.jpg)
គ្រឿងញៀន ៥១ គីឡូក្រាម និងសារធាតុញៀនជាច្រើនត្រូវអាជ្ញាធរដុតបំផ្លាញចោល កាលពីម្សិលមិញ។ រូបថត Preah Sihnouk Province Hall
ព្រះសីហនុ: គ្រឿងញៀនជាច្រើនប្រភេទសរុប ៥១ គីឡូក្រាម និងសារធាតុញៀនដែលបម្រើឲ្យការកែច្នៃគ្រឿងញៀនមានចំនួន ១៦៩៨,០១ ក្រាម ត្រូវបានអាជ្ញាធរខេត្តព្រះសីហនុ និងក្រសួងយុត្តិធម៌ដុតកម្ទេចចោលកាលពីម្សិលមិញ បន្ទាប់ពីសមត្ថកិច្ច ៤ ខេត្តបានធ្វើការបង្ក្រាបបានជាបន្តបន្ទាប់នាពេលកន្លងមក។
ពិធីដុតបំផ្លាញគ្រឿងញៀននេះធ្វើឡើងដោយមានការចូលរួមពីលោក កើត រិទ្ធ រដ្ឋមន្ត្រីក្រសួងយុត្តិធម៌ និងជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀនលោក ជាម ហ៊ីម ប្រធានក្រុមប្រឹក្សាខេត្តព្រះសីហនុ និងលោក គួច ចំរើន អភិបាលខេត្ត និងមន្ត្រីពាក់ព័ន្ធជាច្រើននាក់ទៀត។ កម្មវិធីនេះធ្វើឡើងនៅភូមិ ១ សង្កាត់លេខ ១ ក្រុងព្រះសីហនុ។
លោក សៀង សុខ ព្រះរាជអាជ្ញាអមសាលាដំបូងខេត្តព្រះសីហនុបានថ្លែងក្នុងសន្និសីទកាសែតមួយកាលពីថ្ងៃទី ២១ ខែកក្កដា ថាគ្រឿងញៀន និងសារធាតុធ្វើឲ្យប៉ះពាល់ដល់ប្រព័ន្ធប្រសាទធ្ងន់ធ្ងរ និងសុខភាពរបស់អ្នកប្រើប្រាស់។ ដូច្នេះសមត្ថកិច្ច និងអាជ្ញាធរបានខិតខំប្រឹងប្រែងធ្វើការបង្ក្រាបជាបន្តបន្ទាប់ ដោយចាប់បានទាំងជនសង្ស័យ និងវត្ថុតាងជាគ្រឿងញៀន និងសម្ភារមួយចំនួនដែលបម្រើឲ្យការប្រព្រឹត្តបទល្មើសគ្រឿងញៀន។
លោកបញ្ជាក់ថា៖ «វត្ថុតាងដែលក្រុមការងារមន្ត្រីជំនាញដុតចោលនាពេលនេះគឺចង់បង្ហាញសាធារណជនឲ្យបានដឹងអំពីសកម្មភាពរបស់មន្ត្រីជំនាញដែលបង្ក្រាប ព្រោះធ្លាប់មានអ្នកឆ្ងល់ថា បង្ក្រាបគ្រឿងញៀនបានហើយ តើគេយកទៅណា? អ៊ីចឹងយើងចង់បង្ហាញឲ្យដឹងតែម្ដង»។
បើតាមលោក សៀង សុខ គ្រឿងញៀនចំនួន ៥១ គីឡូក្រាម និងមានសារធាតុញៀនផ្សេងៗទៀតដែលបម្រើឲ្យការកែច្នៃគ្រឿងញៀនមានចំនួន ១ ៦៩៨,០១ ក្រាម គឺបានមកពី ៨១ សំណុំរឿង ដែលប្រមូលពីខេត្តព្រះសីហនុ កំពត កោះកុង និងខេត្តកែប។
