.jpg)
សមត្ថកិច្ចពេលជួយពន្លត់ភ្លើងនៅខណ្ឌឫស្សីកែវថ្មីៗនេះ។ រូបថត ប៉ូលិស
ភ្នំពេញៈ មន្ត្រីនគរបាលពន្លត់អគ្គិភ័យបានអះអាងថា គ្រោះអគ្គិភ័យដែលកើតនៅរាជធានីភ្នំពេញពីម្សិលមិញបានធ្វើឲ្យប៉ះពាល់ជម្រកពលរដ្ឋជាង ១០០ គ្រួសារ និងមុខរបរប្រចាំថ្ងៃ ខណៈឧប្បត្តិហេតុនេះបានកើតយ៉ាងតិច ៣ លើក នៅទីកន្លែងផ្សេងៗពីគ្នាក្នុងថ្ងៃតែមួយ។
លោក ព្រំ យ៉ន ប្រធានការិយាល័យនគរបាលបង្ការ និងពន្លត់អគ្គិភ័យរាជធានីភ្នំពេញបានប្រាប់ភ្នំពេញប៉ុស្តិ៍ពីម្សិលមិញថា ចន្លោះពីម៉ោង ១ និង ៣០ នាទីរំលងអធ្រាត្រដល់ម៉ោង ៩ និង ៣០ នាទីព្រឹកថ្ងៃទី ២៥ ខែកុម្ភៈ ឆ្នាំ ២០២០ គ្រោះអគ្គិភ័យបានកើតឡើង ៣ លើក នៅភ្នំពេញដោយបានឆេះផ្ទះពលរដ្ឋក្នុងខណ្ឌចំនួន ៣ រួមមាន ខណ្ឌឫស្សីកែវ,ខណ្ឌមានជ័យ និងខណ្ឌសែនសុខ សរុបអស់ផ្ទះ ១៨ ខ្នង និង ៩៥ បន្ទប់ជួលធ្វើឲ្យពលរដ្ឋជាង ១០០ គ្រួសារ បាត់បង់ជម្រក និងបំផ្លាញម៉ូតូ ២ គ្រឿងព្រមទាំងទ្រព្យសម្បត្តិមួយចំនួនទៀត។
លោក យ៉ន បានថ្លែងថា៖ «អគ្គិភ័យទាំង ៣ កន្លែងនេះបង្កឡើងពីភាពធ្វេសប្រហែសរបស់ម្ចាស់ផ្ទះ និងសហគមន៍មូលដ្ឋាន»។
បើតាមលោក យ៉ន ហេតុការណ៍ឆេះផ្ទះលើកទី ១ បានកើតនៅភូមិ-សង្កាត់ភ្នំពេញថ្មី ខណ្ឌសែនសុខនៅម៉ោង ១ និង ៣០ នាទីរំលងអធ្រាត្រឈានចូលថ្ងៃទី ២៥ កុម្ភៈដោយបានបំផ្លាញផ្ទះ ១ ខ្នងធ្វើពីឈើប្រក់ស័ង្កសី រួមទាំងម៉ូតូ ២ គ្រឿង និងទ្រព្យសម្បត្តិមួយចំនួនទៀត។
លោកថា តាមការបំភ្លឺពីបុរសម្ចាស់ផ្ទះឈ្មោះ លី ម៉េង អាយុ ៧២ ឆ្នាំ គ្រោះអគ្គិភ័យនេះទំនងមកពី «ការទុស្សេខ្សែភ្លើង» ព្រោះមុនកើតឡើងគាត់បានឮសំឡេងផ្ទុះនៅចំណុចបារ៉ែតភ្លើងក្នុងផ្ទះគាត់ ហើយបន្ទាប់មកក៏មានអណ្ដាតភ្លើងឆាបឆេះចេញពីចំណុចនោះ រាលដាលឆេះផ្ទះទាំងស្រុងតែម្ដង។
