ព្រះសីហនុៈ សមត្ថកិច្ចនៃស្នងការដ្ឋាននគរបាលខេត្តព្រះសីហនុកំពុងបើកការស៊ើបអង្កេតករណីសាកសពមនុស្សម្នាក់ដែលត្រូវគេកាត់ជាបំណែកហើយបោះចោលក្នុងព្រៃរបោះក្នុងសង្កាត់លេខ ៤ ក្រុង-ខេត្តព្រះសីហនុដែលសមត្ថកិច្ចសន្និដ្ឋានថាអាចជាមនុស្សប្រុស បន្ទាប់ពីប្រទះឃើញកាលពីម្សិលមិញ។
លោក ជួន ណារិន្ទ ស្នងការនគរបាល ខេត្តព្រះសីហនុប្រាប់ពីម្សិលមិញថា ករណីសាកសពមនុស្សម្នាក់ដែលពលរដ្ឋប្រទះឃើញកាលពីថ្ងៃទី ១ តុលា ដែលត្រូវគេបោះចោលនៅក្នុងព្រៃរបោះនោះគឺកម្លាំងសមត្ថកិច្ចកំពុងបើកការស្រាវជ្រាវជុំវិញអំពើឃាតកម្មនេះហើយ។
លោកប្រាប់ថាស្ថានភាពនៅជុំវិញទីតាំងដែលគេបោះចោលសាកសពនោះជាព្រៃរបោះ។ សាកសពត្រូវជនល្មើសសម្លាប់ហើយច្រកយ៉ាងស្អាតដោយជនល្មើសបានរុំសពជា ៣ សណ្ឋាន។ ដោយរុំនឹងក្រណាត់កម្រាលពូក និងភួយ ហើយច្រកដាក់ក្នុងស្បោងប្លាស្ទិក។
លោកថ្លែងថា៖ «បើយើងមើលទៅសាកសពនោះជាមនុស្សប្រុសតែយើងមិនអាចទាន់សន្និដ្ឋានថាយ៉ាងម៉េចបានទេ ព្រោះយើងកំពុងស្រាវជ្រាវរឿងនេះ»។
ប៉ុន្តែលោក ជួន ណារិន្ទ មិនបានបញ្ជាក់ប្រាប់ថា តើសាកសពនោះជាជនជាតិខ្មែរឬ ជនបរទេសទេព្រោះសមត្ថកិច្ចកំពុងស៊ើបអង្កេត។ បើយោងតាមការចុះផ្សាយពីអគ្គនាយកដ្ឋានអន្តោប្រវេសន៍ពីម្សិលមិញសរសេរថា សាកសពត្រូវគេប្រទះឃើញនៅក្នុងដីឡូត៍មួយកន្លែងស្ថិតក្នុងក្រុមទី ៦ ភូមិ ៦ សង្កាត់លេខ ៤ ក្រុង-ខេត្ត ព្រះសីហនុកាលពីវេលាម៉ោង ៩ កន្លះព្រឹក ថ្ងៃទី ១ តុលា។
ការចុះផ្សាយបង្ហាញថា ជនរងគ្រោះជាជនបរទេសជនជាតិអាស៊ី ភេទប្រុស និងមានអាយុប្រហែល ៣០ ឆ្នាំ ដែលសមត្ថកិច្ចកំពុងស្វែងរកអត្តសញ្ញាណជនរងគ្រោះ។ តាមការពិនិត្យរបស់មន្ត្រីជំនាញការិយាល័យបច្ចេកទេស និងវិទ្យាសាស្ត្រឲ្យដឹងថាជនរងគ្រោះស្លាប់ដោយសារអំពើឃាតកម្ម។ បច្ចុប្បន្ន សាកសពជនបរទេសនោះត្រូវបានរក្សាទុកបណ្តោះអាសន្ននៅសាលរក្សាសពនៃមន្ទីរពេទ្យបង្អែកខេត្តព្រះសីហនុ និងរង់ចាំការសម្រេចពីក្រុមគ្រួសារ និងស្ថានទូតសាមី។
ពាក់ព័ន្ធនឹងករណីនេះលោកស្រី ជៀប សុធារី មន្ត្រីសម្របសម្រួលនៃសមាគមការពារសិទ្ធិមនុស្សអាដហុកខេត្តព្រះសីហនុប្រាប់ថាអំពើឃាតកម្មនេះលោកស្រីកំពុងតាមដានការវិវឌ្ឍបន្តទៀតដែលសមត្ថកិច្ចពាក់ព័ន្ធកំពុងស៊ើបអង្កេតបន្ត។
លោកស្រីបន្តថា ករណីសម្លាប់មនុស្សក្នុងរូបភាពកាត់ជាបំណែកបែបនេះ កន្លងមកនៅខេត្តព្រះសីហនុពុំដែលកើតមានទេ។
លោកស្រីថា៖ «ពាក់ព័ន្ធអំពើឃាតកម្ម ឬបទល្មើសឧក្រិដ្ឋកើតឡើងម្តងៗ យើងឃើញថា សមត្ថកិច្ចរបស់យើង តែងតែយកចិត្តទុកដាក់ធ្វើការបង្ក្រាប និងឃាត់ខ្លួនជនល្មើស»។
លោកស្រីបន្ថែមថាបទល្មើសឧក្រិដ្ឋដែលបានកើតឡើងដូចជា អំពើចាប់ជំរិត ឬបទល្មើស បង្ខាំងមនុស្សជនរងគ្រោះ និងជនល្មើសសុទ្ធតែជាជនជាតិបរទេស៕