លោក គួច ចំរើន អភិបាលខេត្តព្រះសីហនុបានថ្លែងក្នុងពិធីនេះថា បញ្ហាគ្រឿងញៀនគឺជាបញ្ហាសកល និងជាឧក្រិដ្ឋកម្មឆ្លងដែន ដែលអាចបង្កមហន្តរាយដល់ប្រជាពលរដ្ឋ គ្រួសារ សហគមន៍ និងសង្គមជាតិទាំងមូល។ ការប្រយុទ្ធប្រឆាំងគ្រឿងញៀននាពេលកន្លងមក មានការវិវឌ្ឍប្រែប្រួលគួរឲ្យកត់សម្គាល់ ហើយគណៈកម្មាធិការត្រួតពិនិត្យគ្រឿងញៀនខេត្តបានចាត់វិធានការពហុវិស័យដើម្បីឆ្លើយតបទៅនឹងបញ្ហាគ្រឿងញៀន ដែលអាចគ្រប់គ្រងទាន់ពេលវេលា។
លោកបន្តថា យន្តការនៃការទប់ស្កាត់គ្រឿងញៀន ត្រូវបានពិនិត្យពីថ្នាក់មូលដ្ឋាន ភូមិ ឃុំ សង្កាត់ ក្រុងស្រុក រហូតដល់ខេត្តតាមរយៈរបាយការណ៍បញ្ជូនសារទាន់ហេតុការណ៍ប្រចាំថ្ងៃសប្តាហ៍ ខែ ត្រីមាសឆមាស និងរបាយការណ៍ប្រចាំឆ្នាំ។
ទោះជាយ៉ាងណាលោក ចំរើន បញ្ជាក់ថាសភាពការណ៍គ្រឿងញៀនដែលមកពីខេត្តផ្សេងៗនៅក្នុងតំបន់ និងនៅលើពិភពលោកបានជះឥទ្ធិពលដល់សន្តិសុខសណ្ដាប់ធ្នាប់ សុខភាពសាធារណៈដែលចាំបាច់ត្រូវចាត់វិធានការការពារឲ្យបានម៉ឺងម៉ាត់ដើម្បីដោះស្រាយបញ្ហាប្រឈមទាំងនេះ។
លោកបញ្ជាក់ថា៖ «យើងបានរៀបចំយុទ្ធសាស្ត្រត្រួតពិនិត្យគ្រឿងញៀន ខេត្តបានចាត់ទុកបញ្ហានេះជាបញ្ហាអាទិភាពហើយបានរៀបចំផែនការត្រៀមលក្ខណសម្បត្តិទាំងធនធានមនុស្ស ធនធានហិរញ្ញវត្ថុ លិខិតបទដ្ឋានគតិយុត្តរចនាសម្ព័ន្ធដែលមានការចាត់តាំងដឹកនាំអនុវត្ត និងការទទួលខុសត្រូវខ្ពស់ ដើម្បីធានាឲ្យបានការអនុវត្តប្រកបដោយជោគជ័យ»។
លោក កើត រិទ្ធ ក៏បានថ្លែងក្នុងកម្មវិធីនេះដែរថា កន្លែងណាដែលមានប្រើប្រាស់គ្រឿងញៀនច្រើន ទីនោះនឹងមានបទល្មើសកើតច្រើន និងមានបញ្ហាអសន្តិសុខសង្គម ខណៈពីមុនកម្ពុជាជាកន្លែងដឹកជញ្ជូនគ្រឿងញៀនឆ្លងកាត់ ប៉ុន្ដែបច្ចុប្បន្នកម្ពុជាបានក្លាយជាកន្លែងផលិតកែច្នៃគ្រឿងញៀននៅនឹងកន្លែងដែរ។
លោកលើកឡើងថា គ្រឿងញៀនបណ្តាលឲ្យមានគ្រោះថ្នាក់ធំ ៣ យ៉ាងគឺបំផ្លាញខ្លួនឯង បំផ្លាញគ្រួសារ និងសហគមន៍ និងបំផ្លាញប្រទេសជាតិ។ លោកបញ្ជាក់ថា៖ «យើងត្រូវមានវិធានការណ៍ប្រឆាំងគ្រឿងញៀនគឺផ្តើមចេញពីបុគ្គលម្នាក់ៗត្រូវឆ្លើយថាទេចំពោះគ្រឿងញៀន។ គ្រួសារ និងសហគមន៍ ត្រូវសហការជាមួយអាជ្ញាធរមានសមត្ថកិច្ច ដើម្បីបង្ក្រាបទប់ស្កាត់សង្គ្រោះអ្នកញៀនថ្នាំឲ្យបានទាន់ពេលវេលា និងមន្ត្រីអនុវត្តច្បាប់ទាំងអស់ត្រូវបំពេញភារកិច្ចរបស់ខ្លួនឲ្យបានត្រឹមត្រូវ និងម៉ឺងម៉ាត់ ដើម្បីសុខសុវត្ថិភាពប្រជាជនយើង»៕
