.jpg)
ផលិតផលសម្អាងក្លែងក្លាយ ៥ តោនត្រូវបាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃរឹបអូសបានកាលពីព្រឹកថ្ងៃម្សិលមិញ។ រូបថត នគរបាលជាតិ
ភ្នំពេញ/ព្រះសីហនុៈ សមត្ថកិច្ចចម្រុះរាជធានីភ្នំពេញបានរឹបអូសផលិតផលគ្រឿងសម្អាងក្លែងក្លាយ ៥ តោនព្រមទាំងចាប់ឃាត់ខ្លួនជនជាតិចិនម្នាក់ ខណៈដែលសមត្ថកិច្ចខេត្តព្រះសីហនុបានចាប់ឃាត់ខ្លួនជនជាតិចិនជិត ១០០ នាក់ពាក់ព័ន្ធការជួញដូរ និងប្រើប្រាស់គ្រឿងញៀនព្រមទាំងជំរិតទារប្រាក់ តាមប្រព័ន្ធអ៊ីនធឺណិត។
ទីតាំងផលិតគ្រឿងសម្អាងក្លែងក្លាយដែលមានម្ចាស់ជាជនជាតិចិននេះ ត្រូវបានកម្លាំងនគរបាលសេដ្ឋកិច្ចក្រសួងមហាផ្ទៃចុះបង្ក្រាបបាននាព្រឹកថ្ងៃទី ២៦ ខែសីហា ឆ្នាំ ២០១៨ ស្ថិតនៅផ្ទះលេខ ៨៧ ផ្លូវវេងស្រេង ភូមិចោមចៅ សង្កាត់ចោមចៅទី ២ ខណ្ឌពោធិ៍សែនជ័យ។
ប្រតិបត្តិការនេះធ្វើឡើងក្រោមការដឹកនាំផ្ទាល់ពីលោក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រោមការសម្របសម្រួលនីតិវិធីពីលោក ស្រី ម៉ាក់នី ព្រះរាជអាជ្ញារងអមសាលាដំបូងរាជធានីភ្នំពេញក្នុងនោះសមត្ថកិច្ចដកហូតបានគ្រឿងសម្អាងក្លែងក្លាយទម្ងន់ ៥ តោន និងសម្ភារសម្រាប់ផលិតមួយចំនួនទៀត។
លោក ចាន់ វ៉ាន់ធឿន បានឲ្យដឹងថាការឈានទៅដល់ការបង្ក្រាបនេះគឺក្រោយពីកម្លាំងជំនាញបានសហការជាមួយមន្ត្រីក្រសួងសុខាភិបាល ក្រសួងឧស្សាហកម្ម និងអាជ្ញាធរមូលដ្ឋានធ្វើការស្រាវជ្រាវរកឃើញក៏សុំគោលការណ៍ចុះបង្ក្រាបជាក់ស្ដែងតែម្ដងដែលមានម្ចាស់ទីតាំងផលិតឈ្មោះ Zou Zhiqang អាយុ ៤៤ ឆ្នាំជាជនជាតិចិន។
លោកបន្ដ៖ «ទីតាំងឃ្លាំងផលិតគ្រឿងសម្អាងក្លែងក្លាយនេះគឺក្រុមហ៊ុនមិនបានសុំច្បាប់អនុញ្ញាតពីស្ថាប័នពាក់ព័ន្ធ និងរកឃើញផលិតផលសម្ភារ វត្ថុធាតុដើមសម្រាប់ផលិតចំនួន ២២ មុខមានទម្ងន់ប្រមាណ ៥ តោនរួមមានសាប៊ូ ឡេ ទឹកអប់ ក្រែមម្សៅលាបមុខ និងវត្ថុធាតុដើមសម្រាប់កែច្នៃមួយចំនួនទៀត»។
