The Phnom Penh Post Search

Search form

Logo of Phnom Penh Post newspaper Phnom Penh Post - គ្រួសារ​ពលករ​ចេញ​ទៅ ប្រ៊ុយណេ ២៥ នាក់​សុំ​អន្តរាគមន៍​សង្គ្រោះ

គ្រួសារ​ពលករ​ចេញ​ទៅ ប្រ៊ុយណេ ២៥ នាក់​សុំ​អន្តរាគមន៍​សង្គ្រោះ

គ្រួសារ​ពលករ​ចេញ​ទៅ ប្រ៊ុយណេ ២៥ នាក់​សុំ​អន្តរាគមន៍​សង្គ្រោះ

130920_06
ពលករចំណាកស្រុកបានសង្គ្រោះនាំមកដល់ស្រុកវិញ ហេង ជីវ័ន

ពោធិ៍សាត់ៈ ក្រុម​គ្រួសារ​ពលករ ២៥ នាក់ ដែល​មេ​ខ្យល់​បោក​ប្រាស់​នាំ​ទៅ​ធ្វើ​ការ​ខុស​ច្បាប់​នៅ​ប្រទេស ប៊្រុយណេ រាប់​ខែ​ហើយ​បាត់​ដំណឹង​សូន្យ​បាន​ស្នើ​សុំ​ឲ្យ​សមត្ថកិច្ច​របស់​រដ្ឋាភិបាល​និង​ក្រុម​អង្គការ​សិទ្ធិ​មនុស្ស​នៅ​ក្នុង​ខេត្ត ពោធិ៍សាត់ ជួយ​អន្តរាគមន៍​ដើម្បី​បាន​ពួក​គេ​ត្រឡប់​មក​ស្រុក​កំណើត​វិញ។

អ្នក​ស្រី សែម សួន អាយុ ៤៨ ឆ្នាំ​ជា​អ្នក​ភូមិ​នៅ​ស្រុក ភ្នំក្រវាញ បាន​ឲ្យ​ដឹង​ពី​ថ្ងៃ​ម្សិលមិញ​ថា អ្នក​ស្រី​បាន​ដាក់​ពាក្យ​ប្តឹង​ទៅ​អង្គការ លីកាដូ នៅ​ខេត្ត​នេះ​ឲ្យ​ជួយ​អន្តរាគមន៍​នាំ​ប្ដី​គាត់​ដែល​ទៅ​ធ្វើការ​នៅ​ប្រទេស ប្រ៊ុយណេ តាំង​ពី​ខែ វិច្ឆិកា ឆ្នាំ ២០១២ ឲ្យ​បាន​វិល​ត្រឡប់​មក​ផ្ទះ​វិញ។

អ្នក​ស្រី​ថា៖ «ប្ដី​ខ្ញុំ​និង​ពលករ ២៤ នាក់​បាន​ទៅ​ធ្វើការ​ជា​កម្មករ​ចម្ការ​ដូង​ប្រេង​នៅ​ប្រទេស ប្រ៊ុយណេ តាម​មេ​ខ្យល់​ម្នាក់​នៅ​ក្នុង​ភូមិ​ជាមួយ​ដោយ​គេ​ធានា​ផ្ដល់​ការងារ​បាន​ប្រាក់​ឈ្នួល​ខ្ពស់»។

អ្នក​ស្រី សួន បញ្ជាក់​ថា គាត់​មិន​អាច​ទាក់​ទង​សួរ​ដំណឹង​ពី​ប្តី​បាន​ទេ​ចាប់​ពី​ខែ កក្កដា បន្ទាប់​ពី​ប្ដី​គាត់​ប្រាប់​ថា ត្រូវ​អាជ្ញាធរ​នៅ ប្រ៊ុយណេ ចាប់​ខ្លួន​បញ្ជូន​ទៅ​ប៉ុស្តិ៍​ប៉ូលិស ហើយ​លើក​ចុង​ក្រោយ​គឺ​ពលករ ២៥ នាក់​នោះ​ថា ត្រូវ​សមត្ថកិច្ច​បញ្ជូន​ទៅ​ដាក់​ក្នុង​ជំរំ​ដែល​ពួក​គេ​មិន​ដឹង​ថា ជា​ជំរំ​អ្វី​និង​នៅ​ទី​ណា​នោះ​ទេ។

ភរិយា​ពលករ​ម្នាក់​នេះ​បន្ត​ថា ៖ «បើ​សិន​ដឹង​ថា​វា​មាន​បញ្ហា​ដូច្នេះ ខ្ញុំ​នឹង​មិន​ឲ្យ​គាត់​ទៅ​ទី​នោះ​ទេ។ នេះ​មក​តែ​ពី​ភាព​ក្រីក្រ​ទើប​ខ្ញុំ​ឲ្យ​ប្តី​ចេញ​ទៅ​រក​ប្រាក់​មក​ចិញ្ចឹម​គ្រួសារ​។ ឥឡូវ ខ្ញុំ​មិន​ដឹង​ថា រស់​យ៉ាង​ម៉េច​ទេ បើ​សិន​គាត់​មាន​គ្រោះថ្នាក់​ឬ​ក៏​ស្លាប់​នោះ»។

