.jpg)
អគ្គិភ័យឆេះតូបលក់ដូនៅខណ្ឌសែនសុខចុងសប្តាហ៍មុន។ រូបថត ក្រុមពន្លត់អគ្គិភ័យ
ភ្នំពេញៈ នៅត្រីមាសទី ១ ដើមឆ្នាំនេះ គ្រោះអគ្គិភ័យបានកើតឡើងចំនួន ២៦១ លើក បណ្តាលឲ្យមនុស្សស្លាប់ ៤ នាក់ និង ១៣ នាក់ទៀតរងរបួស។ តួលេខនេះមានការកើនឡើងទ្វេដង បើធៀបទៅនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យដែលបានផ្ដល់ឲ្យដោយនាយកដ្ឋានបង្ការ ទប់ស្កាត់ និងពន្លត់អគ្គិភ័យនៃអគ្គស្នងការដ្ឋាននគរបាលជាតិកាលពីថ្ងៃចន្ទ។
លោក នេត វន្ថា ប្រធាននាយកដ្ឋានបង្ការទប់ស្កាត់ និងពន្លត់អគ្គិភ័យនៃអគ្គស្នងការដ្ឋាននគរបាលជាតិប្រាប់ភ្នំពេញប៉ុស្តិ៍ពីម្សិលមិញថា គ្រោះអគ្គិភ័យក្នុងត្រីមាសទី ១ ដើមឆ្នាំ ២០២០ នេះបានកើតឡើងចំនួន ២៦១ លើកមានការកើនឡើងចំនួន ៨២ លើក បើធៀបទៅនឹងត្រីមាសទី ១ ឆ្នាំ ២០១៩ ដែលបានកើតឡើងចំនួន ១៧៩ លើក។
លោកបញ្ជាក់ថា៖ «បើនិយាយអំពីជនរងគ្រោះដោយគ្រោះអគ្គិភ័យនៅក្នុងត្រីមាសទី ១ ដើមឆ្នាំ ២០២០ នេះគឺមានមនុស្ស ៤ នាក់ស្លាប់ និង ១៣ នាក់ទៀតរងរបួស ខណៈកាលពីត្រីមាសទី ១ ដើមឆ្នាំ ២០១៩ គឺមានមនុស្សតែ ២ នាក់ប៉ុណ្ណោះបានស្លាប់»។
លោក វន្ថា បន្តថា រីឯទំហំខូចខាតផ្ទះ និងតូបលក់ដូររបស់ពលរដ្ឋវិញ គឺមានការថយចុះច្រើនជាងទ្វេដង បើធៀបទៅនឹងត្រីមាសទី ១ ឆ្នាំ ២០១៩ ដែលបានឆេះបំផ្លាញផ្ទះពលរដ្ឋអស់ជាង ៥០០ ខ្នង និងតូបលក់ដូរជាង ៣០០ តូប។ ប៉ុន្តែនៅត្រីមាសទី ១ ឆ្នាំ ២០២០ នេះមានការឆេះខូចខាតផ្ទះពលរដ្ឋត្រឹមតែ ១៨៩ ខ្នង និងតូបលក់ដូរអស់ ៦០ តូបប៉ុណ្ណោះ។
ការថយចុះនៃទំហំខូចខាតដោយគ្រោះអគ្គិភ័យនាត្រីមាសទី ១ ដើមឆ្នាំនេះ បានបង្ហាញពីកិច្ចសហប្រតិបត្តិការល្អរវាងកម្លាំងសមត្ថកិច្ច និងប្រជាពលរដ្ឋក្នុងមូលដ្ឋានព្រមទាំងក្រុមកងអន្តរាគមន៍ពន្លត់អគ្គិភ័យក្នុងការចុះអន្តរាគមន៍បាញ់ទឹកពន្លត់ភ្លើងមិនឲ្យឆេះរាលដាលប៉ះពាល់ដល់ផ្ទះអ្នកដទៃ។
