ភ្នំពេញៈ គ្រឿងញៀនជាង ៤៦០ គីឡូក្រាម ត្រូវបានកម្លាំងទាហានជើងទឹកនៃទីបញ្ជាការដ្ឋានជួរមុខសន្តិសុខលម្ហរសមុទ្រប្រទះឃើញ និងរឹបអូសបានពីក្នុងព្រៃមួយកន្លែងស្ថិតនៅលើកោះពូលូវ៉ៃ ក្នុងសង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។ នេះបើតាមការបញ្ជាក់របស់មន្ត្រីយោធាជាន់ខ្ពស់នៃទីបញ្ជាការដ្ឋានទ័ពជើងទឹកជួរមុខ នៅថ្ងៃអាទិត្យនេះ។
លោក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខគណៈកម្មាធិការជាតិសន្តិសុខលម្ហរសមុទ្របានប្រាប់ ភ្នំពេញ ប៉ុស្តិ៍ថា គ្រឿងញៀនទាំងនោះត្រូវបានប្រទះឃើញនិងរឹបអូសបានកាលពីល្ងាចថ្ងៃទី ៦ ខែ កុម្ភៈ ឆ្នាំ ២០២១ ក្នុងអំឡុងពេលនៃការចុះល្បាត ស្រាវជ្រាវ និងបង្ក្រាបបទល្មើសក្នុងដែនសមុទ្រ។
លោក ទៀ សុខា បានថ្លែងថា៖ «គ្រឿងញៀនទាំងនោះ មានទម្ងន់សរុប ៤៦៥ គីឡូក្រាម។ វាទំនងជាត្រូវបានគេផ្លុងចោលនៅក្នុងតំបន់នោះ»។
បើតាមលោក សុខា នៅពេលនេះ ក្រុមមន្ត្រីជំនាញពីគ្រប់ស្ថាប័នពាក់ព័ន្ធ កំពុងសហការគ្នាត្រួតពិនិត្យគ្រឿងញៀនទាំងនោះ ដើម្បីកំណត់ពីប្រភេទរបស់វាឲ្យបានជាក់លាក់ បន្ទាប់ពីត្រូវបានកម្លាំងល្បាតនាំយកវាមកដល់ទីបញ្ជាការដ្ឋានជួរមុខ គណៈកម្មាធិការជាតិសន្តិសុខលម្ហរសមុទ្រ នាព្រឹកម្សិលមិញ។
ជុំវិញករណីនេះ លោក ម៉ក់ ជីតូ អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន បានប្រាប់ ភ្នំពេញ ប៉ុស្តិ៍ថា យោងតាមលទ្ធផលពិសោធន៍ គ្រឿងញៀនទាំងនោះជាប្រភេទ Ketamine។
លោកអគ្គលេខាធិការរងបញ្ជាក់ថា៖ «គ្រឿងញៀនប្រភេទនេះ ភាគច្រើនត្រូវបានក្រុមឧក្រិដ្ឋជននាំចូលពីកោះតៃវ៉ាន់ តាមផ្លូវទឹកហើយពួកវាប្រើល្បិចកលបែបនេះ ដើម្បីពង្វាងដានសមត្ថកិច្ច»។
បើតាមលោក ម៉ក់ ជីតូ នាពេលកន្លងមក កម្លាំងនគរបាលបង្ក្រាបបទល្មើសគ្រឿងញៀន បានបង្ក្រាបចាប់គ្រឿងញៀនតាមផ្លូវទឹកចំនួន ៥ លើកមកហើយ។ ក្នុងមួយលើកៗ មានការឹបអូសគ្រឿងញៀនមិនក្រោម ១០០គីឡូក្រាមនោះទេ ហើយឧក្រិដ្ឋជនដែលត្រូវបានចាប់ឃាត់ខ្លួនបាន ភាគច្រើនជាចិនកោះតៃវ៉ាន់។
លោកបានបន្តថា នៅពេលនេះកម្លាំងសមត្ថកិច្ចជំនាញ កំពុងបន្តស្រាវជ្រាវស្វែងរកមុខសញ្ញា ក្រុមឧក្រិដ្ឋជន ដែលបាននាំចូលគ្រឿងញៀនទាំងនេះមកផ្លុងចោលនៅកោះពូលូវ៉ៃ ដើម្បីចាប់ខ្លួននិងកសាងសំណុំរឿងបញ្ជូនឲ្យតុលាការផ្ដន្ទាទោសតាមនីតិវិធីច្បាប់៕