ភ្នំពេញៈ សមត្ថកិច្ចបានឃាត់ខ្លួនជនសង្ស័យបីនាក់សួរនាំ និងដកហូតបានកញ្ឆាក្រៀមជិត ១ តោនកន្លះព្រមទាំងឧបករណ៍ល្មើសមួយចំនួនទៀតក្នុងទីតាំងស្តុកកញ្ឆាដ៏ធំមួយកន្លែងក្នុងបុរីជ័យឧត្តម សង្កាត់ទួលសង្កែ ខណ្ឌឫស្សីកែវតាមរយៈប្រតិបត្តិការបង្ក្រាបរយៈពេល ២ ថ្ងៃ។
ព្រះរាជអាជ្ញារងអមសាលាដំបូងរាជធានីភ្នំពេញ លោក សៀង សុខ បានឲ្យដឹងថាប្រតិបត្តិការនេះត្រូវបានដឹកនាំធ្វើដោយក្រុមប៉ូលិសមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិនៅម៉ោង ៧ ល្ងាចកាលពីថ្ងៃសុក្រ និងព្រឹកថ្ងៃសៅរ៍សប្តាហ៍មុនបន្ទាប់ពីទទួលបានដីកាអនុញ្ញាតពីអយ្យការអមសាលាដំបូងរាជធានីចុះបង្ក្រាបភ្លាមៗដោយរកឃើញនូវកញ្ឆាក្រៀមជាច្រើនបាវ និងវត្ថុតាងផ្សេងៗទៀត។
លោកព្រះរាជអាជ្ញារងបញ្ជាក់ថា គ្រានោះសមត្ថកិច្ចឃាត់ខ្លួនជនសង្ស័យបួននាក់។
ប៉ុន្តែប្រធានមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិលោក ខៀវ សាម៉ន បានអះអាងថាមានជនសង្ស័យតែបីនាក់ប៉ុណ្ណោះដែលត្រូវបានសមត្ថកិច្ចឃាត់ខ្លួនសួរនាំ និងសម្រេចកសាងសំណុំរឿងបញ្ជូនទៅតុលាការ។
លោកថា៖ «ក្នុងចំណោមបីនាក់នេះក៏មានមេខ្លោងម្នាក់អាម្នាក់ឈ្មោះ តារា នោះហ្នឹងឯង។ តាមការពិនិត្យរបស់មន្ត្រីជំនាញកញ្ឆានេះមិនមែនដាំស្រុកខ្មែរនោះទេគឺនាំចូលពីប្រទេសឡាវមកហើយមកស្តុកនៅទីតាំងនេះដើម្បីចែកចាយ និងជួញទៅក្រៅប្រទេសបន្តទៀត»។
បើតាមលោក ខៀវ សាម៉ន កញ្ឆាក្រៀមទាំង ៧៩ បាវដែលរឹបអូសបាននោះត្រូវបានសមត្ថកិច្ចផ្ទៀងផ្ទាត់ និងថ្លឹងត្រឹមត្រូវឃើញថាមានទម្ងន់ជិត ១ តោនកន្លះដែលស្មើនឹងជាង ១៤០០ គីឡូក្រាម ហើយក៏មាននូវឧបករណ៍សម្ងួត និងឧបករណ៍គ្រីបមួយចំនួនទៀតផងដែរ។
លោកថា៖ «ម៉ាស៊ីនគ្រីប និងម៉ាស៊ីនសម្ងួតត្រូវបានជនសង្ស័យប្រើសម្រាប់វេចខ្ចប់ និងបង្ការមិនឲ្យធំក្លិនដើម្បីងាយស្រួលគេចពីការតាមចាប់របស់ប៉ូលិស និងងាយជួញដូរចែកចាយ»។
បើទោះបីជាសារព័ត៌មានក្នុងស្រុកមួយចំនួនបានចុះផ្សាយកាលពីម្សិលមិញដែរថាសមត្ថកិច្ចបានឃាត់ខ្លួនជនសង្ស័យសរុបបួននាក់ និងរឹបអូសបានកញ្ឆាដល់ទៅជិត ២ តោនក្តីតែលោក ខៀវ សាម៉ន បានបដិសេធដោយថាព័ត៌មានទាំងនោះមិនគ្រប់ជ្រុងជ្រោយ និងមិនពិតឡើយ។
យោងតាមរបាយការណ៍របស់អគ្គស្នងការនគរបាលជាតិរយៈពេល ៦ ខែដើមឆ្នាំ ២០១៥ នគរបាលបានចាប់ខ្លួនមនុស្សចំនួន ១៩៥៩ នាក់ ពាក់ព័ន្ធនឹងករណីគ្រឿងញៀនដែលបង្ក្រាបបានចំនួន ៩៩៨ ករណី។ ចំនួននេះមានការកើនឡើងច្រើនគួរឲ្យកត់សម្គាល់ព្រោះតួលេខករណីគ្រឿងញៀនឆមាសទី ១ នេះស្មើនឹងចំនួនករណីបទល្មើសគ្រឿងញៀនរយៈពេលពេញមួយឆ្នាំកាលពីឆ្នាំ ២០១៤ ពោលគឺកើនឡើងដល់ទៅ ១៥៦,០៧% បើធៀបនឹងឆមាសទី ១ រយៈពេលដូចគ្នាកាលពីឆ្នាំ ២០១៤ ៕