បើតាមលោក វ៉ាន់ធឿន ក្រោយពីធ្វើការត្រួតពិនិត្យ និងតាមការសម្រេចរបស់ព្រះរាជអាជ្ញារង សមត្ថកិច្ចបានសម្រេចដកហូតផលិតផលសាប៊ូ គ្រឿងសម្អាងក្លែងក្លាយដោយរក្សាទុក និងបិទទីតាំងខាងលើហើយ។
លោកបន្ដ៖ «ក្រោយពីនាំខ្លួនម្ចាស់ទីតាំងផលិតផលិតផលនេះឈ្មោះ Zou Zhiqang មកសាកសួរបំភ្លឺ យើងបានចោទប្រកាន់ម្ចាស់ទីតាំងនេះពីបទក្លែងបន្លំផលិតផលម៉ាករបស់អ្នកដទៃ»។ ជនជាប់ចោទត្រូវបានឃុំខ្លួនរង់ចាំការកាត់ក្ដីពីតុលាការក្នុងថ្ងៃដដែលនោះ។
ករណីដាច់ដោយឡែកមួយទៀតនៅឯខេត្តព្រះសីហនុកាលពីយប់រំលងអធ្រាត្រឈានចូលថ្ងៃទី ២៦ ខែសីហា ម្សិលមិញសមត្ថកិច្ចបានឆ្មក់ចូលក្នុងក្លិបកម្សាន្តខារ៉ាអូខេ ស៊ីតុងហ្វាង ដែលមានទីតាំងស្ថិតនៅក្នុងក្រុមទី ២៧ ភូមិ ៣ សង្កាត់ ៣ ក្រុងព្រះសីហនុដោយឃាត់ខ្លួនជនជាតិចិនចំនួន ៦២ នាក់ និងវត្ថុតាងថ្នាំញៀនមួយចំនួន។
ចិន ៦២ នាក់ត្រូវសមត្ថកិច្ចឃាត់ខ្លួនរឿងគ្រឿងញៀន។ រូបថត នគរបាល
ការឃាត់ខ្លួននេះបានធ្វើឡើងបន្ទាប់ពីកាលពីរសៀលថ្ងៃទី ២៤ ខែសីហា សមត្ថកិច្ចខេត្តព្រះសីហនុក៏បានចាប់ឃាត់ខ្លួនចិនចំនួន ១៨ នាក់ផងដែរពាក់ព័ន្ធករណីជំរិតទារប្រាក់តាមប្រព័ន្ធអ៊ីនធឺណិត (VOIP)។
លោក ស៊ុន សុផាត ស្នងការរងខេត្តព្រះសីហនុបានឲ្យដឹងកាលពីម្សិលមិញថា ជនសង្ស័យជនជាតិចិន ៣ នាក់ក្នុងចំណោម ៦២ នាក់ដែលត្រូវបានឃាត់ខ្លួនកំពុងស្ថិតក្រោមការសាកសួរពីក្រុមមន្ត្រីជំនាញការិយាល័យប្រឆាំងគ្រឿងញៀន ខណៈ ៥៩ នាក់ទៀតកំពុងត្រូវបានធ្វើតេស្តទឹកនោម ដើម្បីស្វែងរកសារធាតុញៀន។
លោកបញ្ជាក់ថា៖ «ជនសង្ស័យ ៣ នាក់ដែលកំពុងធ្វើការសាកសួរនេះមានតួនាទីជានាយកគ្រប់គ្រងក្លិប និងជាមេការ និងជំនួយការទូទៅនៅក្នុងក្លិប និងខារ៉ាអូខេនោះ និងជាអ្នកប្រព្រឹត្តការជួញដូរគ្រឿងញៀនដោយផ្ទាល់។ ពួកគេទាំង ៣ នាក់រួមទាំងវត្ថុតាងថ្នាំញៀនប្រភេទមេតំហ្វេតាមីន ចំនួន ២២ កញ្ចប់តូច និង ១ កញ្ចប់ធំ, ថ្នាំញៀនប្រភេទកេតាមីនដែលលាយទឹករួច ១ ដប និងជាម្សៅក្រាមសថ្លា ២ ដប»។ ជនសង្ស័យនឹងត្រូវបញ្ជូនទៅសាលាដំបូងខេត្តព្រះសីហនុនៅថ្ងៃចន្ទនេះ។
