ភ្នំពេញៈ ជាអ្វីដែលត្រូវបានគេអះអាងថាក្នុងគោលបំណងបង្ហាញពីឆន្ទៈពង្រឹងទំនាក់ទំនង និងបញ្ជ្រាបវប្បធម៌សន្ទនាទៅកាន់អ្នកជំនាន់ក្រោយរបស់ខ្លួន មេដឹកនាំគណបក្សកាន់អំណាច និងគណបក្សប្រឆាំងបានណាត់ជួបគ្នាទទួលទានអាហារពេលល្ងាចជាលក្ខណៈគ្រួសារលើកដំបូងដ៏កម្រមួយនៅសណ្ឋាគារកាំបូឌីយ៉ាណាក្នុងរាជធានីភ្នំពេញកាលពីល្ងាចថ្ងៃសៅរ៍។
ដូចការគ្រោងទុកជំនួបពិសាអាហារពេលល្ងាចនៅសណ្ឋាគារកាំបូឌីយ៉ាណាកាលពីល្ងាចថ្ងៃសៅរ៍រវាងក្រុមគ្រួសារលោកនាយករដ្ឋមន្ត្រី ហ៊ុន សែន និងក្រុមគ្រួសារប្រធានគណបក្សសង្គ្រោះជាតិ លោក សម រង្ស៊ី បានធ្វើឡើងតាមការបបួលរបស់ លោក ហ៊ុន សែន។
នៅក្នុងពិធីបើកព្រឹត្តិការណ៍អង្គរសង្ក្រាន្តនៅខេត្តសៀមរាបកាលពីអំឡុងខែមេសា ឆ្នាំ ២០១៥ កន្លងមកលោកនាយករដ្ឋមន្ត្រីបានលើកឡើងថា មូលហេតុសំខាន់នៃជំនួបអាហារពេលល្ងាចរវាងក្រុមគ្រួសារទាំងពីរ គឺដើម្បីឲ្យកូនចៅរបស់លោក និងរបស់លោក សម រង្ស៊ី មានឱកាសស្គាល់គ្នា និងប្រកាន់យកវប្បធម៌សន្ទនាគ្នាបន្តពីរូបលោកទាំងពីរ។
សមាសភាពចូលរួមរបស់ក្រុមគ្រួសារទាំងពីរកាលពីល្ងាចថ្ងៃសៅរ៍រួមមាន លោក ហ៊ុន សែន លោកស្រី ប៊ុនរ៉ានី ព្រមទាំងកូន ៤ នាក់ និងកូនប្រសាម្នាក់ចំណែកម្ខាងទៀតមាន លោក សម រង្ស៊ី លោកស្រី ជូឡុង សូមូរ៉ា កូនស្រីម្នាក់ និងកូនប្រសាម្នាក់។ ក្នុងជំនួបអាហារពេលល្ងាចនេះមានការថតរូបជុំគ្នារវាងលោក ហ៊ុន សែន និងលោក សម រង្ស៊ី និងជាមួយនឹងកូនៗរបស់អ្នកទាំងពីរដែលត្រូវបានអ្នកប្រើប្រាស់បណ្តាញសង្គមបន្តចែករំលែក និងបញ្ចេញមតិស្វាគមន៍ចំពោះទំនាក់ទំនងល្អ និងភាពស្និទ្ធស្នាលនេះផងដែរ។
នៅក្នុងហ្វេសប៊ុកផ្លូវការរបស់ខ្លួន លោក សម រង្ស៊ី កាលពីថ្ងៃម្សិលមិញក៏បានបង្ហោះរូបថតទាំងនោះ ដោយលើកឡើងថាការជួបជុំបែបនេះមានលក្ខណៈជាប្រវត្តិសាស្ត្រ និងជាលើកដំបូងនៅកម្ពុជាដែលតាមទម្លាប់ពីមុនមកគណបក្សកាន់អំណាច និងគណបក្សប្រឆាំងតែងតែឈ្លោះគ្នាឥតប្រណីរហូតដល់កាប់សម្លាប់គ្នាក៏មាន។
លោកថា៖ «បំណងរបស់យើងគឺចង់ពង្រីកវប្បធម៌សន្ទនាទៅដល់មន្ត្រីគ្រប់ជាន់ថ្នាក់ និងសមាជិក សមាជិកាគ្រប់រូបនៃគណបក្សទាំងពីរហើយក៏ចង់ឲ្យវប្បធម៌សន្ទនានេះបន្តទៅដល់កូនចៅយើង និងខ្មែរជំនាន់ក្រោយជាទូទៅ។ វប្បធម៌សន្ទនានេះធានាឲ្យជនជាតិខ្មែរទាំងអស់បានសុខជានិច្ចទោះជាមានការប្រែប្រួលនយោបាយយ៉ាងណាក៏ដោយនៅពេលអនាគត...»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានឲ្យដឹងថាអាហារមួយពេលសាមញ្ញនេះ គឺថ្នាក់ដឹកនាំបក្សទាំងពីរមានចេតនាពង្រឹងវប្បធម៌សន្ទនា និងបង្ហាញភាពកក់ក្តៅទៅកាន់ប្រជាពលរដ្ឋពីដំណើរការល្អនៃស្ថានភាពនយោបាយនៅកម្ពុជា។
