ១៩ ហើយត្រូវបានអាជ្ញាធរខេត្តកំពតហៅទៅអប់រំ និងធ្វើវីដេអូបកស្រាយការពិតកាលពីខែមីនាបានបដិសេធចំពោះការចុះផ្សាយរបស់សារព័ត៌មានបរទេសមួយឈ្មោះថា VICE News ដែលផ្សាយថាកូនស្រីរបស់គាត់បានឈប់រៀនដោយសារហេតុការណ៍នេះ។ ម្តាយក្មេងស្រីអះអាងថា កូនស្រីខ្លួនមិនបានឈប់រៀននោះទេ។
សារព័ត៌មាន VICE News កាលពីថ្ងៃ ២៥ មិថុនា បានផ្សាយថា អាម៉ី ក្មេងស្រី ដែលបានបង្ហោះព័ត៌មានមិនពិតពីជំងឺកូវីដ១៩ ហើយត្រូវបានអាជ្ញាធរខេត្តកំពតហៅមកអប់រំ និងបង្ហោះវីដេអូសុំទោសជាសាធារណៈនោះ បានបោះបង់ការសិក្សា បន្ទាប់ពីមានហេតុការណ៍នេះកើតឡើងដែលបណ្តាលឲ្យនាងមានភាពខ្មាសអៀន និងមិនអាចប្រឈមមុខនឹងការសិក្សាបន្តទៀតបាន។
សារព័ត៌មាននោះក៏បានភ្ជាប់សាច់រឿងនេះទៅនឹងការឃាត់ខ្លួនអតីតសកម្មជនបក្សប្រឆាំងមួយចំនួន ដោយថាករណីនេះគឺជាការបិទសិទ្ធិសេរីភាពធ្ងន់ធ្ងរធ្វើឡើងដោយរដ្ឋាភិបាលកម្ពុជាក្នុងការយកលេសការឆ្លើយតបនឹងជំងឺកូវីដ១៩។ ប៉ុន្តែម្តាយក្មេងស្រី លោកស្រី នាង សោភ័ណ្ឌ បានប្រាប់ភ្នំពេញប៉ុស្តិ៍កាលពីចុងសប្តាហ៍មុនថា កូនរបស់លោកស្រីមិនបានឈប់រៀននោះទេ។
លោកស្រីបន្តថា មូលហេតុដែលកូនអ្នកស្រីមិនបានរៀនក្នុងពេលនេះ ក៏ព្រោះតែសាលានៅទូទាំងប្រទេសបិទទ្វារក្នុងអំឡុងពេលដែលរដ្ឋាភិបាលចេញវិធានការទប់ស្កាត់ជំងឺកូវីដ ១៩។ ដូច្នេះរឿងនេះមិនពិតដូចការចុះផ្សាយរបស់សារព័ត៌មានបរទេសនោះទេ។
លោកស្រីបញ្ជាក់ថា៖ «កូនខ្ញុំ នៅរៀនទេ ប៉ុន្តែសាលាគេផ្អាក។ [ហេតុការណ៍នេះ] សម្រាប់គ្រួសារ ខ្ញុំ អត់អីទេ ព្រោះកូនខ្ញុំ វានិយាយមែន តែពួកម៉ាកវាអ្នកបង្ហោះ ផ្សព្វផ្សាយ វាមិនដឹងទេ។ វាដឹងថា វាធ្វើអ៊ីចឹងមិនត្រូវទេ វាបង្ហោះព័ត៌មានមិនពិតទេ»។
ក្មេងស្រីអាយុ ១៤ ឆ្នាំឈ្មោះ ម៉ី ដែលបានផ្ញើសំឡេងចូលក្នុងក្រុមឆាតក្នុងថ្នាក់រៀនរបស់នាងកាលពីខែមីនាបានបង្ហោះសារជាសំឡេង ដែលមានន័យយ៉ាងដូច្នេះថា៖ «ខ្ញុំចង់សុំឲ្យអ្នកនៅកំពតទាំងអស់គ្នាពាក់ម៉ាស់ឲ្យបានគ្រប់ៗគ្នា។ មានមនុស្ស ៣ នាក់បានស្លាប់បាត់ហើយនៅទីនេះ ដូច្នេះសូមគ្រប់គ្នាការពារខ្លួនរបស់អ្នកគ្រប់ៗគ្នា»។
ក្រោយពីបង្ហោះសារបែបនេះ មិត្តរបស់នាងម្នាក់នៅក្នុងក្រុមឆាតក៏បានផ្ញើសំឡេងរបស់នាងតៗគ្នាបណ្តាលឲ្យលេចឮទៅកាន់សាធារណជន ហើយវាក៏បានធ្វើឲ្យមានការភ្ញាក់ផ្អើលនៅក្នុងបណ្តាញសង្គមផងដែរ។ នៅពេលទទួលបានព័ត៌មានបែបនេះ សមត្ថកិច្ចស្រុកកំពង់ត្រាច ខេត្តកំពត បានចុះទៅដល់សាលារៀនរបស់នាងភ្លាមៗ និងស្រាវជ្រាវឃើញថា ករណីនេះគឺជារឿងមិនពិត ហើយក៏បានធ្វើការអប់រំនាង។
