ភ្នំពេញៈ យ៉ាងហោចណាស់ផ្ទះប្រជាពលរដ្ឋចំនួនបីខ្នងត្រូវបានភ្លើងឆាបឆេះនៅសង្កាត់បឹងសាឡាង ខណ្ឌទួលគោកកាលពីម្សិលមិញតែមិនបណ្តាលឱ្យមានមនុស្សរងរបួស ឬស្លាប់ឡើយខណៈសមត្ថកិច្ចនៅមិនទាន់រកឃើញពីមូលហេតុនៃអគ្គិភ័យនេះនៅឡើយ។
ស្នងការរងរាជធានីភ្នំពេញទទួលបន្ទុកផែនគ្រប់គ្រងអាវុធ ជាតិផ្ទុះ និងអគ្គិភ័យលោក ឈាង ផាន់ណារ៉ា ថ្លែងនៅកន្លែងកើតហេតុថាអគ្គិភ័យឆាបឆេះផ្ទះអស់ចំនួន ៣ ល្វែងមាន ១៥ បន្ទប់ដែលផ្ទះនេះសង់ពីឈើលើថ្មក្រោម។
តែលោកថាមិនទាន់ដឹងពីមូលហេតុនៃការឆេះនេះទេ។
លោកថា៖ «ករណីនេះយើងមិនទាន់ដឹងថាមូលហេតុអ្វីនោះទេយើងកំពុងស្រាវជ្រាវបន្ថែមទៀត»។
តាមរបាយការណ៍បឋមផ្ទះដែលរងការឆេះនោះជាកន្លែងដែលមានស្តុកទំនិញដូចជាក្រណាត់សម្ភារផ្សេងៗ និងជាកន្លែងកម្មករជួលស្នាក់នៅជាពិសេសមានស្ថានីយប្រេងស្ថិតនៅក្បែរនោះទៀតផង។ ហេតុការណ៍នេះបានកើតឡើងនៅវេលាម៉ោងជិត ៩ ព្រឹក និងត្រូវបានពន្លត់ឲ្យរលត់ទាំងស្រុងនៅម៉ោង ៩ និង ៤០ នាទីបន្ទាប់ពីសមត្ថកិច្ចបានប្រើរថយន្តពន្លត់អគ្គិភ័យចំនួន ២០ គ្រឿង និងបាញ់ទឹកបាន ២២ លើក។
បើតាមលោក ប៉ុល កំអូន អាយុ ៤០ ឆ្នាំជាម្ចាស់ផ្ទះដែលរងការឆេះនេះបានអះអាងថាអគ្គិភ័យនេះអាចបណ្តាលមកពីទុស្សេខ្សែភ្លើង។ លោកថា៖ «មុនដំបូងឆេះតិចៗបន្ទាប់មកឆេះខ្លាំងតែម្តងហើយខ្ញុំគិតថាទុស្សេខ្សែភ្លើងចេញពីកញ្ចក់ផ្ទះក្រោយយើងប្រមូលរបស់របរអត់ទាន់ផងយកបានតែឡានមួយគ្រឿង» ។
ចំណែកអ្នកស្រី ណុប សុខុម ជាអ្នកជួលផ្ទះគេស្នាក់នៅថ្លែងថា៖ «ខ្ញុំកំពុងធ្វើម្ហូបដល់ពេលឮគេស្រែកគ្រប់គ្នាស្មានតែមានគេប្រឡែងគ្នាតែដល់ពេលចេញមកក្រៅឃើញអណ្តាតភ្លើងឆេះសន្ធោសន្ធៅហើយខ្ញុំគិតថាប្រហែលមិនមែនទុស្សេខ្សែភ្លើងទេប្រហែលមានអ្នកដាំស្លនៅខាងក្រោយ»។
អ្នកស្រីបន្តថាសម្ភាររបស់អ្នកស្រីរួមមានលុយកាក់ ទូរទ្សសន៍ ទូខោអាវ និងរបស់របរផ្សេងៗត្រូវបានភ្លើងឆេះអស់គឺយកបានតែម៉ូតូមួយគ្រឿងប៉ុណ្ណោះ។
បើតាមលោក ផាន់ណារ៉ា ចាប់តាំងពីដើមឆ្នាំ ២០១៦ ដល់ត្រឹមខែកញ្ញានេះនៅភ្នំពេញមានគ្រោះអគ្គិភ័យចំនួន ៦៣ ករណីបណ្តាលឲ្យមនុស្សស្លាប់ ២ នាក់ និងរងរបួស ១១ នាក់៕