លោកថា៖ «ជំនួបនេះជាលក្ខណៈគ្រួសារជជែកស្វែងយល់ពីគ្នាមិនមាននិយាយរឿងអីធំដុំទេ។ បើនិយាយពីជំហរបក្ស ឧទាហរណ៍ រឿងច្បាប់អង្គការ គណបក្សសង្គ្រោះជាតិថាដាច់ខាតគឺមិនចង់ឲ្យចេញតែគណបក្សប្រជាជនថាទុកមិនបានទៀតទេរឿងអ៊ីចឹង ម៉េចនឹងអាចនិយាយមុខក្មេងៗបាន»។
បើតាមលោក សុខ ឥសាន កូនៗរបស់ថ្នាក់ដឹកនាំបក្សទាំងពីរបានចាប់ផ្តើមស្គាល់គ្នាក្នុងជំនួបលើកដំបូងនេះហើយអាចនឹងមានការបន្តជួបគ្នាជាបន្តបន្ទាប់ដើម្បីរក្សាមិត្តភាព និងទំនាក់ទំនងល្អស្តែងតាមវប្បធម៌សន្ទនានេះ។
ក្នុងគេហទំព័ររបស់ខ្លួន លោក សម រង្ស៊ី ក៏បានលើកឡើងពីសមិទ្ធផលវិជ្ជមាននៅពេលបច្ចុប្បន្ន និងអនាគត ដែលចេញមកពីវប្បធម៌សន្ទនានេះរួមមានការបង្កើត និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត (គ.ជ.ប) ថ្មីក្នុងការបោះឆ្នោតឆ្នាំ ២០១៧ និង ២០១៨ ភាពកក់ក្តៅក្នុងចិត្តរបស់អ្នកគាំទ្រគណបក្សសង្គ្រោះជាតិរួចផុតពីអារម្មណ៍ភ័យខ្លាចបន្ទាប់ពីហិង្សានយោបាយ ការគំរាមកំហែង និងការបំភិតបំភ័យបានបញ្ចប់គួបផ្សំនឹងការបង្កើត និងដំណើរការស្ថានីយទូរទស្សន៍ព្រះអាទិត្យដែលជាទូរទស្សន៍ដំបូងរៀបចំដោយបក្សសង្គ្រោះជាតិ។
អ្នកវិភាគនយោបាយវ័យចំណាស់លោកស្រី ជា វណ្ណាត បានកត់សម្គាល់ពីឥរិយាបថបែបស៊ីវិល័យ និងភាពចាស់ទុំរបស់ថ្នាក់ដឹកនាំកម្ពុជាតាមរយៈវប្បធម៌សន្ទនានេះចៀសផុតពីការប្រើប្រាស់ហិង្សា និងកំហឹងទល់កំហល់។ តែយ៉ាងណាក៏ដោយ លោកស្រីគិតថាអ្នកនយោបាយមិនត្រូវមើលរំលងពីការទាញចំណេញពីភាគីម្ខាងៗឡើយ។
លោកស្រីថ្លែងថា៖ «ជំនួបនេះគណបក្សប្រជាជនអាចធ្វើឲ្យអ្នកគាំទ្រគណបក្សសង្គ្រោះជាតិខកចិត្តចំពោះលោក សម រង្ស៊ី តែនេះជាមនោសញ្ចេតនាភ្លាមៗប៉ុណ្ណោះ ព្រោះការបោះឆ្នោត ២០១៨ នៅយូរទៀត។ បញ្ហាធំគឺថាតើគណបក្សប្រឆាំងនៅដើរតាមគោលនយោបាយរបស់ខ្លួនទៀតឬយ៉ាងណា?តែបើយើងនិយាយពីអ្នកកណ្តាលមិនគាំទ្រគណបក្សណាផ្កាប់មុខនោះ គឺពួកគេសប្បាយនិងចង់ឲ្យមានជំនួបបែបនេះ»។
លោកស្រីបន្តថា៖ «ចំណែកសង្គ្រោះជាតិអាចប្រើប្រាស់ឱកាសនេះដោះស្រាយបញ្ហាបានច្រើនរឿង និងត្រូវការរៀនសូត្រច្រើនពីគណបក្សប្រជាជនក្នុងការដឹកនាំប្រទេស និងបង្កើនចំណេះដឹងក្នុងរឿងនយោបាយបានច្រើនទៀត។ មួយផ្នែកទៀតគឺអ្វីដែលគណបក្សប្រឆាំងលើកឡើងជាផលប្រយោជន៍ជាតិ និងសង្គមគឺនឹងទទួលបានការទទួលយកដោយទន់ភ្លន់ពីគណបក្សកាន់អំណាច។ ថ្មីៗនេះយើងឃើញបញ្ហាវៀតណាមជីកស្រះសង្គ្រោះជាតិអន្តរាគមន៍ហើយបក្សប្រជាជនស្តាប់ និងចូលរួមដោះស្រាយ។ កិច្ចសហការគ្នានេះយើងឃើញនូវដំណោះស្រាយល្អដែលពលរដ្ឋចង់បាន»៕
