តាកែវ/កណ្ដាលៈ យ៉ាងហោចណាស់មានឃាតកម្មចំនួន ២ បានកើតឡើងក្នុងថ្ងៃតែ ១ កាលពីថ្ងៃសៅរ៍ ដោយស្ត្រីម្នាក់នៅតាកែវ ត្រូវបានប្ដីសម្លាប់ដោយកាប់នឹងពូថៅ ខណៈបុរសម្នាក់ត្រូវបានមិត្តភក្ដិសម្លាប់ដោយកាប់នឹងកាំបិតប៉័ងតោ នៅខេត្តកណ្ដាល។ នេះបើតាមមន្ត្រីនគរបាលមូលដ្ឋាន។ លោក ភី ឆុន អធិការស្រុកអង្គរបុរី បានប្រាប់ភ្នំពេញប៉ុស្តិ៍ កាលពីម្សិលមិញថា បុរសជាប់សង្ស័យក្នុងអំពើឃាតកម្មខាងលើនេះ ឈ្មោះ បាល់ ភឿន អាយុ ៤៨ ឆ្នាំ រស់នៅភូមិកំពង់ពោធិ៍ ឃុំព្រែកផ្ទោល ស្រុកអង្គរបុរី ខេត្តតាកែវ។
លោកបានថ្លែងថា ជនសង្ស័យត្រូវបានចាប់ខ្លួនកាលពីព្រឹកថ្ងៃសៅរ៍ បន្ទាប់ពីគាត់កាប់ស្ត្រីជាប្រពន្ធឈ្មោះ មុត ឃាង អាយុ ៥២ ឆ្នាំ ដោយប្រើពូថៅ និងកណ្ដៀវ ខណៈស្ត្រីរងគ្រោះកំពុងអង្គុយធ្វើចេកឆាបក្នុងផ្ទះបាយ។ ករណីនេះបានធ្វើឲ្យកូនប្រុសស្រីពួកគេ ៥ នាក់ ដែលមានអាយុពី ១៤ ឆ្នាំ ដល់ ២២ ឆ្នាំ ក្លាយជាកូនកំព្រា។
លោកថា៖ «ជនសង្ស័យជាមនុស្សប្រចណ្ឌជ្រុល និងហួងហែងប្រពន្ធមិនឲ្យនិយាយជាមួយបុរសផ្សេង ដែលមានវ័យស្របាលគ្នាក្នុងភូមិទេ។ ជនសង្ស័យជាមនុស្សញៀនស្រាប៉ុន្តែថ្ងៃកើតហេតុមិនផឹកទេ»។ បច្ចុប្បន្នជនសង្ស័យ ត្រូវបាននគរបាលស្រុកអង្គរបុរីបញ្ជូនទៅស្នងការដ្ឋានខេត្តតាកែវ ដើម្បីស៊ើបសួរបន្តតាមនីតិវិធី។
ដោយឡែកនៅខេត្តកណ្ដាលក៏មានករណីឃាតកម្មមួយដែរកាលពីថ្ងៃសៅរ៍ ដោយបុរសវ័យ ៣០ ម្នាក់ ត្រូវបានមិត្តភក្ដិម្នាក់លួចកាប់នឹងកាំបិតប៉័ងតោរបួសធ្ងន់ ហើយបានស្លាប់តាមផ្លូវពេលបញ្ជូនទៅមន្ទីរពេទ្យ។ រីឯជនសង្ស័យត្រូវបានសមត្ថកិច្ចចាប់ខ្លួនបានភ្លាមៗ។
លោក សេង សុជាតិ អធិការស្រុកស្អាងបានប្រាប់ភ្នំពេញប៉ុស្តិ៍ពីម្សិលមិញថា ជនរងគ្រោះ ឈ្មោះ ពង ហ៊ង អាយុ ៣០ ឆ្នាំ មានលំនៅក្នុងឃុំប្រាសាទស្រុកស្អាង ខេត្ដកណ្ដាល។ ចំណែកជនសង្ស័យឈ្មោះ ងន សុវណ្ណ អាយុ ៣៤ ឆ្នាំ មានលំនៅក្នុងឃុំគគីរធំ ស្រុកកៀនស្វាយ ខេត្ដកណ្ដាល។ អ្នកទាំង ២ ជាមិត្តភក្ដិធ្លាប់ធ្វើការនៅប្រទេស ថៃ ជាមួយគ្នា។
លោកថា៖ «តាមចម្លើយសារភាពរបស់ជនសង្ស័យថា ជនរងគ្រោះបានលួចទាក់ទងស្នេហាជាមួយនារីម្នាក់ជាសង្សារបស់ជនសង្ស័យធ្វើឲ្យជនសង្ស័យមានគំនុំរហូតលួចកាប់ជនរងគ្រោះដែលជាមិត្តភក្ដិរបស់ខ្លួនព្រោះតែរឿងស្រីម្នាក់»។
លោក សុជាតិ បានបន្តថា បច្ចុប្បន្នជនសង្ស័យ កំពុងស្ថិតក្រោមការសាកសួររបស់មន្ត្រីនគរបាលយុត្តិធម៌នៃស្នងការដ្ឋាននគរបាលខេត្តកណ្ដាល ដើម្បីរៀបចំសំណុំរឿងបញ្ជូនឡើងតុលាការខេត្តនៅព្រឹកថ្ងៃចន្ទនេះ៕