.jpg)
លោក កែវ ថៃ ដែលទើបត្រូវបានឃាត់ខ្លួន។ រូបថត សហការី
កំពង់ឆ្នាំងៈ គ្រូបង្រៀនម្នាក់ជាសមាជិកសមាគមគ្រូបង្រៀនកម្ពុជាឯករាជ្យនៅខេត្តកំពង់ឆ្នាំង និងជាអតីតសមាជិកបក្សប្រឆាំងត្រូវបានសមត្ថកិច្ចឃាត់ខ្លួនបញ្ជូនមករាជធានីភ្នំពេញកាលពីម្សិលមិញដែលទំនងមកពីករណីបើកបង្រៀនគួរក្នុងពេលតាមសាលាត្រូវបានប្រកាសឲ្យបិទបណ្ដោះអាសន្នដោយសារការរីករាលដាលនៃជំងឺកូវីដ១៩។ ប៉ុន្តែមន្ត្រីនគរបាលអះអាងថា គាត់មានជាប់ពាក់ព័ន្ធនឹងករណីជាច្រើន។
លោក កែវ ថៃ គ្រូបង្រៀននៅវិទ្យាល័យបរិបូរណ៍ខេត្តកំពង់ឆ្នាំងត្រូវបានសមត្ថកិច្ចឃាត់ខ្លួននៅផ្ទះលោកមុនពេលបញ្ជូនទៅកាន់រាជធានីភ្នំពេញបន្ទាប់ពីគ្រូបង្រៀនរូបនេះបានប្រកាសបើកបង្រៀនគួរភាសាអង់គ្លេសតាមអនឡាញ។ នេះបើតាមការបញ្ជាក់ពីកញ្ញា កែវ រចនា ដែលត្រូវជាកូនស្រីបង្កើតរបស់លោក កែវ ថៃ។
កញ្ញា កែវ រចនា បានរៀបរាប់កាលពីម្សិលមិញថានៅម៉ោងប្រមាណជិត ៦ ព្រឹក ក្រុមសមត្ថកិច្ចបានទៅព័ទ្ធផ្ទះនាងហើយឲ្យឪពុកនាងចុះមកដីដើម្បីសួរនាំ។ ប៉ុន្តែ ឪពុករបស់នាងមិនព្រមចុះមកទេ ដោយបន្តនៅក្នុងផ្ទះរហូតដល់ម៉ោងជាង ៧។ កញ្ញាបញ្ជាក់ថា សមត្ថកិច្ចមិនមានដីកាអ្វីយកមកជាមួយទេ ប៉ុន្តែនៅវេលាម៉ោងប្រមាណជាង ៧ ព្រឹកទើបព្រះរាជអាជ្ញាសាលាដំបូងខេត្តកំពង់ឆ្នាំងបានមកដល់។
កញ្ញាបន្តថា៖ «ខ្ញុំសុំមើលដីកាឆែកឆេរ តែខាងគាត់ថា គាត់ព្រះរាជអាជ្ញាមកហើយមិនចាំបាច់យកអាហ្នឹងទេ មិនចាំបាច់ដីកាអីទៀត។ គាត់ដកហូតទូរស័ព្ទផ្ទះខ្ញុំ ៣ គ្រឿងទាំងរបស់ម៉ាក់ខ្ញុំ ប៉ាខ្ញុំ ហើយនិងរបស់ខ្ញុំ។ ដកហើយគាត់ធ្វើលិខិត ១ លិខិតទទួលទូរស័ព្ទ។ គាត់ថា បើផ្ទះខ្ញុំអត់ឲ្យឆែកឆេរទេ គាត់នឹងប្ដឹងគ្រួសារខ្ញុំទៀត ដោយសារគាត់មានដីកាហើយ»។
