The Phnom Penh Post Search

Search form

Logo of Phnom Penh Post newspaper Phnom Penh Post - គ្រឿង​អលង្ការ​សម័យ​​បុរាណ នឹង​បង្ហាញ​ជូន​​ក្នុង​ពិធីតាំង​ពិព័រណ៌ នាដើម​ខែ​មករា




គ្រឿង​អលង្ការ​សម័យ​​បុរាណ នឹង​បង្ហាញ​ជូន​​ក្នុង​ពិធីតាំង​ពិព័រណ៌ នាដើម​ខែ​មករា

Content image - Phnom Penh Post
គ្រឿងអលង្ការជាផ្នួងសក់ធ្វើ​ពីមាស រកឃើញនៅ​ប្រាសាទ​តាព្រហ្ម ព្រម​ទាំង​វត្ថុ​បុរាណ​ផ្សេងទៀត ក្នុង​ពិធីប្រគល់ទទួល​រវាងអាជ្ញាធរ​អប្សរា និង​ក្រសួង​វប្បធម៌ កាលពី​ម្សិលមិញ។ ហេង ជីវ័ន

គ្រឿង​អលង្ការ​សម័យ​​បុរាណ នឹង​បង្ហាញ​ជូន​​ក្នុង​ពិធីតាំង​ពិព័រណ៌ នាដើម​ខែ​មករា

ភ្នំពេញៈ កម្ពុជា​ ​នឹងធ្វើការ​​រៀបចំ​ធ្វើការ​តាំង​ពិព័រណ៌គ្រឿង​អលង្ការ​ពី​សម័យ​បុរាណ​ នៅ​ដើមខែ​មករា​ខាង​មុខនេះ​ ដោយធ្វើ​ឡើង​ក្នុង​រយៈពេល​ ៣ ខែ ដើម្បី​ឲ្យ​ទស្សនា​ពី​វត្ថុ​បុរាណ​ដ៏​មាន​តម្លៃ​របស់កម្ពុជា ដោយ​សារ​ថ្មីៗនេះ ទើប​ទទួល​បាន​មក​វិញ​នូវ​គ្រឿង​អលង្ការ ចំនួន​ ១០ ឈុត​ ពី​ប្រទេស​អង់គ្លេស។

ដោយសារ​មានគម្រោង​ដ៏ធំមួយ​នេះ ទើប​កាលពីម្សិលមិញ នៅ​ឯខេត្ត​សៀ​មរាប អាជ្ញាធរ​អប្សរា បាន​ប្រគល់​គ្រឿង​អលង្ការ​មួយ​ចំនួន​ ដែល​យក​បាន​មក​ពី​កំណាយ​ផ្សេងៗ​នៅ​ក្នុង​តំបន់​អង្គរ​ រួមមាន​ផ្នួងសក់​មាស ចិញ្ចៀន​មាស សន្លឹក​មាស​ដែល​មាន​ចារ​ជា​យ័ន្ត​ដាក់​ក្នុង​គ្រឹះ​ប្រាសាទ​ និង​មាន​ព្រះសំរឹទ្ធិ​ពីរ​អង្គ​ផងដែរ។

លោក គង់ វីរៈ ប្រធាន​សា​រៈ​មន្ទីរជាតិ ដែល​មក​ទទួល​គ្រឿង​អលង្ការពី​អាជ្ញាធរ​អប្សរា កាលពីម្សិលមិញ​ ថ្លែង​ថា ៖ «គ្រឿង​អលង្ការ ទាំងនេះ បូក​នឹង​អលង្កាទើប​មក​ពី​ប្រទេស​អង់គ្លេស​ យើង​នឹង​រៀបចំ​ពិព័រណ៌​មួយ​ផ្សព្វផ្សាយ​ជូន​ភ្ញៀវជាតិ​ អន្តរជាតិ នាដើម​ខែ​មករា​ ឆ្នាំ​២០១៨​នេះ ដែល​មាន​រយៈពេល​បីខែ»។

លោក​ថា ជា​ការ​ពិត គោល​បំណង​នៃ​ការ​ពិព័រណ៌គ្រឿង​អលង្ការសម័យ​បុរាណនេះ គឺ​ផ្តោត​លើ​គ្រឿង​អលង្កាដែល​ទើប យក​ត្រឡប់​មកវិញពី​ទីក្រុង​ឡុង​ដ៍ ចក្រភព​អង់​គ្លេស ប៉ុន្តែ​ មន្ត្រី​ក៏​បាន​ធ្វើ​ការ​ប្រមែល​ប្រមូល​គ្រឿង​អលង្កា ផ្សេងទៀតដែល​រក​បាន​ពីកំណាយ​ផ្សេងៗ នៅ​តំបន់​អង្គរ និង​មុន​សម័យ​អង្គរ មក​ធ្វើការ​បង្ហាញ​ក្នុង​ពិព័រណ៌ផងដែរ​ ដើម្បី​ឲ្យ​មាន​ចំនួន​ច្រើន។

គួរ​បញ្ជាក់​ថា កាលពីថ្ងៃ​ទី​២ ខែ​ធ្នូ​ក្រសួង​វប្បធម៌​និង​វិចិត្រ​សិល្បៈ និង​សហភាព​សហព័ន្ធ​យុវជន​កម្ពុជា ដែល​មាន​ប្រធាន​លោក ហ៊ុន​ ម៉ានី កូន​ប្រុស​នាយករដ្ឋមន្ត្រី​ហ៊ុន សែន​ បាន​ធ្វើ​ការ​ដង្ហែគ្រឿង​អលង្ការ​មាស​សម្រាប់​លម្អ​រូបចម្លាក់​នា​សម័យ​អង្គរ ចំនួន​​ ១០​ ឈុត ដែល​យក​មក​វិញ​ពី​ក្រុមហ៊ុន​ដេញ​ថ្លៃ​លក់​អលង្ការ​នៅ​ក្រុង​ឡុងដ៍ ប្រទេស​អង់គ្លេស៕

អត្ថបទគួរចាប់អារម្មណ៍