ភ្នំពេញៈ អគ្គស្នងការដ្ឋាននគរបាលជាតិបានឲ្យដឹងថារយៈពេល ១៥ ថ្ងៃនៃថ្ងៃកាន់បិណ្ឌ និងបុណ្យភ្ជុំបិណ្ឌមានគ្រោះអគ្គិភ័យកើតឡើង ៣០ លើកនៅទូទាំងប្រទេសធ្វើឲ្យមនុស្ស ២ នាក់ស្លាប់ និង ៨ នាក់រងរបួស ដែលគ្រោះអគ្គិភ័យនេះបានកើនឡើងបើប្រៀបធៀបរយៈពេលដូចគ្នាជាមួយឆ្នាំមុន។
តាមរបាយការណ៍របស់នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិដែលបានផ្សព្វផ្សាយកាលពីថ្ងៃសៅរ៍ឲ្យដឹងថា អគ្គិភ័យទាំង ៣០ លើកនេះ បានបំផ្លាញផ្ទះ ២៩ ខ្នង បន្ទប់ចំនួន ១ បឹងហ្គាឡូ ២ ខ្នង តូបលក់គ្រឿងទេស ២ និងរោងសិប្បកម្មបាយក្ដាំង ១ ខ្នង។
បើតាមរបាយការណ៍ដដែលមូលហេតុគឺដោយសារឆ្លងចរន្ដអគ្គិសនី ១៥ លើក ភ្លើងទៀនធូប ១ លើក ផ្ទុះហ្គាស ៣ លើក ក្មេងលេងភ្លើង ២ លើក ដុតផ្ទះខ្លួនឯង ៤ លើក ឆាបសាំង ១ លើក បាក់បំពង់បឺតផ្សែង ១ លើក និងរថយន្ដបុកម៉ូតូ ១ លើក ចំណែក ២ ករណីទៀត ក្ដាប់មិនបាន។
របាយការណ៍នេះបានបញ្ជាក់ថា៖ «បើធៀបទៅនឹងរយៈពេល ១៥ ថ្ងៃ នៃបុណ្យភ្ជុំបិណ្ឌឆ្នាំ ២០១៨ និងបុណ្យភ្ជុំបិណ្ឌឆ្នាំ ២០១៩ គ្រោះអគ្គិភ័យមានការកើនឡើង ១២ លើក។ ក្នុងនោះ ៣ ថ្ងៃ នៃបុណ្យភ្ជុំបិណ្ឌមានចំនួន ៧ លើក បើធៀបរយៈពេល ៣ ថ្ងៃ ដូចគ្នាឆ្នាំ ២០១៨ មានការកើនឡើង ៤ លើក»។
លោក នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យនៃក្រសួងមហាផ្ទៃបានប្រាប់ភ្នំពេញប៉ុស្តិ៍ពីម្សិលមិញថា កាលពីឆ្នាំមុនគ្រោះថ្នាក់អគ្គិភ័យនេះមិនបណ្តាលឲ្យមានមនុស្សស្លាប់ទេ ប៉ុន្តែនៅឆ្នាំនេះមានអ្នកស្លាប់ដល់ទៅ ២ នាក់ និងរបួស ៨ នាក់។
លោកថា៖ «ពិតប្រាកដហើយពី ១ ឆ្នាំទៅ ១ ឆ្នាំ អគ្គិភ័យចេះតែកើនឡើងជាលំដាប់។ ជាទូទៅយើងឃើញហើយថា ការធ្វេសប្រហែសរបស់បងប្អូនពលរដ្ឋយើង និងការងារការពារនេះក៏មិនទាន់បានល្អប្រសើរ ហាក់បីដូចជានៅមិនទាន់បានចាប់អារម្មណ៍។ ដូចក្នុងបុណ្យភ្ជុំបិណ្ឌនេះ យើងឃើញហើយ ៣០ ករណី គឺការឆ្លងចរន្តអគ្គិសនីមានច្រើន»។
លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជាបានប្រាប់ភ្នំពេញប៉ុស្តិ៍ថា ជារួមពលរដ្ឋខ្មែរនៅតែធ្វេសប្រហែសចំពោះបញ្ហាអគ្គិភ័យដែលបណ្តាលឲ្យកើតឡើងរាល់ឆ្នាំពេលមានពិធីបុណ្យធំៗម្តងៗ។