អ្នក​ស្រី សួន បន្ត​ថា ពលករ​ខ្លះ​ចេញ​ពី​ផ្ទះ​តាំង​ពី​ឆ្នាំ ២០១០ ហើយ​ក្រុម​គ្រួសារ​មិន​ទទួល​ដំណឹង​អ្វី​សោះ​រហូត​មក​ដល់​ពេល​នេះ។ គាត់​ថា៖ «ខ្ញុំ​សូម​ឲ្យ​រាជ​រដ្ឋាភិបាល​និង​អង្គការ​ពាក់​ព័ន្ធ អន្តរាគមន៍​ជួយ​ដល់​ប្តី​ខ្ញុំ​និង​ពលករ​ឯ​ទៀត​ឲ្យ​បាន​វិល​មក​ស្រុក​កំណើត​វិញ​ផង។ យើង​កំពុង​រង់​ចាំ​ពួក​គេ​ដោយ​ក្តី​បារម្ភ»។

កញ្ញា មិត្ត សាមួន មន្ត្រី​ស៊ើប​អង្កេត​អង្គការ​សិទ្ធិ​មនុស្ស លីកាដូ ប្រចាំ​ខេត្ត ពោធិ៍សាត់ បាន​ថ្លែង​ថា កញ្ញា​បាន​ទទួល​ពាក្យ​បណ្ដឹង​ពី​គ្រួសារ​ពលករ​ទាំង ២៥ នាក់​នោះ​ហើយ​ក្នុង​នោះ​មាន​ពីរ​នាក់​មក​ពី​ខេត្ត បាត់ដំបង ហើយ​កំពុង​ធ្វើ​អន្តរាគមន៍​លើ​ករណី​នេះ។

កញ្ញ​ថ្លែង​ថា៖ «ខ្ញុំ ចុះ​ទៅ​ស៊ើប​អង្កេត​ដល់​ផ្ទះ​ពួក​គេ​ពី​ម្សិលមិញ ហើយ​ខ្ញុំ​បាន​ជូន​ដំណឹង​ពី​ករណី​នេះ ទៅ​ស្នងការ​នគរបាល​ខេត្ត​រួច​ហើយ​ដែរ»។

ក្នុង​ឆ្នាំ​នេះ អង្គការ លីកាដូ បាន​ទទួល​បណ្ដឹង ១៧ ករណី មាន​ជន​រងគ្រោះ ៧៦ នាក់ ក្នុង​នោះ​ជួយ​អន្តរាគមន៍​នាំ ៥ នាក់​ឲ្យ​មក​ផ្ទះ​វិញ​ដោយ​សុវត្ថិភាព។

កញ្ញា មិត្ត សាមួន អះអាង​ថា ៖ «ខ្ញុំ​គិត​ថា​ដោយ​សារ​តែ​ការ​មិន​ទទួល​បាន​ព័ត៌មាន ខ្វះ​ចំណេះ​ដឹង និង​ភាព​ក្រីក្រ​នោះ ទើប​បាន​ជា​ធ្វើ​ឲ្យ​ពួក​គាត់​សម្រេច​ចិត្ត​ធ្វើ​ចំណាក​ស្រុក​ទៅ​ធ្វើ​ការ​ខុស​ច្បាប់​នៅ​ប្រទេស​ផ្សេង​ដោយ​គ្មាន​ពិចារណា ខណៈ​ឮ​មេខ្យល់​បោក​ថា ពួក​គេ​នឹង​ទទួល​បាន​ការងារ​មាន​ប្រាក់​ឈ្នួល​ខ្ពស់»។

លោក​ស្រី ក្ដាន់ សុផល ស្នងការ​រង​នគរបាល​ខេត្ត ពោធិ៍សាត់ ទទួល​បន្ទុក​ការងារ​ប្រឆាំង​ការ​ជួញ​ដូរ​មនុស្ស​និង​ការពារ​អនីតិជន មិន​អាច​ទាក់​ទង​សុំ​ការ​អធិប្បាយ​បាន​ទេ កាល​ពី​ម្សិលមិញ ប៉ុន្តែ តាម​កញ្ញា មិត្ត សាមួន អះអាង​ថា នាង​បាន​ទៅ​ជួប​ផ្ទាល់ ហើយ​លោក​ស្រី​ស្នងការ​រង​បាន​ឲ្យ​នាង​នាំ​សមាជិក​ក្រុម​គ្រួសារ​ជន​រងគ្រោះ​ទាំង​អស់​នោះ​ទៅ​ជួប​គាត់​ដើម្បី​សួរ​នាំ​នៅ​ថ្ងៃ​សុក្រ​នេះ។

កញ្ញា សាមួន បញ្ជាក់​ថា៖ «ខាង​សមត្ថកិច្ច​ចង់​សួរ​នាំ​ព័ត៌មាន​បន្ថែម ពាក់​ព័ន្ធ​នឹង​ពលករ​ទាំង ២៥ នាក់​នោះ»៕ PN

អត្ថបទគួរចាប់អារម្មណ៍