លោក វន្ថាឲ្យដឹងទៀតថា ខេត្តដែលមានគ្រោះអគ្គិភ័យកើតឡើងច្រើនជាងគេសម្រាប់ត្រីមាសទី ១ ដើមឆ្នាំ ២០២០ នេះគឺខេត្តប៉ៃលិនមាន ៣៤ លើកបន្ទាប់មកខេត្តសៀមរាបមាន ៣០ លើករាជធានីភ្នំពេញមាន ២១ លើក។ ដោយឡែកខេត្តឧត្តរមានជ័យ រតនគិរី និងខេត្តកោះកុងមានគ្រោះអគ្គិភ័យកើតឡើងតែ ១ លើកដូចគ្នាតែប៉ុណ្ណោះ ខណៈខេត្តកំពង់ឆ្នាំងបានក្លាយជា «ខេត្តគំរូ» ដែលគ្មានគ្រោះអគ្គិភ័យកើតឡើងសម្រាប់ត្រីមាសទី ១ ដើមឆ្នាំនេះ។
បើតាមលោក នេត វន្ថា មូលហេតុដែលបង្កឲ្យមានគ្រោះអគ្គិភ័យកើតឡើងគឺបណ្ដាលមកពីការផ្ទុះឆ្លងចរន្តអគ្គិសនី ៤១% បណ្ដាលមកពីការប្រើប្រាស់ភ្លើង ៣៩% និង ២០% ទៀតគឺនៅមិនទាន់ដឹងពីមូលហេតុ។ ស្ថានីយ ប្រេងឥន្ធនៈ និងឧស្ម័ននៅទូទាំងប្រទេសចំនួន ៨៥៩២ ទីតាំងគឺជាគោលដៅដែលងាយរងគ្រោះដោយគ្រោះអគ្គិភ័យជាងគេបំផុតក្នុងនោះនៅរាជធានីភ្នំពេញមានចំនួន ៥៩៥ ទីតាំង។
លោក ព្រំ យ៉ន ប្រធានការិយាល័យបង្ការ និងពន្លត់អគ្គិភ័យ រាជធានីភ្នំពេញប្រាប់ភ្នំពេញប៉ុស្តិ៍ពីម្សិលមិញថា នៅក្នុងថ្ងៃទី ១៦ ខែមីនា ឆ្នាំ ២០២០ នេះមានករណីភ្លើងឆេះកើតឡើងចំនួន ២ លើក។ ក្នុងនោះលើកទី ១ បានកើតឡើងនៅវេលាម៉ោង ២:១០ នាទីព្រឹកនៅចំណុចទីតាំងឃ្លាំងស្តុកឈើ និងដំឡើងគ្រឿងសង្ហារិមរបស់ដេប៉ូលក់គ្រឿងសង្ហារិម ១ កន្លែងនៅតាមបណ្តោយផ្លូវ ៥៨P ក្នុងសង្កាត់គោកឃ្លាង ខណ្ឌសែនសុខដោយបានឆេះខូចខាតឈើ និងគ្រឿងសង្ហារិមអស់មួយចំនួនធំ។ ឆេះលើកទី ២ បានកើតឡើងនៅវេលាម៉ោង ៣:៣៥ នាទីរសៀលនៅចំណុចឃ្លាំងស្តុកតាំងបង្ហាញរថយន្តរបស់ក្រុមហ៊ុន Mitsubishi Cambodia ដែលមានទីតាំងនៅបណ្ដោយផ្លូវសហព័ន្ធរុស្ស៊ីក្នុងសង្កាត់ទឹកថ្លា ខណ្ឌសែនសុខ។
លោកបញ្ជាក់ថា៖ «មកទល់ពេលនេះករណីភ្លើងឆេះទាំង ២ កន្លែងខាងលើនេះមន្ត្រីជំនាញយើងនៅមិនទាន់ដឹងច្បាស់ពីមូលហេតុនៅឡើយទេ ហើយទំហំនៃការខូចខាតក៏នៅមិនទាន់មានការវាយតម្លៃផងដែរ»។
លោកបន្តថា ទោះយ៉ាងណាក្រុមសមត្ថកិច្ចមូលដ្ឋាន និងកម្លាំង កងពន្លត់អគ្គិភ័យបានរួមសហការគ្នាយ៉ាងល្អប្រសើរក្នុងការអន្តរាគមន៍បាញ់ពន្លត់អគ្គិភ័យទាំងនេះ មិនឲ្យមានការឆេះឆ្លងរាលដាលដល់ផ្ទះ និងសហគ្រាសអ្នកដទៃ ហើយក៏គ្មាននរណាម្នាក់រងរបួស ឬស្លាប់ក្នុងហេតុការណ៍ទាំង ២ ករណីនេះដែរ៕