លោក តាក ហាប់ ប្រធានមន្ទីរអប់រំ យុវជន និងកីឡាខេត្តកំពតប្រាប់ភ្នំពេញ ប៉ុស្តិ៍កាលពីថ្ងៃចន្ទថា ករណីនេះមិនមែនជារឿងធ្ងន់ធ្ងរនោះទេ ព្រោះវិន័យសាលា នៅពេលមានសិស្សានុសិស្សណាម្នាក់ ប្រព្រឹត្តខុសនឹងវិន័យគឺតែងមានវិធានការអប់រំ និងឲ្យមានការសុំទោសជាសាធារណៈ។
លោកបន្តថា ដោយសារតែករណីនេះក្មេងស្រីបានបង្ហោះនូវព័ត៌មានមិនពិត ដែលធ្វើឲ្យប៉ះពាល់ដល់សន្តិសុខជាតិធ្ងន់ធ្ងរ ជាពិសេសក្នុងអំឡុងកូវីដ១៩នេះផ្ទុះឡើង ដូច្នេះការធ្វើវីដេអូបកស្រាយ និងសុំទោសជាសាធារណៈគឺជារឿងត្រឹមត្រូវបំផុត។
លោកបន្ថែមថា៖ «ការធ្វើដូច្នេះមិនមានជាប៉ះពាល់អ្វីធំដុំនោះទេ ព្រោះការដែលក្មេងធ្វើខុស ត្រូវតែសុំទោសហើយ ព្រោះយើងមានចេតនា ឬគ្មានចេតនាធ្វើយ៉ាងម៉េច ដើម្បីឲ្យក្មេង វានិយាយខ្លួនវា»។
លោកនិយាយថា ករណីនេះមិនអាចសន្និដ្ឋានបានថាក្មេងស្រីវ័យ ១៤ ឆ្នាំ រូបនេះបោះបង់ការសិក្សានោះទេ ព្រោះចាប់តាំងពីខែមីនាមកសាលាទូទាំងប្រទេសបានផ្អាកបណ្តោះអាសន្ន ហើយក៏មិនទាន់បានបើកឲ្យសិស្សានុសិស្សបានចូលរៀនវិញផងដែរ។
តាមរយៈវីដេអូសុំទោសគ្រូ និងបកស្រាយការពិតរបស់អាម៉ី នាងបានលើកដៃសំពះ និងបានបកស្រាយថា ព័ត៌មានដែលនាងបាននិយាយគឺជាព័ត៌មានក្លែងក្លាយ មិនពិតនោះទេ។
នាងនិយាយក្នុងខ្លឹមសារដើមថា៖ «ខ្ញុំសុំទោសលោកគ្រូទាំង ២ ដែលខ្ញុំបាននិយាយថា នៅសាលារៀន ហួរ ឈៀវ នេះមានអ្នកស្លាប់ដោយជំងឺកូវីដ ១៩ ចំនួន ៣ នាក់។ ការពិតរឿងនេះមិនមែនកើតឡើងនៅសាលាយើងទេ ព័ត៌មាននេះគឺមិនពិតទេ ដោយសារខ្ញុំឮពីគេដែរ។ ខ្ញុំនិយាយបន្ត ហើយគេបានយកសំឡេងខ្ញុំទៅណាទៀត ក៏ខ្ញុំមិនដឹងដែរ។ ខ្ញុំសូមផ្តែផ្តាំទៅកាន់ប្រជាជនទាំងអស់គ្នាដែលលេងក្នុងបណ្តាញហ្វេសប៊ុកគឺនៅក្នុងសាលា ហួរ ឈៀវ នេះអត់មានវីរុសកូរ៉ូណាកើតឡើងទេ»។
លោក អ៊ុប សុវណ្ណចាន់ថន មន្ត្រីអង្កេតនៃអង្គការសិទ្ធិមនុស្ស លីកាដូ ប្រចាំខេត្តកំពត និងកែប ថ្លែងថាលោកមិនគាំទ្រទេ ចំពោះការផ្សាយព័ត៌មានក្លែងក្លាយដែលធ្វើឲ្យចលាចលដល់សង្គម។ លោកថា ចំពោះវិធានការរបស់អាជ្ញាធរក្នុងករណីនេះក៏មិនមានការបិទសិទ្ធិអ្វីខ្លាំងនោះដែរ។
លោកបញ្ជាក់ថា៖ «ធាតុពិតជំហានដំបូងហ្នឹងខាងខ្ញុំក៏មិនទាន់ទទួលបានច្បាស់ដែរពាក់ព័ន្ធទៅនឹងអ្នកឆ្លង។ មុនដំបូងគាត់ផ្ញើសារតាមក្រុមឆាតហ្វេសប៊ុកថាមានអ្នកឆ្លង អ្នកអីនៅសាលាគាត់ ហើយបន្ទាប់មកទៀត នៅពេលដែលយើងខ្ញុំចុះអង្កេតសព្វគ្រប់ទៅពាក់ព័ន្ធជាមួយព័ត៌មានហ្នឹង អត់ពិតមែន។ អាជ្ញាធរក៏អត់មានបិទអីខ្លាំងដែរ គ្រាន់តែគាត់ចង់បានសម្តីរបស់ក្មេងស្រីហ្នឹងឲ្យបានច្បាស់ថា ព័ត៌មានហ្នឹង មិនមែនជាព័ត៌មានពិតទេ ហើយក៏មានការអប់រំគាត់នៅក្នុងសាលាហ្នឹង ថតជាឃ្លីបវីដេអូ»៕