បើតាមលោក សន ជ័យ បញ្ហានេះដោយសារចំណេះដឹងរបស់ពលរដ្ឋនៅមានកម្រិត ទាំងការការពារ និងការបង្ការពេលមានបញ្ហា ស្របពេលការអន្តរាគមន៍ពីអាជ្ញាធរក៏នៅមានកម្រិតដូចគ្នា នៅពេលកើតហេតុភ្លាមៗទាំងបច្ចេកទេសនិងឧបករណ៍ជាពិសេសខ្វះខាតធនធានមនុស្សក្នុងការពន្លត់។
លោកបញ្ជាក់ថា៖ «ដោយសារមានភាពងាយស្រួលក្នុងការរស់នៅ មិនមានគ្រោះធម្មជាតិដូចជាគ្រោះរញ្ជួយដីអីដែលធ្វើឲ្យពលរដ្ឋហ្នឹងមានការធ្វេសប្រហែស។ មានរូបភាពច្រើន នៅពេលដែលការប្រើប្រាស់សេវាទៅតាមតម្រូវការដូចជាអគ្គិសនី ឬក៏ការរៀបចំពិធីអីផ្សេងៗហ្នឹងដែលធ្វើឲ្យមនុស្សខ្វះការគិតគូរពិចារណាឲ្យគ្រប់ជ្រុងជ្រោយ ដោយការចាកចេញពីផ្ទះមិនបានមើលដោយបន្សល់ទុកធូបទៀនឆេះមិនទាន់អស់ ដែលជាដើមចមនាំឲ្យមានគ្រោះអគ្គិភ័យ»។
ទន្ទឹមនឹងនេះលោក សន ជ័យ បានប្រាប់ពីវិធីសាស្ត្រងាយៗក្នុងការចូលរួមអប់រំផ្សព្វផ្សាយដល់ពលរដ្ឋឲ្យយល់ដឹង និងចូលរួមទាំងអស់គ្នាតាមរយៈការផលិតជាវីដេអូអប់រំខ្លីៗបែបកំប្លែងសម្រាប់ផ្សព្វផ្សាយតាមទូរទស្សន៍តាមប្រព័ន្ធទំនាក់ទំនងសង្គម។ ម្យ៉ាងទៀតការមានសមាជិកម្នាក់ ឬ ២ នាក់ក្នុងគ្រួសារចូលរួមទប់ស្កាត់បង្កើនភាពប្រុងប្រយ័ត្ននៅតាមផ្ទះរៀងៗខ្លួនគឺជាកត្តាសំខាន់ និងចាំបាច់ក្នុងការកាត់បន្ថយគ្រោះអគ្គិភ័យទូទាំងប្រទេស។
លោកថា៖ «វិធានការបង្ការ ក្រៅតែពីពលរដ្ឋខ្លួនឯង ហើយនិងវិធានការសាធារណៈមួយចំនួនដូចជា ក្រុមពន្លត់អគ្គិភ័យ ក្រុមជួយសង្គ្រោះអីហ្នឹង។ សំខាន់តើមនុស្សត្រូវគ្រប់គ្រងហើយនិងបង្កបញ្ហាអគ្គិភ័យដោយខ្លួនឯងយ៉ាងម៉េចនោះ?»។
តាមរបាយការណ៍របស់នាយកដ្ឋានបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិបានឲ្យដឹងថា រយៈពេលប្រមាណ ១០ ខែគិតចាប់ពីខែវិច្ឆិកាឆ្នាំមុនដល់ខែកញ្ញាឆ្នាំនេះគឺមានគ្រោះអគ្គិភ័យចំនួន ៥៩៦ ករណីនៅទូទាំងប្រទេសដោយបង្កឱ្យមនុស្ស ១៣ នាក់ស្លាប់ និង ១០៤ នាក់ទៀតរងរបួស ក្នុងនោះបានបំផ្លាញផ្ទះ ៥៧១ ខ្នង និងតូបលក់ដូររបស់អាជីវករចំនួន ៣១៨ ត្រូវបានឆេះខូចខាតទាំងស្រុង៕