.jpg)
មន្ត្រីជំនាញពិនិត្យស្រូវស្រែជួបគ្រោះរាំងស្ងួតនៅបន្ទាយមានជ័យ។ រូប សហការី
ភ្នំពេញៈ គ្រោះរាំងស្ងួតបានធ្វើឲ្យប៉ះពាល់ដំណាំស្រូវជាង ៤ ម៉ឺនហិកតា ក្នុងខេត្តបាត់ដំបង បន្ទាយមានជ័យ និងបណ្ដាខេត្តមួយចំនួនទៀតខណៈប្រភពទឹកមួយចំនួននៅតែបន្តគោករីងធ្វើឲ្យមានការលំបាកដល់អាជ្ញាធរមូលដ្ឋាន និងមន្ត្រីជំនាញពាក់ព័ន្ធក្នុងកិច្ចអន្តរាគមន៍បូមទឹកជួយសង្គ្រោះស្រូវទាំងនោះជូនដល់ប្រជាកសិករ។
លោក កែវ វី ទីប្រឹក្សាជាន់ខ្ពស់គណៈកម្មាធិការជាតិគ្រប់គ្រងគ្រោះមហន្តរាយ ប្រាប់ភ្នំពេញប៉ុស្តិ៍កាលពីម្សិលមិញថា ដំណាំស្រូវដែលរងផលប៉ះពាល់ ដោយសារគ្រោះរាំងស្ងួតទាំងនេះ ភាគច្រើនជាស្រូវបង្កើនរដូវដែលកសិករបានធ្វើការដាំដុះកាលពីអំឡុងចុងខែឧសភា និងខែមិថុនា ឆ្នាំ ២០២០។
ប្រជាកសិកររំពឹងថា ស្រូវទាំងនោះនឹងអាចប្រមូលផលក្នុងខែសីហា ឬខែកញ្ញាខាងមុខ ប៉ុន្តែដោយសារការប្រែប្រួលអាកាសធាតុ របាយទឹកភ្លៀងបានធ្លាក់ដោយកន្លែង និងមិនទៀងទាត់ធ្វើឲ្យតំបន់មួយចំនួនជួបប្រឈមនឹងគ្រោះរាំងស្ងួត ពិសេសនៅខេត្តបាត់ដំបង និង ខេត្តបន្ទាយមានជ័យ។
លោក វី បញ្ជាក់ថា៖ «នៅពេលនេះដំណាំស្រូវជាង ៤ ម៉ឺនហិកតា នៅទូទាំងប្រទេសកំពុងប្រឈមផលប៉ះពាល់ធ្ងន់ធ្ងរ ដោយសារកង្វះទឹកស្រោចស្រពខណៈដំណាំស្រូវប្រមាណជាង ៥ ០០០ ហិកតាទៀត បានរងការខូចខាតទាំងស្រុង»។ បើតាមលោក វី ខេត្តដែលមានដំណាំស្រូវរងផលប៉ះពាលច្រើនជាងគេ គឺខេត្តបាត់ដំបង បន្ទាយមានជ័យ និងខេត្តកំពង់ធំ។
យ៉ាងណាក៏ដោយក្នុងអំឡុងពេលនេះ ប្រទេសកម្ពុជាកំពុងទទួលរងឥទ្ធិពលព្យុះ SINLAKU ដែលធ្វើឲ្យមានភ្លៀងធ្លាក់ច្រើនក្នុងតំបន់មួយចំនួន ជាប់ជួរភ្នំដងរែក និងខ្ពង់រាបឦសាន។ ប៉ុន្តែប្រជាកសិករ និង មន្ត្រីពាក់ព័ន្ធមួយចំនួនក្នុងខេត្តបាត់ដំបង និងបន្ទាយមានជ័យអះអាងថា ដង់ស៊ីតេទឹកភ្លៀងមានកម្រិតទាប និងធ្វើឲ្យមានក្ដីព្រួយកង្វល់ ជុំវិញបញ្ហាកង្វះទឹកស្រោចស្រពដដែល។
លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង ថ្លែងពីម្សិលមិញថា គ្រោះរាំងស្ងួតនាប៉ុន្មានសប្ដាហ៍ចុងក្រោយនេះ បានធ្វើឲ្យដំណាំស្រូវចំនួន ១៧ ៩៨១ ហិកតា របស់ប្រជាកសិករនៅស្រុកបវេល ស្រុកថ្មគោល និងស្រុកបាណន់ ជួបប្រឈមផលប៉ះពាល់ធ្ងន់ធ្ងរ ខណៈដំណាំស្រូវប្រមាណជាង ១ ០០០ ហិកតាទៀត បានរងការខូចខាតទាំងស្រុង។ ប៉ុន្តែប្រជាកសិករបាននាំគ្នាដាំដុះស្រូវស្ដារឡើងវិញលើផ្ទៃដីដែលបានរងការខូចខាតដោយគ្រោះរាំងស្ងួតទាំងនោះ។