ចំណែកករណីទី ២ កើតឡើងនៅម៉ោង ៥ ទៀបភ្លឺថ្ងៃ ២៥ ខែកុម្ភៈដោយឆេះបំផ្លាញផ្ទះ ១ ខ្នងឈើលើថ្មក្រោមនៅភូមិប្ញស្សី សង្កាត់ស្ទឹងមានជ័យ ២ ខណ្ឌមានជ័យ។ តាមការបំភ្លឺពីបុរសជាម្ចាស់ផ្ទះឈ្មោះ គង់ សុខលីន អាយុ ៥៤ ឆ្នាំ ថាគ្រោះអគ្គិភ័យមកពី «ដុតធូបមូសលើពូកខ្វះការប្រុងប្រយ័ត្ន»។
លោក យ៉ន បានឲ្យដឹងទៀតថា នៅថ្ងៃទី ២៥ ខែកុម្ភៈម្សិលមិញនេះដែរ គឺនៅវេលាម៉ោង ៩ និង ៣០ នាទីព្រឹកមានគ្រោះអគ្គិភ័យបានឆេះផ្ទះពលរដ្ឋនៅភូមិបាក់ទូក សង្កាត់ទួលសង្កែ ១ ខណ្ឌឫស្សីកែវអស់ ១៦ ខ្នង និង ៩៥ បន្ទប់ជួលព្រមទាំងទ្រព្យសម្បត្តិជាច្រើនទៀត។
យ៉ាងណាមកទល់ពេលនេះសមត្ថកិច្ចនៅមិនទាន់ស្រាវជ្រាវរកឃើញពីមូលហេតុនៃការឆេះនេះនៅឡើយទេ។
ប៉ុន្តែបើតាមលោក នង សាបុង នាយនគរបាលប៉ុស្តិ៍សង្កាត់ទួលសង្កែ ១ ករណីភ្លើងឆេះផ្ទះ និងបន្ទប់ជួលក្នុងខណ្ឌឫស្សីកែវខាងលើនេះគឺមកពី «ផ្ទុះកំប៉ុងហ្គាសសម្រាប់ដាំស្ល»។
លោក សាបុង បានបញ្ជាក់ថា៖ «នៅពេលនេះសមត្ថកិច្ចយើងកំពុងសហការជាមួយមន្ត្រីនគរបាលជំនាញផ្នែកពន្លត់អគ្គិភ័យដើម្បីស្រាវជ្រាវស្វែងរកការពិត បន្ទាប់ពីអ្នកភូមិរងគ្រោះជាច្រើននាក់បានអះអាងថា អគ្គិភ័យនេះបណ្ដាលមកពីផ្ទុះកំប៉ុងហ្គាសចេញពីផ្ទះឈ្មោះ សន រដ្ឋា ដែលជាម្ចាស់ដីឡូត៍ និងមានសង់បន្ទប់ជួលជាច្រើនបន្ទប់។ ប៉ុន្តែម្ចាស់ផ្ទះនោះបានបដិសេធថា ផ្ទះរបស់គាត់គ្មានការដាំស្លនៅម៉ោងនោះទេ»។
លោក សាបុង បានប្រាប់ឲ្យដឹងទៀតថាកាលពី ២ សប្ដាហ៍មុនមានករណីគ្រោះអគ្គិភ័យម្ដងរួចមកហើយ ដោយបានបំផ្លាញលំនៅឋានប្រជាពលរដ្ឋចំនួន ៦ ខ្នង និងបន្ទប់ជួលចំនួន ៩ បន្ទប់ដែលកាលនោះសមត្ថកិច្ចរកឃើញថា បានកើតឡើងដោយសារករណីទុស្សេខ្សែភ្លើងដែលត្រូវបានគេចខ្វាត់ខ្វែងនៅតាមបង្គោលឈើចាស់ៗនៃសំណង់មិនរៀបរយក្នុងតំបន់នេះ៕
វីដេអូ៖
