ភ្នំពេញៈ របាយការណ៍គ្រោះថ្នាក់ចរាចរណ៍បណ្តោះអាសន្នរបស់អគ្គស្នងការនគរបាលជាតិបានឱ្យដឹងថា គិតចាប់ថ្ងៃទី ២៤ វិច្ឆិកា ឆ្នាំ ២០២០ ដល់ថ្ងៃទី ២៣ ខែ កុម្ភៈ ឆ្នាំ ២០២១ ដែលជាតួលេខប្រចាំត្រីមាសទី១ ដើមឆ្នាំ ២០២១ នេះ គ្រោះថ្នាក់ចរាចរណ៍បានកើតឡើងសរុប ៨០៨ លើក និងបានសម្លាប់មនុស្សជាង ៤០០ នាក់តែទាំងស្លាប់ និងរបួសតិចជាងត្រីមាសមុន។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានប្រាប់ភ្នំពេញប៉ុស្តិ៍ពីម្សិលមិញថា គ្រោះថ្នាក់ចរាចរណ៍ដែលបានបូកសរុបបណ្តោះអាសន្នដោយអគ្គស្នងការដ្ឋាននគរបាលជាតិក្នុងត្រីមាសទី១ នេះគឺបានថយចុះ ១៩៨ លើក បើប្រៀបធៀបនឹងត្រីមាសមុន។
លោកបន្តថា គ្រោះថ្នាក់ចរាចរណ៍នេះបានសម្លាប់មនុស្សសរុប ៤៣៤ នាក់ ថយចុះ ៨៥ នាក់ និងរបួសធ្ងន់ស្រាល ១ ១៥៦ នាក់ ដោយថយចុះ ២៧៤ នាក់។
ជាមួយនឹងការបង្ហាញតួលេខនេះលោក គឹមខឿន បានប្រកាសថា៖ «សមត្ថកិច្ចបន្តពង្រឹងអនុវត្តសកម្មភាពដែលបានដាក់ចេញ។ សំខាន់បំផុតគឺយើងពង្រឹងការអនុវត្តការខុសឆ្គង ៧ ចំណុចសម្រាប់ទោចក្រយានយន្ត និង ៩ ចំណុចសម្រាប់យានយន្ត។ យើងក៏បន្ថែមការណែនាំមួយដោយបញ្ជាក់ថា ពេលឃាត់យានយន្តមានកំហុសគឺត្រូវពិនិត្យលក្ខណៈបច្ចេកទេសឱ្យអស់តាមច្បាប់»។
ក៏ប៉ុន្តែលោក ឆាយ គឹមខឿន ទទួលស្គាល់ថា គ្រោះថ្នាក់ចរាចរណ៍គឺនៅតែមានចំនួនច្រើន ប៉ុន្តែក្នុងនាមអាជ្ញាធរមានសមត្ថកិច្ចបានពង្រឹង និងទប់ស្កាត់ ដែលជាហេតុនាំឱ្យគ្រោះថ្នាក់នេះមានការថយចុះ។
លោក គង់ សុវណ្ណ ទីប្រឹក្សាជំនាញ និងជាអនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវ ជនបទជំហានទី២ របស់ក្រសួងអភិវឌ្ឍន៍ជនបទបានលើកឡើងកាលពីម្សិលមិញថា ដើម្បីទប់ស្កាត់ឱ្យបាននូវបញ្ហាគ្រោះថ្នាក់ចរាចរណ៍ ការរឹតបន្តឹងច្បាប់ផ្តោតលើកត្តាហានិភ័យសំខាន់ ៣ គឺត្រូវតែអនុវត្តឱ្យបាននៅក្នុងផែនការអនុវត្តច្បាប់ក្នុងត្រីមាសទី២។
លោកបន្តថា ហានិភ័យទាំង ៣ នេះគឺរួមមាន ការបើកបរហួសល្បឿនកំណត់ ការបើកបរក្រោយហូបគ្រឿងស្រវឹង និងការបើកបរដោយការវ៉ាជែងនៅក្នុងស្ថានភាពគ្រោះថ្នាក់ ពិសេសតាមតំបន់ងាយមានគ្រោះថ្នាក់គឺលើផ្លូវជាតិ ផ្លូវខេត្ត និងផ្លូវវាងផ្លូវយានឆ្លងកាត់ច្រើន។
លោកថា៖ «អប់រំអំពីសុវត្ថិភាពចរាចរណ៍ត្រូវដើរទន្ទឹមគ្នាឱ្យបានទូលំទូលាយលើកត្តាហានិភ័យទាំង ៣ នេះបូកជាមួយនឹងការលើកកម្ពស់ការពាក់មួកសុវត្ថិភាព សុវត្ថិភាពអ្នកជិះកង់ និងថ្មើរជើង ការគោរពភ្លើង និងស្លាកសញ្ញាចរាចរណ៍»។ល។
លោកបន្ថែមថា៖ «ស្ថានភាពខ្លះគ្រោះថ្នាក់ចរាចរណ៍បានបង្កឡើងដោយសារផ្លូវដូចជា មានជង្ហុក បាំងកោងខ្លាំង ងងឹត មិនមានបរិក្ខារសុវត្ថិភាពផ្លូវគ្រប់គ្រាន់ពេលកំពុងសាងសង់ និងសាងសង់រួចក៏ដូចជាកង្វះខាតក្នុងការថែទាំក្រោយសាងសង់»។
ដោយសារឃើញការចូលរួមទប់ស្កាត់ និងការរាលដាលនៃការឆ្លងកូវីដ១៩នៅកម្ពុជាគឺជាបទពិសោធជោគជ័យគួរឱ្យកត់សម្គាល់ ពិសេសការចូលរួមវិភាគទានពីសប្បុរសជន និងឧកញ៉ាល្បីៗ លោក គង់ សុវណ្ណ ចង់ឃើញមានការចូលរួមព្រមគ្នាសម្រាប់មូលនិធិទប់ស្កាត់គ្រោះថ្នាក់ចរាចរណ៍ដោយលោកថាជាគ្រោះថ្នាក់សម្លាប់មនុស្សរាប់ពាន់នាក់ជារៀងរាល់ឆ្នាំ។
តាមរបាយការណ៍របស់អគ្គស្នងការនគរបាលជាតិបានឱ្យដឹងកាលពីម្សិលមិញថា គ្រោះថ្នាក់ចរាចរណ៍ផ្លូវគោកទូទាំងប្រទេសគ្រាន់តែនៅថ្ងៃទី ១៤ ខែ មីនា ឆ្នាំ ២០២១ បានធ្វើឱ្យមនុស្សស្លាប់ ៧ នាក់ និងរបួសធ្ងន់ ៤ នាក់ក្នុងហេតុការណ៍ប៉ះទង្គិចគ្នាចំនួន ៧ លើក៕