កញ្ញា កែវ រចនា បន្តថាពេលឪពុកនាងចុះមកដល់ដីភ្លាម សមត្ថកិច្ចបានក្រៀកគាត់ចូលក្នុងឡានតែម្តង។ កញ្ញាបន្ត ថាកញ្ញាមិនដឹងពីមូលហេតុនៃការចាប់ខ្លួននេះច្បាស់ទេ ប៉ុន្តែឪពុករបស់កញ្ញាបានឈប់បង្រៀនគួរនៅថ្នាក់រៀនចាប់តាំងពីក្រសួងអប់រំបានប្រកាសបិទសាលាបណ្ដោះអាសន្ន ដើម្បីទប់ស្កាត់កូវីដ ១៩ តែបានបើកបង្រៀនតាមអនឡាញវិញ។
កាលពីថ្ងៃពុធលោកនាយករដ្ឋមន្ត្រី ហ៊ុន សែន បានថ្លែងថា មានគ្រូបង្រៀនម្នាក់ដែលជាសមាជិកសមាគមគ្រូបង្រៀនកម្ពុជាឯករាជ្យបានប្រកាសតាមបណ្ដាញសង្គមអំពីការបើកបង្រៀនគួរ។ ប៉ុន្តែលោកមិនបានបញ្ជាក់ឈ្មោះនោះទេ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាមិនអត្ថាធិប្បាយលើករណីនេះទេ ប៉ុន្តែលោកបានបញ្ជាក់ពីសេចក្ដីណែនាំរបស់ក្រសួងអប់រំដែលចេញកាលពីថ្ងៃទី ២៦ ខែមីនា ម្សិលមិញ ស្ដីអំពីវិធានការបន្ថែមក្នុងការបង្ការ និងទប់ស្កាត់ការរាតត្បាតនៃជំងឺកូវីដ ១៩។
នៅក្នុងចំណុចទី ៤ នៃសេចក្ដីណែនាំនោះបានចែងថា៖ «ហាមផ្ដាច់មិនឲ្យមានការបង្រៀនគួរក្នុងពេលប្រយុទ្ធប្រឆាំងនឹងជំងឺកូវីដ១៩។ ក្នុងករណីគ្រូបង្រៀនណាដែលល្មើស ក្រសួងចាត់វិធានការរដ្ឋបាលចំពោះគ្រូបង្រៀននោះ»។
លោក ឆាយ គឹមខឿន អ្នកនាំពាក្យនៃអគ្គស្នងការដ្ឋាននគរបាលជាតិបានបញ្ជាក់ថា ពិតជាមានការចាប់ខ្លួនលោក កែវ ថៃ មែន ដោយសារមានជាប់ពាក់ព័ន្ធនឹងករណីជាច្រើន។
លោកបានបញ្ជាក់ថា៖ «គាត់ហ្នឹងនិយាយពីអតីតភាពគាត់ជាមុខសញ្ញាដែលជាប់ពាក់ព័ន្ធនឹងអំពើញុះញង់ និងអំពើឃុបឃិតជាមួយក្រុមឧទ្ទាមក្បត់ជាតិជាពិសេសពាក់ព័ន្ធនឹងអំពើក្បត់ជាតិជាសកម្មជន ហើយនៅក្នុងបញ្ជីឈ្មោះរបស់តុលាការដែលពេលនោះរាជរដ្ឋាភិបាលបានអនុគ្រោះទោស តែស្ថិតនៅក្នុងការឃ្លាំមើល។
លោកបន្តថា៖ «បន្ទាប់ពីបានរួចទោសទៅដូចអត់មានការកែប្រែ ហើយបង្កើតបញ្ហាច្រើនបន្ថែមទៀតបង្ហោះព័ត៌មានបង្ហោះអីមានការញុះញង់បានន័យថា គាត់អត់កែប្រែគាត់នៅតែញុះញង់។ មានឃាត់មែនព្រឹកមិញ ហើយយកមកភ្នំពេញហើយដើម្បីសួរបំភ្លឺ ហើយរៀបចំនីតិវិធីបញ្ជូនទៅតុលាការ»៕
