.jpg)
គ្រោះថ្នាក់ចរាចរណ៍រវាងរថយន្តបែនដឹកដី បុកជាមួយរថយន្តក្រឡុកស៊ីម៉ងត៏តាមបណ្តោយផ្លូវជាតិលេខ ៣ ក្នុងឃុំត្រពាំងវែង ស្រុកកណ្ដាលស្ទឹង ខេត្តកណ្ដាល កាលពីម្សិលមិញ។ រូបថត ប៉ូលីស
ភ្នំពេញ៖ មនុស្សចំនួន ៥៣៦ នាក់ស្លាប់ ដោយសារគ្រោះថ្នាក់ចរាចរណ៍ និងរងរបួសចំនួន ១ ៣១៥ នាក់ ក្នុងនោះរបួសធ្ងន់ ៧៧៣ នាក់ ក្នុងគ្រោះថ្នាក់ចរាចរណ៍កើតឡើងចំនួន ៩៣៩ លើកនៅទូទាំងប្រទេសរយៈពេលជិតកន្លះឆ្នាំ ពោល គឺក្នុងរយៈពេល ១២៨ ថ្ងៃ គិតចាប់ពីថ្ងៃទី ១ ខែមករា ដល់ថ្ងៃទី ៨ ខែ ឧសភា ឆ្នាំ ២០២១។
បើតាមរបាយការណ៍របស់អគ្គស្នងការដ្ឋាននគរបាលជាតិដែលបានផ្សព្វផ្សាយកាលពីថ្ងៃទី ៨ ឧសភា បញ្ជាក់ថា៖ «សម្រាប់គ្រោះថ្នាក់ចរាចរណ៍នៅថ្ងៃទី ០៨ ខែ ឧសភា ឆ្នាំ ២០២១ បានកើតឡើងចំនួន ៦ លើក បណ្តាលឲ្យមនុស្សស្លាប់ចំនួន ៥ នាក់ និងរបួស ៣ នាក់ ក្នុងនោះធ្ងន់ចំនួន ២ នាក់ និងស្រាល ១ នាក់»។
ចំពោះការរឹតបន្តឹងការអនុវត្តច្បាប់ចរាចរណ៍វិញ នៅក្នុងរយៈពេល ១២៨ ថ្ងៃ គិតចាប់ពីថ្ងៃទី ១ ខែមករា ដល់ថ្ងៃទី ០៨ ខែ ឧសភា ឆ្នាំ ២០២១ យានយន្តដែលល្មើសច្បាប់ចរាចរណ៍មានចំនួនសរុប ៧៧ ២៨៨ គ្រឿង ក្នុងនោះម៉ូតូចំនួន ៥៦ ៦៧៩ គ្រឿង និងរថយន្តចំនួន ២០ ៦០៩ គ្រឿង។ រថយន្តធុនតូច ១៦ ០៥២ គ្រឿង និងធំចំនួន ៤ ៥៥៧ គ្រឿង។ នេះបើតាមរបាយការណ៍ដដែល។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ មិនអាចសុំអត្ថាធិប្បាយបន្ថែមបានទេនៅថ្ងៃនេះ ដោយលោកបញ្ជាក់ថា លោកកំពុងជាប់ធ្វើចត្តាឡីស័ក។
ចំណែកលោក ហេង ចាន់ធារី ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈបានប្រាប់ ភ្នំពេញ ប៉ុស្តិ៍ យ៉ាងខ្លីថា តួលេខនេះ គឺជាតួលេខសរុប ដែលបានស្រង់ដោយអគ្គស្នងការដ្ឋាននគរបាលជាតិ និងមន្ត្រីទូទាំងប្រទេស។
លោកបញ្ជាក់ថា៖ «តួលេខនេះ គឺត្រឹមត្រូវហើយ។ ចំនួននេះ គឺស្រង់ពីមន្ត្រីយើង»។
បើយោងតាមរបាយការណ៍ខាងលើ ក្នុងរយៈពេល ១២៨ ថ្ងៃនេះ យ៉ាងហោចណាស់គ្រោះថ្នាក់ចរចារណ៍បានកើតឡើងជាមធ្យមប្រមាណ ៧ ករណី ក្នុង ១ ថ្ងៃ ហើយក្នុង ១ ថ្ងៃ បណ្តាលឲ្យមនុស្សស្លាប់យ៉ាងហោចណាស់ ៥ នាក់ បើទោះជាកម្ពុជាកំពុងប្រឈមនឹងវិបត្តិកូវីដ ១៩ ដែលនាំឲ្យការធ្វើចរាចរណ៍តាមដងផ្លូវ ត្រូវបានរឹតត្បឹតក៏ដោយ។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិ បានប្រាប់ ភ្នំពេញ ប៉ុស្តិ៍ថា គ្រោះថ្នាក់ចរាចរណ៍គួរតែត្រូវបានយកចិត្តទុកដាក់ដូចនឹងបញ្ហាជំងឺកូវីដ ១៩ ដូចគ្នា ព្រោះគ្រប់គ្នា អាចភ្លេចគ្រោះថ្នាក់ចរាចរណ៍ តែគ្រោះថ្នាក់ចរាចណ៍មិនភ្លេចអ្នកនោះទេ។ បើមិនរួមគ្នាទប់ស្កាត់ចាប់ពីពេលនេះ គឺបញ្ហាគ្រោះថ្នាក់ចរាចរណ៍អាចនឹងធ្លាក់លើអ្នក ឬសាច់ញាតិអ្នក។
លោកបញ្ជាក់ថា៖ «ត្រូវរឹតបន្តឹងច្បាប់ផ្តោតលើកត្តាហានិភ័យសំខាន់ ៣ គឺ បើកបរហួសល្បឿនកំណត់។ បើកបរក្រោយហូបគ្រឿងស្រវឹង និងវ៉ាជែងនៅក្នុងស្ថានភាពគ្រោះថ្នាក់។ ពិសេសតាមតំបន់ងាយមានគ្រោះថ្នាក់លើផ្លូវជាតិ ផ្លូវខេត្ត និងផ្លូវវាងយានឆ្លងកាត់ច្រើន»។
បន្ថែមពីនេះ លោករំពឹងថា បញ្ហាសុវត្ថិភាពចរាចរណ៍នឹងត្រូវលើកយកមកអប់រំគ្រប់ទីកន្លែង ហើយដើរទន្ទឹមគ្នាឱ្យបានទូលំទូលាយលើកត្តាហានិភ័យទាំង ៣ ខាងលើ បូកជាមួយនឹងការលើកកម្ពស់ការពាក់មួកសុវត្ថិភាព សុវត្ថិភាពអ្នកជិះកង់ និងថ្មើរជើង ការគោរពភ្លើង និងផ្លាកសញ្ញាចរាចរណ៍ជាដើម៕