លោកថ្លែងថា៖ «កាលពីថ្ងៃពុធ ភ្លៀងបានធ្លាក់នៅផ្នែកខ្លះនៃស្រុកថ្មគោល និងស្រុកបវេល ប៉ុន្តែរបាយដង់ស៊ីតេទឹកភ្លៀងនៅមានកម្រិតទាបនៅឡើយហើយវានៅតែជាក្ដីព្រួយកង្វល់សម្រាប់យើងក្នុងកិច្ចអន្តរាគមន៍ជួយបូមទឹកសង្គ្រោះស្រូវដែលកំពុងជួបប្រឈមខ្វះទឹកស្រោចស្រពទាំងនោះ»។
ជាមួយគ្នានេះលោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យក៏ឲ្យដឹងដែរថាកាលពី ២ សប្ដាហ៍មុន ដោយសារតែគ្រោះរាំងស្ងួតបានអូសបន្លាយរយៈពេលវែងពេកធ្វើឲ្យដំណាំស្រូវរបស់ប្រជាកសិករនៅស្រុកមង្គលបុរី និងក្រុងសិរីសោភ័ណចំនួន ៣ ០៣០ ហិកតា បានរងការខូចខាតអស់ទាំងស្រុងហើយនៅពេលនេះដំណាំស្រូវចំនួន ៦ ៦០០ ហិកតាទៀត ក្នុងស្រុកមង្គលបុរីកំពុងរងផលប៉ះពាល់ធ្ងន់ធ្ងរនឹងឈានទៅខូចខាតទាំងស្រុងបើគ្មានភ្លៀងធ្លាក់គ្រប់គ្រាន់ដើម្បីជួយសង្គ្រោះទេនោះ។
លោកថា៖ «នៅពេលនេះយើងសង្ឃឹមលើទឹកភ្លៀងធ្លាក់ពីលើមេឃដើម្បីជួយសង្គ្រោះស្រូវទាំងនោះ ព្រោះប្រភពទឹកទាំងអស់នៅក្នុងស្រុកនេះត្រូវបានគោករីង ស្ទើរប្រេះក្រហែងអស់ទៅហើយ»។
ចំណែកលោក ប៉ែន វណ្ណរិទ្ធ ប្រធានមន្ទីរកសិកម្ម ខេត្តកំពង់ធំក៏ប្រាប់ភ្នំពេញ ប៉ុស្តិ៍នៅព្រឹកថ្ងៃព្រហស្បតិ៍ថា គិតត្រឹមថ្ងៃទី ៥ ខែសីហា ការបង្កបង្កើនផលស្រូវរដូវវស្សារបស់ប្រជាកសិករខេត្តកំពង់ធំបានចំនួន ២០៧ ០៣៨ ហិកតា ស្មើនឹង ៩៧,០៦ ភាគរយនៃផែនការផ្ទៃដីដាំដុះ ២១៣ ៣០០ ហិកតា។ តួលេខនេះមានការថយចុះ បើប្រៀបធៀបក្នុងរយៈពេលដូចគ្នាកាលពីឆ្នាំមុនគឺមានការថយចុះចំនួន ៨ ២៦០ ហិកតា។
លោកបន្តថា៖ «គ្រោះរាំងស្ងួតនាពេលកន្លងមកនេះបានធ្វើឲ្យប៉ះពាល់ដំណាំស្រូវបង្កើនរដូវចំនួន ១៦ ៣៥៤ ហិកតា ក្នុងនោះ ៤៥៤ ហិកតា បានរងការខូចខាតទាំងស្រុង»។
ភាពរាំងស្ងួតត្រូវបានគេព្យាករថានឹងកើនឡើងកាន់តែខ្លាំងនៅសប្តាហ៍នេះ ក្នុងតំបន់មួយចំនួននៅជុំវិញដងទន្លេសេកុង ទន្លេសេសាន និងទន្លេស្រែពកក្នុងភាគឦសាននៃប្រទេសកម្ពុជា។ នេះតាមរបាយការណ៍គណៈកម្មការទន្លេមេគង្គ (MRC) ដែលត្រូវបានផ្សព្វផ្សាយបន្តដោយទីភ្នាក់ងារព័ត៌មានកម្ពុជា AKP កាលពីថ្ងៃព្រហស្បតិ៍។
របាយការណ៍បន្តថា យោងតាមលទ្ធផលនៃការព្យាករបង្ហាញថា ភាពរាំងស្ងួតខ្លាំងនឹងរីករាលដាលដល់តំបន់ធំៗមួយចំនួននៃខេត្តរតនគិរី មណ្ឌលគិរីស្ទឹងត្រែង និងខេត្តក្រចេះ៕
