កំពង់ចាមៈ សមត្ថកិច្ចនគរបាលខេត្តកំពង់ចាមកាលពីម្សិលមិញបានឃាត់ខ្លួនជនសង្ស័យ ១២ នាក់ពាក់ព័ន្ធនឹងករណីបើកលេងល្បែងបញ្ជល់មាន់នៅចំណុចចុងព្រែកបត់ ក្នុងភូមិផ្ទះកណ្ដាលក្រោម ឃុំផ្ទះកណ្ដាល ស្រុកស្រីសន្ធរ ខេត្តកំពង់ចាម។
លោក ឯម កុសល ស្នងការនគរបាលខេត្តកំពង់ចាមមិនអាចសុំការបញ្ជាក់បន្ថែមពីករណីនេះបានទេ នៅថ្ងៃនេះដោយលោកថាកំពុងជាប់រវល់។ ក៏ប៉ុន្តែលោកបានឲ្យដឹងតាមរយៈរបាយការណ៍កាលពីម្សិលមិញថា ការបង្ក្រាបនេះធ្វើឡើងដោយកម្លាំងជំនាញរបស់ផែនការងារនគរបាលព្រហ្មទណ្ឌសហការជាមួយកម្លាំងជំនាញរបស់អធិការដ្ឋាននគរបាលស្រុកស្រីសន្ធរ និងអាជ្ញាធរមូលដ្ឋានកាលពីថ្ងៃទី ៦ ខែឧសភា បន្ទាប់ពីទទួលបានបណ្តឹងពីពលរដ្ឋភ្លាម។
លោកស្នងការបានបន្តថា ក្នុងកិច្ចប្រតិបត្តិការនេះមានការសម្របសម្រួលផ្ទាល់ពីលោក សុធា ពិសិដ្ឋ ព្រះរាជអាជ្ញារងនៃអយ្យការអមសាលាដំបូងខេត្តកំពង់ចាមក្នុងការចុះបង្ក្រាបករណីរារាំងដល់ការអនុវត្តវិធានការទប់ស្កាត់ការរីករាលដាលនៃជំងឺកូវីដ១៩ និងករណីបើកលេងល្បែងស៊ីសងខុសច្បាប់ (បញ្ជល់មាន់ភ្នាល់ដាក់ប្រាក់)។
បើតាមលោក ឯម កុសល សមត្ថកិច្ចបានដកហូតវត្ថុតាងរួមមាន ទូរស័ព្ទចំនួន ១២ គ្រឿង, សត្វមាន់ជល់ចំនួន ២ ក្បាល (ងាប់), កន្ត្រកដាក់សត្វមាន់ចំនួន ២, ប្រាក់រៀលចំនួន ៧៧០ ០០០ រៀល,ប្រាក់ដុល្លារចំនួន ៧៤០$ ,រថយន្តចំនួន ៣ គ្រឿង,ម៉ូតូចំនួន ៤ គ្រឿងហើយបានយកមករក្សាទុកនៅប៉ុស្តិ៍នគរបាលរដ្ឋបាលផ្ទះកណ្ដាល។
បច្ចុប្បន្នជនសង្ស័យចំនួន ១២ នាក់ខាងលើ រួមនឹងវត្ថុតាងត្រូវបានបញ្ជូនមកកាន់ស្នងការដ្ឋាននគរបាលខេត្តកំពង់ចាម ដើម្បីបន្តសាកសួរ និងចងក្រងសំណុំរឿងទៅតាមនីតិវិធីច្បាប់ តាមការបង្គាប់ពីលោក សុធា ពិសិដ្ឋ ព្រះរាជអាជ្ញារងនៃអយ្យការអមសាលាដំបូងខេត្តកំពង់ចាម។ នេះបើតាមរបាយការណ៍របស់ស្នងការដ្ឋាននគរបាលខេត្ត៕