លោក សុផាត ឲ្យដឹងទៀតថាដោយឡែកជនសង្ស័យ ៥៩ នាក់ទៀតដែលក្នុងនោះមានស្រី ១៥ នាក់នឹងត្រូវដោះលែងវិញ បន្ទាប់ពីពួកគេទទួលការអប់រំណែនាំ និងយល់ព្រមចុះកិច្ចសន្យាបញ្ឈប់ការប្រើប្រាស់គ្រឿងញៀន ក្នុងករណីដែលពួកគេមិនត្រូវបានរកឃើញមានសារធាតុញៀននៅក្នុងខ្លួន ក្រោយការធ្វើតេស្តទឹកនោម។ ប៉ុន្តែបើរកឃើញមានផ្ទុកសារធាតុញៀន នឹងត្រូវបញ្ជូនទៅមណ្ឌលបន្សាបគ្រឿងញៀន។
កាលពីរសៀលថ្ងៃទី ២៤ ខែសីហាជនជាតិចិនដីគោក និងចិនតៃវ៉ាន់សរុប ១៨ នាក់ត្រូវបានក្រុមប្រតិបត្តិការស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃរួមសហការជាមួយកម្លាំងស្នងការដ្ឋាននគរបាលខេត្តព្រះសីហនុចាប់ឃាត់ខ្លួនពាក់ព័ន្ធករណីជំរិតទារប្រាក់តាមប្រព័ន្ធអ៊ីនធឺណិត (VOIP)។ នេះបើតាមលោក កៀង សន្ទរោ ព្រះអាជ្ញារងអមសាលាដំបូងខេត្តព្រះសីហនុដែលបានចូលរួមជួយសម្របសម្រួលផ្នែកច្បាប់នៅក្នុងប្រតិបត្តិការនោះ។
លោក សន្ទរោ បញ្ជាក់កាលពីម្សិលមិញថា៖ «ក្រុមជនជាតិចិនទាំងនោះ ត្រូវបានកម្លាំងនគរបាលនៃអគ្គនាយកដ្ឋានអន្តោប្រវេសន៍ដឹកជញ្ជូនទៅកាន់រាជធានីភ្នំពេញទាំងយប់ ដើម្បីយកទៅសាកសួរ និងចាត់វិធានការបន្តតាមនីតិវិធីច្បាប់។ ពួកគេទំនងជានឹងត្រូវប្រគល់ឲ្យសមត្ថកិច្ចប៉ូលិសចិន នាំយកទៅផ្តន្ទាទោសនៅក្នុងប្រទេសពួកគេព្រោះប្រតិបត្តិការនេះមានការចូលរួមពីកម្លាំងប៉ូលិសចិនផងដែរ»។
លោកបន្តថាក្នុងប្រតិបត្តិការបង្ក្រាបជនជាតិចិនដីគោក និងតៃវ៉ាន់ខាងលើនេះសមត្ថកិច្ចបានរឹបអូស Laptop ៣៥ គ្រឿង, ទូរស័ព្ទដៃ ៤៤ គ្រឿង,លិខិតឆ្លងដែនចំនួន ១៣ ក្បាល។
បទល្មើសពាក់ព័ន្ធនឹងជនជាតិចិននេះដែរកាលពីថ្ងៃទី ២៤ ខែសីហា សាលាដំបូងរាជធានីភ្នំពេញបានសម្រេចធ្វើការឃុំខ្លួន ក្រុមចោរជាជនជាតិចិន ៥ នាក់នៅពន្ធនាគារព្រៃសដោយចោទប្រកាន់ ៣ បទល្មើសរួមមាន «បទកំហែងយក, ចោរកម្ម និងបង្ខាំងទុក ដោយមានស្ថានទម្ងន់ទោស»។ នេះបើតាមអធិការរងខណ្ឌទួលគោកទទួលបន្ទុកផ្នែកព្រហ្មទណ្ឌកម្រិតធ្ងន់លោក ពិសិដ្ឋ ៕
