.jpg)
បុរសម្នាក់មកពិនិត្យមើលផ្ទះរបស់ខ្លួននៅសង្កាត់បឹងកេងកង ៣ ក្រោយត្រូវបានភ្លើងឆេះកាលពីថ្ងៃទី ២២ សីហា។ ហេង ជីវ័ន
ភ្នំពេញ: យ៉ាងហោចណាស់មនុស្ស ៨ នាក់ បានរបួសស្រាលក្នុងគ្រោះអគ្គិភ័យកើតឡើង ៥ លើក ទូទាំងប្រទេសក្នុងរយៈពេល ៥ ថ្ងៃ នៃថ្ងៃឈប់សម្រាក។ ក៏ប៉ុន្តែករណីនេះមាននៅតែខេត្តចំនួន ៥ ប៉ុណ្ណោះ ខណៈមន្ត្រីថា មូលហេតុគឺមកពីឆ្លងចរន្ដអគ្គិសនីផ្ទុះកំប៉ុងហ្គាស និងការដុតផ្ទះខ្លួនឯង ១ ករណី។
លោក នេត វណ្ណថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិបានថ្លែងពីម្សិលមិញថា គិតចាប់ពីថ្ងៃទី ១៧ ដល់ថ្ងៃទី ២១ ខែសីហា ចំថ្ងៃឈប់សម្រាកមានអគ្គិភ័យកើតឡើង ៥ លើក នៅទូទាំងប្រទេសបង្កឲ្យមនុស្ស ៨ នាក់រងរបួសស្រាល។
លោកបន្តថា គ្រោះអគ្គិភ័យនេះបានកើតនៅខេត្តស្ទឹងត្រែង កែប សៀមរាប ព្រះសីហនុ និងខេត្តកណ្ដាល។ មូលហេតុគឺមកពីឆ្លងចរន្ដអគ្គិសនី ផ្ទុះកំប៉ុងហ្គាស និងដុតផ្ទះខ្លួនឯង ១ ករណី។ គ្រោះថ្នាក់នេះបានបំផ្លាញផ្ទះ ៣ ខ្នង រោងសិប្បកម្ម ១ ខ្នង និងក្យូស ព្រមទាំងរបួសស្រាលមនុស្សចំនួន ៨ នាក់។
លោកថា៖ «មនុស្សរបួសស្រាលៗ ៨ នាក់ មិនមានអ្នកធ្ងន់ទេ។ អ្នកស្លាប់ក៏គ្មានដែរ នៅពេលមានអគ្គិភ័យកើតឡើងគឺកម្លាំងយើងចុះអន្តរាគមន៍ភ្លាមៗតែម្ដងដោយមិនអាចទុកយូរបានទេ»។
តាមរបាយការណ៍របស់នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិនៅថ្ងៃទី ១៩ ខែសីហា ឲ្យដឹងថា មានអគ្គិភ័យឆេះផ្ទះពលរដ្ឋ ១ ខ្នងនៅថ្ងៃទី ១៨ ខែសីហា ក្នុងភូមិទ្រាំង សង្កាត់ស្លក្រាម ក្រុងខេត្តសៀមរាប។
របាយការណ៍បន្តថា ម្ចាស់ផ្ទះនោះឈ្មោះ ឃុន ម៉ៅ ភេទស្រី អាយុ ៦៣ ឆ្នាំមុខរបរនៅផ្ទះបានខាតបង់ផ្ទះឈើ ១ ខ្នងទំហំ ៥x៧ ម៉ែត្រ ជញ្ជាំងក្តារប្រក់ស័ង្កសី ប៉ុន្ដែមិនមានរងរបួសទេ។ មន្ត្រីបានជួយអន្តរាគមន៍ពន្លត់ដោយប្រើប្រាស់រថយន្ត ៧ គ្រឿង និងប្រើប្រាស់ទឹកអស់ចំនួន ៥ ឡាន។ រីឯមូលហេតុមកពីឆ្លងចរន្ដអគ្គិសនី។
ដោយឡែកករណីអគ្គិភ័យមួយទៀតឆេះផ្ទះទំហំ ៦x៩ ម៉ែត្រ សង់ពីឈើប្រក់ស័ង្កសី ជញ្ជាំងបាំងក្តារនៅភូមិ ១ ឃុំទំនប់រលក ស្រុកស្ទឹងហាវ ខេត្តព្រះសីហនុ បង្កឡើងដោយបុរសម្នាក់ឈ្មោះ អ៊ិន រ័ត្នធា អាយុ ៣៥ ឆ្នាំ (សតិមិនគ្រប់) ត្រូវជាកូនបង្កើតស្ត្រីម្ចាស់ផ្ទះជាអ្នកដុតក្នុងពេលមានទំនាស់ពាក្យសម្ដីជាមួយម្ដាយ។
លោក រស់ កី អធិការនគរបាលស្រុកស្ទឹងហាវបានថ្លែងពីម្សិលមិញថា ស្ត្រីម្ចាស់ផ្ទះឈ្មោះ ងូវ មុំ អាយុ ៦៨ ឆ្នាំ ដោយផ្ទះគាត់ត្រូវបានឆេះស្ទើរទាំងស្រុងដោយសារកូនបង្កើតគាត់ឈ្មោះ អ៊ិន រ័ត្នធា ជាអ្នកដុតបំផ្លាញ។
លោកបន្តថា មុនពេលកើតហេតុជនសង្ស័យបានទាស់សម្ដីជាមួយម្ដាយ ប៉ុន្តែជនសង្ស័យរូបនេះធ្លាប់បានព្យាយាមដុតផ្ទះខ្លួនឯងជាច្រើនលើករួចមកហើយ តែអ្នកជិតខាងជួយឃាត់ទាន់។ ក្នុងហេតុការណ៍នេះ សមត្ថកិច្ចបានប្រើប្រាស់រថយន្តពន្លត់អគ្គិភ័យ ១ គ្រឿង ប្រើទឹកអស់ចំនួន ២ រថយន្តពន្លត់បានរលត់ទាំងស្រុង តែមានការខូចខាតទ្រព្យសម្បត្តិ និងផ្ទះ ១ ខ្នង។
លោកបញ្ជាក់ថា៖ «ជនសង្ស័យតែងព្យាយាមដុតផ្ទះខ្លួនឯងជាច្រើនលើកមកហើយ ប៉ុន្ដែគេឃាត់ទាន់ ឥឡូវគាត់ដុតផ្ទះលើកចុងក្រោយបានសម្រេច។
ជនបង្កត្រូវបានឃាត់ខ្លួនយកមកអធិការដ្ឋាននគរបាលស្រុកស្ទឹងហាវ ដោយមន្ត្រីជំនាញយើងកំពុងសួរនាំ និងចាត់វិធានការតាមច្បាប់»៕
